LOMA YAABA 12

1Lani yaa po n kpiiba, n mia yi ki go tundi yi kelima U Tienu niñingbadima yaa po, ke yin pa U Tienu yi yula nani yaa padili n fo, yaali n gagidi ki mani opo. Lani n tie lan pundi yin yaa kpiagidi o maama. 2Da taa mani leni ŋanduna na niinni yaaba, ama yi yantiana pandima n teni yin lebidi ke yin fidi ki gagidi ki bandi U Tienu yanbuama, lani n tie yaala n ŋani, ki mani opo, ki go dagidi cain. 3Kelima min baa yaa ŋanbili-paabu yaa po, n yedi yikuli yendo yendo, yin da nua yi yula ke yi cie yin tie maama. Yin yaa pia li yumiinli ki cuo ki dagini nani U Tienu n biigi ki puni yua kuli li dandanli yaa banlu. 4Kelima nani tin pia i gbananbuoli ke i yaba gbananyendi nni maama, ke i gbananbuoli yeni ki taata tuona, 5li go tie yeni leni tinba yaaba n ye Kilisiti nni. Baa ke ti yaba, tikuli tie gbananyendi ki tuugi leni tiyaba nani i gbananbuoli n tuugi leni iyi maama. 6Ama tin pia yaa paabu ki taata, nani U Tienu n puni yua kuli li ŋanbili maama. Lanwani yua n pia sawali maama paabu, wan yaa wangi ma ke li ŋua leni li dandanli. 7Yua n pia o lieba todima paabu mo, wan yaa todi leni yantiayenli. Yua n pia mi bangima yaa paabu mo, wan yaa bangi ma. 8Yua mo n pia ki yaa paagidi o lieba pala yaa paabu, wan yaa paagidi bi pala. Yua n pia ki yaa puuni yaaba n luo bu paabu mo, wan yaa puuni ba leni ti bulicindi. Yua n baa mi gobidima yaa paabu mo, wan yaa gobidi leni li yankuali. Yua mo n baa mi niñingbadima yaa paabu, wan yaa pia li pamanli lipo. 9Yin da bua yi lieba mo leni pala lie. Yin yaa nani mani yaala n bia, ki yaa kubi yaala n ŋani ke li pa. 10Yin yaa bua mani yi yaba nani yaaba n kpi yeni. Yaa jigindi mani yiyaba. 11Yaa tuuni mani leni li yankuali ki da pia i kpadije, yi pala n yaa tuoni yi tuonli po kelima yi tuuni o Diedo po. 12Yin yaa mangidi yi pala yi suginma nni. Yin yaa pia li juunli fala nni. Yin yaa jaandi mani ki da cedi. 13Yin yaa todi mani bi nigagidiŋanba leni ban luo yaala, ki gaani bi canba cangu bonŋanla. 14Yaa gaaliti mani yaaba n wangi yi fala. Yeni de, gaali ba mani ki da soli ba. 15Yin mangi mani yi pala leni yaaba n pia li pamanli, ki go buudi leni yaaba n buudi. 16Yin yaa pia mani yantiayenli leni yiyaba. Yin da bua ki yaa tie niciama. Yin da fiini yi yula, ama yin cedi li yumiinli n diedi yi. Da nua mani yi yula ke yi tie yanfodanba. 17Yin da guani oba mi biadima kelima wan tieni yi yaa biadima po. Yaa lingi mani yaala n ŋani bi niba kuli nintuali. 18Yin moandi mani yin fidi maama kuli ke li yaa ŋua yinba, yin yaa ye leni mi yanduanma leni bi niba kuli. 19N buakaaba, da tu mani i biadi panpaani yi yula po. Ama yin cedi mani U Tienu pabienli daali n cua, kelima li diani: “Mini n tie o pantuulo, mini n baa tu i biadi panpaani,” 20ki go yedi: “Mi koma yaa gbadi a yibali, Ŋan pa o wan je, U ñunñuunu yaa gbadi o, Ŋan pa o wan ño. Kelima a yaa tieni yeni, A dogini o yuli po a mukuanmoana.” 21Ŋan da tuo ke mi biadima n paadi a, ama ŋan paadi mi biadima kelima mi ŋanma tienma po.

will be added

X\