LOMA YAABA 4

1Ti baa yedi lede Abalahama po? Wani yua n tie ti yaaja ti gbanandi nni. O den baa be? 2Li yaa tie ke o den baa li moamoansaali kelima o tuona po o den baa fidi ki kpiagi o yuli. Ama o kan kpiagi o yuli U Tienu kani. 3Lani yaa po i Diani mo yedi lede? Li yedi: “Abalahama den daani U Tienu ke U Tienu den coadi opo la ke li tie teginma.” 4To, yua n soani li tuonli kuli baa baa o panpaani. O kan yaa nua ke o panpaani yeni tie paabu, yi tie pani. 5Ama, yua n ki soani tuona, ki nan daani U Tienu yua n saagi i moamoani ti tuonbiadi daano po, U Tienu baa coadi opo o dandanli yeni ke li tie teginma. 6Yeni moko, Dafidi doagidi yaa pamanli n ye leni U Tienu n coadi yaaba yaa teginma ke laa ŋoadi a tuona po ki yedi: 7Li pamanli ye leni yaaba N baa sugili bi biadima po, Leni U Tienu n piini yaaba yaa tuonbiadi, 8Li pamanli ye leni o Diedo n kan go tiadi Yaa nilo tuonbiadi po. 9Naani laa pamanli baa ye yaaba n kua koanciagu bebe yaa po bi, bi li baa ye yaaba n ki kua moko yaa po? Kelima ti yedi moala na: “Abalahama den daani U Tienu, ke wani U Tienu den coadi opo la ke li tie teginma.” 10Abalahama den tie lede U Tienu n den coadi opo la yaa yogunu? O den kua ku koanciagu bi? Bi o daa den kua? O daa den kua. 11O den baa ku koanciagu ke lan tua mi maalima ke o baa li moamoansaali kelima o dandanli yaa po wan da den tie jifolo yaa yogunu. Lanwani Abalahama tie yaaba n daani kuli yaa baa, baa ke bi tie jifola ke U Tienu n coadi bani moko yaa po bi teginma. 12O go tie a junga moko yaa baa, bani yaaba n ki sedi leni ku koanciagu bebe ka, ama bi moko ŋua Abalahama dandanli fuuli hali ke o daa kua ku koanciagu. 13Li naa tie kelima li balimaama kubima yaa po ka ke U Tienu den niani Abalahama leni o buolu kuli ke o baa teni ban diedi ŋanduna. Ama li tie wan den baa yaa moamoansaali kelima li dandanli yaa po. 14Li yaa tie kelima li balimaama kubili yaa po yo ke bi tua bi faajieba, lanwani li dandanli tie fanma fanma, U Tienu ñoanianu moko naa pia mayuli. 15Kelima U Tienu balimaama baa cuani U Tienu pabienli cuonu. Li balimaama yaa ye, li balimaama miidima moko ki ye. 16Lanwani yaaba n baa baa U Tienu n den niani yaa ñoanianu baa baa u kelima li dandanli yaa po, kelima U Tienu bua ban baa u ñoanianu kelima o ŋanbili-paabu po bebe. O bili ke o ñoanianu baa ye Abalahama puoliŋuani kuli po. Laa tie yaaba n pia li balimaama bebe yaa po ka, ama yaaba n daani U Tienu nani Abalahama n den daani maama. Wani Abalahama tie tikuli yaaja. Nani lan diani maama: 17“N teni ke a tua nibuoli boncianla baa.” U Tienu, Abalahama n den daani yua yeni, nua wani Abalahama yua n tie tikuli baa, wani U Tienu yua n teni ke bi tinkpiba go ye ki fo, ki go teni ke yaa bonla n ki ye n tua yaala n ye. 18Abalahama den daani U Tienu ki pia mi suginma baa ke o suginma naa go den pia man baa fidi ki sedi naani. Lani yaa po o den tua i nibuoli boncianla baa nani U Tienu n den maadi o maama ki yedi: “A puoliŋuani baa yaba yeni.” 19Abalahama den bua ki pundi bina kobiga, ama o dandanli ki den tadigi baa ke o laa ke o gbanandi tie nani ti kpe yeni, ke Sala mo pendi ti madi. 20Baa yeni, o yama ki den lengidi ke o luo li dandanli U Tienu po ki nua ke o kan kuani wan den niani yaa ñoanianu. Ama o dandanli den paagi o ke o kpiagi U Tienu. 21O den daani ki go bani cain ke U Tienu n niani yaala, o go pia li fidu ki baa kuani o ñoanianu. 22Kelima lani yaa po U Tienu den coadi la opo ke li tie teginma. 23Laa tie Abalahama bebe yaa po ka ke li diani: “U Tienu den coadi opo la.” 24Ama li diani tinba yaa po moko, U Tienu n baa coadi yaaba yaa po ke li tie teginma, tinba yaaba n daani U Tienu, wani yua n den fiini ti Diedo Jesu bi tinkpiba siiga. 25Bi den cuo o kelima ti yaa tagili po ke o go fii bi tinkpiba siiga ke tin baa li moamoansaali.

will be added

X\