DOAGIDIMA 9

1O maleki-muulo den piebi o kakaci. N den laa ke li ŋmabili ñani tanpoli po ki baa ki tinga po. Bi den puni li u kulu falu yaa sendabiga. 2Li ŋmabili yeni den luodi u kulu yeni ke i muñii ñani lienni nani yaa buaga n yaba yaa muñii yeni. U yienu leni mi fawaama kuli den biigi kelima yaa muñii n ñani u falu nni yeni po. 3I naaci den ñani i muñii nni, ki yadi ki tinga nni. Bi den puni i naaci yeni u paalu nani ki tinga nni yaa nami yeni. 4Bi den yie ipo ke yin da sii ti muadi leni ti kpinfaadi leni tibuba kuli, kali yaa niba n kaa pia U Tienu maalima bi yutuna po. 5Baa den puni i naaci yeni u sanu yin kpa ba, ama yin yaa wangi ba fala bebe hali ŋmaali muu. Yin den tieni yaa funfunma den tie nani o namo n juni yua n laadi yaa funfunma yeni. 6A dana yeni niinni bi niba baa lingi mi kuuma ki nan kan le ma, bi baa bua ki kpe, ama mi kuuma baa sani ki foagidi leni ba. 7I naaci yeni den tie nani ban bobini yaa taami bu toabu po yeni. Li den tie nani i yili wula badifogilimu yeni, i nunmu den tie nani bi niba nunmu yeni, 8i yudi den tie nani bi puoba yaa yudi yeni, i ñina mo den tie nani i yangbanli yaa ñina yeni, 9i bena den tie nani i laa a kuliada yeni, i fiabi fuugu den tie nani i taami boncianla n dia ti toateliti ki tiini ki caa bu toabu po yeni. 10I den pia a juona leni li bonjunkaala nani i nami yeni. I paalu yu n baa fidi ki yaa faligidi bi niba hali ŋmaali muu den ye i juona nni. 11I bado n tie u kulu yaa maleki. Ebilu maama nni bi yi o Abadona, Gileka maama nni bi yi o Apoliyo, lani n tie o bolindo. 12O falakpialo pendi, fala lie mo sieni ki da baa tieni. 13O maleki-luobilo den piebi o kakaci. N den gbadi ke u nialu maadi wula padibinbinli yinnaada, yaali n se U Tienu nintuali. 14U den yedi o maleki-luobilo, yua n kubi kakaci yeni: «Ŋan loti ban den loli yaa maleki-naadiba u kpenciamu Yufilata kani.” 15Li sua ke bi den bogini laa malekinba ke bi se ki gu hali li yogunu leni li daali leni li ŋmaalo leni li binli n baa pundi, ke bi loti ba ban kpa bi niba nni niba taa kuli siiga niyendo. 16Bi tandanba yaaba n den tie jakoanda coali den tie tuda piiga hali taalima tuda piilie (200,000,000). N den gbadi bi coali yeni. 17N bonlekaala nni n den laa i taami leni yaaba n jagi ba. Bi den laa yaa kuliada n moani nani mi fantama yeni, ki go boani nani mi siema, ki go duudi nani li cidibili yeni. Bi taami yula den tie nani a yangbanyula yeni. U mupienu leni i muñii leni li cidibili den ña bi ñoana nni. 18Laa falataadiba, lan tie mi fantama i muñii leni li cidibili yaala n den ña i taami ñoana nni yeni den ku niba taa siiga kuli niyendo. 19Kelima i taami yeni paalu den ye bi ñoana nni leni bi juona nni. Bi juona den tie nani i we yeni, ki pia a yula ban baa wangi bi niba fala leni ya. 20O falabiado yeni n kaa den ku yaaba, baa den lebidi bi yama leni bi nii n tagi yaala. Baa den cedi kaa go kpiagidi mu cicibiadimu, i buli, yaala n tie wula, yaa ka ŋanjilifa, yaa ka ti kumoandi, yaa ka a tana, yaa ka ti daadi, yaala n kaa nua, kaa gba, kaa cuoni mo. 21Baa den lebidi bi yama yaala n tie mi kukpama po, leni bi ñoagibiadi, leni bi conconma, leni bi subu.

will be added

X\