1 N den laa maleki ke o ñani tanpoli po ki ji, ki pia u kulu yaa sendabiga, ki muubi ti kpaaciandi o nuu nni. 2 O den cuo o bonfuodibiado, o waakpelo yeni, lani n tie, ku tuotabigu yudaano Sutaani, ki loli o hali bina tudili po. 3 O den luni o u kulu yeni niinni ki luoni u buliñoabu ki tabini mi maalima ke wan da go boandi i nibuoli hali bina tudili yeni n baa pendi. Lan yaa pendi, tiladi bi go baa loti o u yogunu waamu po. 4 N den laa i bali kalikaani, ke yaaba n ka ipo den baa li bali ki baa jia ti buudi. N go den laa ban jendi yaaba yaa yula yaa naani kelima Jesu yaa siedi po leni U Tienu Maama po, leni yaaba n kaa den gbaani ki kpiagi ki fuayanga leni ki nannanli, kaa ga o maalima bi yutuna yaaka bi nii po. Bi den goa ki baa li miali ki die leni Kilisiti hali bina tudili. 5 Line n tie bi tinkpiba fiikpiama. Yaa tinkpiba n sieni wani ki den fii hali bina tudili yeni n baa pendi. 6 Li pamanli ye leni yaa nigagidiŋanba n fii bi tinkpiba fiikpiama nni. Mi kuliedima naa pia paalu bi yaa po, ama bi baa tie U Tienu leni Kilisiti yaa kopadicianba, ki taani ki yaa die leni Kilisiti hali bina tudili. 7 Bina tudili yeni yaa pendi, bi baa loti Sutaani wan ña o kpaadidieli nni. 8 O baa ña ki boandi i nibuoli, yi n ye hali ki tinga kaannaadi kuli, lani n tie Gogi leni Magogi, ke wan fidi ki taani baa bu toabu po. Bi coali baa tie nani mi ñincianma tanbiima yeni. 9 Bi den ñani ki tinga nni kuli ki cua ki baa U Tienu n bua yaa dogu, ki lindi ki cebini bi nigagidiŋanba toanagili leni o dobuadu. Ama mi fantama den ñani tanpoli po ki buoni ba. 10 Bi den luni ku tuotabigu yudaano yua n den boandi ba, u fantankpenu nni, li cidibili n co mi fantama naani, ki fuayanga leni o sawalipua-faadaano n ye naankani, ke bikuli baa ye leni mi funfunma u yensiinu leni ku ñiagu kuli hali yaa yogunu kuli. 11 Lani n den laa u bali kalikaanpienciamu leni yua n ka u po. Ki tinga leni tanpoli kuli den sani ki foagidi o kani, ke baa go laa ba. 12 N go den laa bi tinkpiba kuli, bi paatieba leni taliginba kuli, ke bi se u bali kalikaanu nintuali. Bi den gbabidi a tila. Bi go den gbabidi titoali, yaali n tie li miali tili. Bi den jia ti buudi leni bi tinkpiba nani bi bontienkaala n den tie maama, ki ŋua ban den diani bipo yaala a tila yeni niinni. 13 Mi ñincianma den cedi ke yaa tinkpiba n ye mi niinni ñani, mi kuuma leni bi tinkpiba kaanu moko den cedi ke yaa tinkpiba n ye bi niinni ñani. Bi den jia leni yua kuli ti buudi nani o bontienkaala n den tie maama. 14 Bi den luni mi kuuma leni bi tinkpiba kaanu u fantankpenu nni. U fantankpenu yeni tie mi kuliedima. 15 Ban ki den laa yua yaa yeli ke li diani li miali tili nni kuli, bi den luni o u fantankpenu nni.
