LOMA YAABA 3

1Lanwani, Jufinba pia be ke li teni ke bi cie yaa ni buoli n sieni? Bi koanciagu mo pia bee fuome? 2Lankuli pia mayuli boncianla li bonla kuli po. Li bonkpiala tie ke U Tienu den piani bani yo o maama. 3Baa bi siiga bi tianba yaa den tie dugikaaba, naani li baa teni ke U Tienu kaa tie dugika ki kan tieni wan den niani yaala bi? 4Lani ki ye. Tiladi U Tienu tie moamoandaano, baa nilo kuli yaa tie tuofaadaano, nani lan diani maama: “Li tie tiladi ban bandi Ke a tiegi a maama nni, A yaa buni leni bi niba mo, A baa paadi.” 5Lanwani, li yaa tie ke tin tieni yaa biadima teni ke U Tienu teginma doagidi, ti baa yedi lede? Naani U Tienu ki tiegi o pali yaa beni kelima ti biadima yeni po bi? Min maadi yeni, n maadi nani bi nisaaliba n nua maama. 6Yeni ka. U Tienu yaa tiegi, o baa ga lede ki jia ti buudi leni ŋanduna? 7Li yaa tie ke mini yaa faama teni ke U Tienu moamoani doagidi ki tie o kpiagidi po, be yaa po ke o baa bu ki cuo nni nani n tie ti tuonbiadi daano yeni? 8Bi nitianba tabi ki tua ke ti yieni: “Tin yaa tiendi yaala n bia kelima li baa teni yaala n ŋani n yuandi ki cua.” U Tienu baa cuo ba lipo nani lan pundi maama. 9Lanwani ti baa yedi lede? Naani tinba Jufinba tie nimoanba ki cie nibuotoe bi? Baa waamu. Kelima ti maadi ki doagidi ke bi niba kuli, Jufinba leni bi nilanba kuli tie ti tuonbiadi n die yaaba. 10Nani lan diani maama: “Oba kuli ki tiegi, baa niyendo, 11O yanfodaano naa ye, Niloba ki lingi U Tienu. Bikuli yaadi, Bikuli biidi bi yula. 12Yua n tiendi yaala n ŋani naa ye, Baa niyendo. 13Bi niabonma kuli tie nani yaa kuli n yaa yeni Bi landi gbie leni i boandi. Yaa maama n ña bi ñoacuuna nni bia Nani o duduun loabidi yeni. 14Bi ñoana gbie leni ti solindi leni ki nanga. 15Bi taana jaligi mi soama wulima po. 16Ban tagini naankani kuli, Bi ŋa diegbendi leni falabiado. 17Baa bani mi yanduanma sanu. 18Baa diidi U Tienu leni li fangili.” 19To, ti bani ke U Tienu balimaama n bili yaala kuli tie li balimaama n die yaaba po, ki baa teni nilo kuli ñoabu n mubini, bi niba kuli n tuo ke bi pia i tagili U Tienu nintuali. 20Kelima niloba kuli kan baa li moamoansaali U Tienu kani kelima o tiendi li balimaama n yedi yaala. Kelima li balimaama n teni ke o nilo bandi ti tuonbiadi. 21Moala po, U Tienu n saa i moamoani maama ke bi nisaaliba tiegi doagidi, ke li naa ŋoadi li balimaama kubima. Li balimaama leni bi sawalipuaba kuli tieni lipo siedi. 22U Tienu saagi i moamoani bi niba po ke bi tiegi kelima li dandanli Jesu Kilisiti nni yaa po, bani yaaba n tuo ki daani kuli yaa po. Mi gagidima ki ye bi niba siiga, 23kelima bikuli tieni ti tuonbiadi ki poadi U Tienu kpiagidi. 24Ama kelima U Tienu ŋanbili-paabu yaa po, bi baa li moamoansaali kelima Jesu Kilisiti daafaabima yaa po. 25U Tienu den tuodi ki bili ke wani Jesu baa tua i candanbaani padili yaaba n pia li dandanli o soama po kuli yaa po. U Tienu tieni yeni ke wan fidi ki doagidi o teginma, kelima o den juuni leni bi niba n den tieni yaa tuonbiadi u yogunkpelu kaa cuo ba tipo. 26O den bua ki doagidi o teginma moala po, ke bi niba n bandi ke o tiegi ki go tie yua n puuni li moamoansaali yua n daani Jesu kuli. 27Lanwani o nisaalo baa kpiagi o yuli kelima be yaa po? Waa go pia li sanu. Mi laa balimaama po? A tuona po bi? A-a, ama li dandanli yaa po. 28Kelima ti sua ke o nilo baa baa li moamoansaali kelima li dandanli yaa po, ke laa tie li balimaama kubima yaa po. 29U Tienu tie U Tienu Jufinba bebe po bi? Naani waa tie U Tienu bi nilanba moko yaa po? O tie U Tienu bi nilanba moko po saa. 30Kelima Tienyendu bebe n ye, yua n baa saa i moamoani yaaba n kua ku koanciagu po kelima bi dandanli po, ki go saa yaaba n tie jifola po moamoani kelima bi moko yaa dandanli yaa po. 31Naani tin wangi li dandanli maama yeni, li bua ki yedi ke ti teni ke U Tienu balimaama ki go pia mayuli bi? Kalam, ti doagidi li balimaama n pia yaa mayuli moamoani.

will be added

X\