DOAGIDIMA 3

1Ŋan diani Kilisiti n yini yaaba Salida po yaa maleki po ki yedi o: «Yua n pia U Tienu fuoma yaaba lele leni a ŋmabileleeda yedi yaala n tie na: ‹N bani a tuona. A yeli ñani ke a fo, ama a kpe. 2Ŋan yaa gu bonŋanla, ki paagi yaala n sieni ki bua ki kpe, kelima n sua ke a tuona naa ŋani ki dagidi cain n Tienu po. 3Ŋan tiadi ŋan den baa ki go gbadi yaa bangima, ki kubi ma, ki lebidi a yama. A yaa gu bonŋanla, n baa cua a kani nani li conconli yeni, a kan bandi min baa cua ki ludi a yaa yogunu. 4Baa yeni a pia bi niba waamu Salida, yaaba n kaa joagini bi tiadi. Bi baa yie ti tiapiendi ki yegi leni nni, kelima bi pundi ki baa la. 5Yua n koani mi jama ki paadi, bi baa yieni o ti tiapiendi. N kan duuni ki ñani o yeli li miali tili nni, ama n baa tuo ke n bani n Baa leni o malekinba nintuali. 6Yua n pia a tuba, wan cengi mi Fuoma n tua Kilisiti n yini yaaba nitaana yaala.› “ 7Ŋan diani Kilisiti n yini yaaba Filadelifi po yaa maleki po ki yedi o: «Yua n Gagidi ki Ŋani, Ki tie o Moamoandaano, Wani yua n kubi Dafidi sendabiga, O yaa luodi, oba kuli kan luoni, O yaa luoni mo, oba kuli kan luodi, Wani n yedi yaa maama n tie na: 8N bani a tuona. Diidi, n luodi ki yaani apo bu buliñoabu, niloba n kan luoni yaabu kelima a pia u paalu waamu bebe. Ama baa yeni, a kubi n maama ki naa nia n yeli. 9Diidi, yaaba n tie Sutaani nitaanli yaaba, ki pua faama ke bi tie Jufinba ki naa tie yeni, n baa teni ban cua ki gbaani a nintuali ki bandi ke n bua ŋa. 10Nani ŋan den pia li juunli ki go kubi n maama yeni, n moko baa kubi a mi biigima yogunu, yaama n baa ti cua ŋanduna niba kuli po. 11N baa cua, li kan waagi. Ŋan yaa kubi ŋan pia yaala kankani ke oba kuli n da fie a badifogiliga. 12Yua n koani mi jama ki paadi kuli, n baa teni wan tua benjielu n Tienu diegu nni, ki kan go ña lienni. N go baa diani opo n Tienu yeli leni n Tienu dogu yeli, lani n tie Jelusalema-paano, yu n baa ña tanpoli po n Tienu kani ki jiidi. N go baa diani opo n yepanli. 13Yua n pia a tuba, wan cengi mi Fuoma n tua Kilisiti n yini n yaaba nitaana yaala.” 14Ŋan diani Kilisiti n yini yaaba Layodise po yaa maleki po ki yedi o: «Diidi yua n tie Amina, wani o siedi-dugika leni o moamoandaano yua n tie U Tienu tagima kuli cilika, wani n yedi yaala n tie na: 15‹N bani a tuona. Ŋaa soangi, ŋaa tuoni mo. Li baa cie apo a yaa bi soangi, bi a yaa bi tuoni. 16Yeni yaa po nani ŋan tie yaala n baligi, kaa tuoni, kaa soangi mo yeni, n baa sii ŋa ki ñani a n ñoabu nni.› 17Kelima a tua: ‹N tie piado ki pia ke li dagidi ki naa luo pu.› Ama ŋaa bani ke a tie fala daano, niñinnilo, luodo, juamo, ki go ye mubili. 18Lani yaa po n tundi a ke ŋan da n kani ban ŋanbi yaa wula u maafanu nni ke ŋan tua piado, ki go da n kani ti tiapiendi ki yaa yie ban da go le a mubima fe, ki go da n kani u nunñoagu ki duo a nuni ki yaa nua. 19Mini, n fu ki go tundi min bua yaaba leni tundifala. Lanwani ŋan go baa li yankuali ki pugini, ki lebidi a yama. 20Diidi, n se bu buliñoabu kani ki tua: Gafala! O nilo yaa gbadi n nialu ki luodi npo bu buliñoabu kuli, n baa kua o deni ki je leni o, o mo n je leni nni. 21Yua n koani mi jama ki paadi, n baa teni wan yaa ka leni nni n bali kalikaanu po, nani mini nba n den koani mi jama ki paadi, ki ka leni n Baa o bali kalikaanu po maama yeni. 22Yua n pia a tuba, wan cengi mi Fuoma n tua Kilisiti n yini yaaba nitaana yaala.”

will be added

X\