LOMA YAABA 16

1N bua ki waani yi ke ti kpiilo Febe, Kilisiti n yini yaaba Sankile dogu nni todika, tie yin baa fidi ki dugi yua yaa po. 2Yin ga o cangu o Diedo nni nani lan pundi bi nigagidiŋanba n yaa tiendi maama, ki todi o leni wan baa bua yi todima yaa bonla nni kuli, kelima wani oba todi niba boncianla leni mini moko. 3Yin fuondi mani Pilisila leni Akilasa, yaaba n tie n tuonsoanlieba Jesu Kilisiti tuonli nni. 4Bi den luni bi yula ki ga n miali. Laa tie mini bebe n tuondi ba lipo, Kilisiti n yini yaaba nitaana bi nilanba siiga kuli tuondi ba lipo. 5Yin fuondi Kilisiti n yini yaaba yaaba n taagi bi yaa diegu nni moko. Yin fuondi mani n buado Epayineta, yua n den kpa daani Jesu Asi diema nni, ki tie wani Kilisiti bonluonka-kpiala likani. 6Yin fuondi mani Maliyama yua n den soani ki todi yi boncianla. 7Yin fuondi mani n kpiiba Andonikusa leni Juniasa, mini leni yaaba n den taani ki ye li kpaadidieli nni. Jesu tondiba siiga bi tie ban jigindi yaaba boncianla. Bi den daani Kilisiti hali ke mini daa daani o. 8Yin fuondi mani Anpiliatusa wani yua n tie n buado o Diedo nni. 9Yin fuondi mani Ulibana, ti tuonsoanlielo Kilisiti nni, leni n buado Sitakisa. 10Yin fuondi mani Apelesa wani yua n doagidi ke o se Kilisiti nni ke li pa. Yin fuondi mani Alisitobula denpo yaaba. 11Yin fuondi mani n kpiilo Elodiono. Yin fuondi mani Nasisa denpo yaaba yaaba n tie o Diedo yaaba. 12Yin fuondi mani Tilifena leni Tilifosa, yaa puoba n tuuni o Diedo tuonli boncianla. Yin fuondi mani Pesida ti danlimoano, yua n soani O Diedo tuonli hali boncianla. 13Yin fuondi mani Lufusa o Diedo n gandi yua, leni o naa yua n tie n moko yaa naa. 14Yin fuondi mani Asinkilita, Filego, Emesa, Patilobasa, Emasa leni ti kpiiba yaaba n ye leni ba. 15Yin fuondi mani Filologa leni Julia, leni Nele leni o naataanpuoga Olinpa leni yaa nigagidiŋanba n ye leni ba kuli. 16Yin fuondi mani yiyaba ki gobini yiyaba leni mi buamoanma. Kilisiti n yini yaaba nitaana kuli fuondi yi. 17N kpiiba, n tundi yi ke yin fangi mani yi yula leni yaaba n fiindi mi paadima ki go tie tingbali bonla yi siiga, ki naa ŋua yin den baa yaa bangima. Yin foagidi mani leni ba. 18Kelima laa nibuolu naa tuuni ti Diedo Kilisiti po ka, bi tuuni bi tugiceli po yo. Bi maadi mi madingima leni mi mamanma ki boandi yaaba n ki fani. 19Ama yinba wani bi niba kuli bandi yi tuoma. Lani yaa po n mangi n pali yipo. N bua yin yaa fani yaala n ŋani tienma po, ki da pia tagiliba kuli yaala n bia yaa tienma nni. 20Li kan waagi ke mi yanduanma Tienu baa paadi Sutaani ki madi o yi taana tiipo. Ti Diedo Jesu yaa ŋanbili n yaa ye leni yi. 21N tuonsoanlielo Timote fuondi yi. N kpiiba Lusiyusa, Jasono leni Sosipateli moko fuondi yi. 22Mini Tetiyusa yua n diani li naa tili o Diedo nni, n mo fuondi yi. 23Min cani yua, Gayusa, Kilisiti n yini yaaba n taagi yua yaa diegu nni, fuondi yi. Elasita, yua n kubi u naa dogu ligi tuonli, fuondi yi, wani leni ti kpiilo Kalitusa kuli. [ 24Ti Diedo Jesu Kilisiti ŋanbili n yaa ye leni yikuli. Amina!] 25Tin yaa kpiagidi mani U Tienu, Wani yua n baa fidi ki teni yin yaa se Ke li pa o sanŋoadima nni Nani min wangi yaa Laabaaliŋamo Ki maadi Jesu Kilisiti maama n yedi maama. N wangi o nani U Tienu bondoaginkaala, Yaala n den duagi ŋasiili nni hali yogu, N doagidi maama moala. 26U Tienu yua n ye yogunu kuli Ñani o ñoabonli Ki yedi ke o bondoaginkaala N doagidi i nibuoli kuli po Kelima o sawalipuaba n diani yaa tila yaa po. U Tienu tieni yeni ki bua Ke i nibuoli kuli n tuo li dandanli. 27Tin yaa kpiagidi U Tienu, Wani yua bebe n pia mi yanfuoma kuli, Kelima Jesu Kilisiti po. Tin yaa kpiagidi o hali yaa yogu n tu yaa yogu. Amina!

will be added

X\