DOAGIDIMA 21

1N den laa o tanpopaano leni ki tinpanga, kelima o tanpokpialo leni ki tinkpiaga kuli den bodi, mi ñincianma moko ki go den ye. 2N den laa u dogagidiŋamu, Jelusalema-paano, ke u ñani U Tienu kani tanpoli po ki ji. U den bogidi uba, ki bobi nani o pocaano n baa tieni o calo po maama. 3N den gbadi u nialiciamu ke u maadi u bali kalikaanu kani ki yedi: «Diidi ki le, moala U Tienu yekaanu ye bi nisaaliba siiga. O baa ye leni ba, bi baa tie o nibuolu, wani U Tienu oba baa ye leni ba ki tie bi Tienu. 4O baa duuni ki ñani ti ninsiidi kuli bi nuni nni. Mi kuuma kan go yaa ye, li paboanli, leni a bubula, leni mi funfunma moko kan go yaa ye, kelima li bonkpiala pendi.” 5Yua n den ka u bali kalikaanu po den yedi: «Diidi ki le, n teni ke li bonla kuli kpandi bonpanla.” O go den yedi: «Ŋan diani laa maama kelima mi tie moamoani ki go tie madugikaama.” 6O go den yedi nni: «Li gbeni. N tie Alifa leni Omega, mi cilima leni mi juodima. U ñunñuunu n pia yua kuli, n baa pa o wan ño li miali ñinbunli kani ki kan pa liba kuli. 7Yua n koani mi jama ki paadi baa baa laa sela kuli, n baa tie o Tienu, o mo baa tie n biga. 8Ama bi jawaandanba, leni yaaba n ki daani leni ti cagindi danba, leni bi nikpaba, leni mi conconma buoli kuli danba, leni u ñoagubiadu danba, leni i buli danba, leni yaaba n pua mi faama kuli, bikuli yekaanu baa tie mi fantama leni li cidibili n co yaa kpenu nni. Lani n tie mi kuliedima.” 9Lani yaa maleki-leleediba n den kubi yaa tadibuo-leleedimu n gbie leni i falabiadi-leleedi-juodike siiga nni yendo den cua n kani ki maadi leni nni, ki yedi: «Cua na, n baa waani a o pocaano, yua n tie ki Pebiga pua.” 10U Tienu Fuoma den cuo nni, ke maleki den gedini nni yaa joacianli n kpedi yuli po. O den waani nni u dogagidiŋamu Jelusalema, ke u ñani U Tienu kani tanpoli po ki ji. 11U den pia U Tienu kpiagidi, ki ñuliti nani jasipe tanli yaali yaa dunga n pa ki tie nani mi tanpenpelinma yeni. 12U bilinciamu den pia, ki go kpedi, ki lindi ki cebini u. U den pia piiga n buliñoajala lie, ke piiga n malekinba lie se a buliñoajala yeni kani. Isalele piiga n buoliedi yela den taabi a buliñoajala yeni po. 13Puoli po pia buliñoajala taa, jienu po buliñoajala taa, ganu po buliñoajala taa, nintuali po mo buliñoajala taa. 14U dogu bilinciamu yeni den pia piiga n tanpuuna lie, ke ki Pebiga piiga n tondiliediba yela taabi apo. 15Yaa maleki n den maadi leni nni yeni den kubi wula bonbiigikaala yaala n tie nani li kankagili yeni, ki baa biigi u dogu leni u buliñoajala leni u bilinciamu. 16U dogu yeni kaannaadi den da. U foagimu leni u pianu kuli den da. Maleki den biigi u leni li bonbiigikaala, ki sua ke u foagimu tie piiga n tudalie, ke u pianu leni u kpedima kuli da yeni. 17O den biigi u bilinciamu ki sua ke u piano tie kobiga n piinaa n nukpanduna naa. Maleki den biigi nani bi nisaaliba n bigidi maama yeni. 18U bilinciamu yeni den ma leni jasipe tana, ke u dogu uba mo ma leni yaa wula n ŋani cain ki tie nani ki maduubiga yeni. 19Bi den tieni u dogu bilinciamu tanpuuna yaa tana n pia mayuli boncianla. Bi den tieni li tanpuukpiali jasipe, li tanpuulieli safila, li tanpuutaali kaliseduana, li tanpuunaali emeloda, 20li tanpuumuuli sadonisa, li tanpuuluobili saliduana, li tanpuuleleeli kisolita, li tanpuuniili belila, li tanpuuyiali topasi, ki tanpuupiiga kisopasa, li piiga n tanpuuyenli iyasinta, li piiga n tanpuulieli ametisi. 21A piiga n buliñoajalieda den tie piiga n pelinba lie, buliñoajabu kuli den ma leni peli yendo bebe. U dogu yeni fanma den tie yaa wula n ŋani ki tie nani ki maduubiga yeni. 22Mii den laa U Tienu diegu lienni kelima wani o Diedo U Tienu u Paaciamu Kuli Daano, leni ki Pebiga tie u kaangagidiŋamu. 23U dogu yeni kaa bua yienu, u kaa bua ŋmaalo, kelima U Tienu kpiagidi baa yendi u, ki Pebiga moko tie u fidisanga. 24I nibuoli kuli baa cuoni u yenma nni, ki tinga badicianba baa kpendinni upo bi kpiagidi. 25U dogu yeni buliñoajala baa yaa yogunu kuli ki kan yaa luondi, kelima ku ñiagu kan yaa ye. 26Bi baa kpendinni u niinni i nibuoli kpiagidi leni i jigidi. 27Joagindi baa kuli kan baa ki kua u niinni. Yua n tiendi ti cagindi leni yua n pua mi faama kan kua u niinni, kali yaaba yaa yela n diani ki Pebiga tili nni, li miali tili nni yeni, bani bebe n baa baa ki kua u niinni.

will be added

X\