DOAGIDIMA 6

1Lani, n den laa ke ki Pebiga den tabidi maalima bontabinkaala lele yeni siiga yenma yaa yogunu. N den gbadi ke a bonfuodinaada siiga yendo maadi ke o nialu tie nani i tatantani yeni ki yedi: «Cua na.” 2N den diidi ki laa ke o tanpieno. Yua n jagi o den kubi li dabanli. Bi den puni o ki badifogiliga, ke o ñani likani ki tie jakoando ki baa paadi. 3Ki Pebiga n go den tabidi maalima bontabinkaala lie, n den gbadi ke o bonfuodilielo yedi: «Cua na.” 4Lanwani tantoa den ñani ki moani. Bi den puni yua n jagi o u paalu ke wan teni mi yanduanma n gbeni bi niba siiga ki tinga nni, bi niba n yaa ku biyaba. Bi go den teni o ki jugisiecianga. 5Ki Pebiga n den tabidi maalima bontabinkaala taa yaa yogunu, n den gbadi ke o bonfuoditaalo yedi: «Cua na.” N go den diidi ki laa o tanboano. Yua n jagi o den kubi u kpiagu bonbiigikaala. 6N den gbadi u nialu a bonfuodinaada siiga ke u yedi: «Ŋalikama kilo yendo baa tie dayenli tuonli yaa panpaani. Olije mo kilo bonba taa baa tie dayenli tuonli yaa panpaani. Ŋan da biidi mi kpama leni duven.” 7Ki Pebiga n den tabidi maalima bontabinkaala naa yaa yogunu, n den gbadi o bonfuodinaalo nialu ke o yedi: «Cua na.” 8N den diidi ki laa yaa taamo n bua ki yaa tie suudi yeni. Yua n den jagi o yeli yi mi Kuuma, ke bi tinkpiba diema den ye o puoli. Bi den puni ba u paalu ki tinga kaannaadi kuli siiga kaanyendu, ban kpa likani yaaba leni ki jugisiega leni mi koncianma leni u yianbiadipuodiko leni ki tinga fuayanbiaditi. 9Ki Pebiga n den tabidi maalima bontabinkaala muu yaa yogunu, n den laa ban den kodi yaa niba yaa naani li padibinbinli tiipo. Bi den ku ba kelima U Tienu maama leni ban den tieni yaa siedi kaa cedi yaa po. 10Bi den kpaani ki tua: «Canbaa yua n gagidi ki ŋani ki tie moamoandaano, hali u laa yogunu ke a go baa waagi ki daa jia ti buudi leni ki tinga niba nni, ki guani ba bi panpaani ti yaa soama po?” 11Bi den puni bi siiga yua kuli li liadipiencianli, ki waani ba ban da juuni waamu ki pugini, hali bi naacenlieba, bi kpiiba, ban baa kpa yaaba nani bani yeni, n pundi lan bili yaa coali bianu. 12N den laa ki Pebiga n tabidi maalima bontabinkaala luoba yaa yogunu. Diidi, mi tindigibicianma den tieni. U yienu den boandi nani li cabiboanli yeni, o ŋmaalo den moandi nani mi soama yeni, 13A ŋmabila den baa ki tinga po nani ku faaciangu n figi bu kankanbu ke a kankankaana suodi maama yeni. 14Tanpoli den fuadi nani ban yen gbabi li tigbabikaali maama yeni. A juana kuli leni a kpendega kuli den ñani bi kaani ki fuadi. 15Ki tinga nni badiba, a nikpiaga, a minteela yudanba, a piada, bi paatieba, i yonbi leni yaaba n die bi yula kuli den sani ki wuoni ti tanlondi nni leni a juana tanciama nni. 16Bi den miadi a juana leni a tanciama ki tua: «Baa mani tipo ki wuoni ti yua n ka li bali kalikaanu po leni ki Pebiga pabienli po. 17Kelima bi pabienli dacianli pundi. Ŋme n baa fidi ki yaa ye?”

will be added

X\