DOAGIDIMA 14

1N den diidi ki laa ke ki Pebiga se yaa juali n yi Siyono po, ke kobiga n piinaa n niba tudanaa (144,000) se leni o. Bi den tie yaaba n den pia ki Pebiga yeli leni o Baa yeli bi yutuna po. 2N go den gbadi ku fuugu ke ku ñani tanpoli po ki tie nani a ñingola fuugu leni u tatantanpaalu fuugu, ki go tie nani bi kogidipuaba n pua ki tiendi yaa fuugu yeni. 3Bi den yiini bu yanpanbu u bali kalikaanu nintuali leni a bonfuodinaada leni bi nikpeliba nintuali. Oba kuli ki den fidi ki bandi bu yanpanbu yeni kali bani, i kobiga n piinaadi n tudinaadi ban den da ki faabi yaaba ki tinga nni. 4Bani n tie yaaba n kaa den joagini bi yula leni bi puoba, ki tie nani a powandiana yeni. Bi baa ŋua ki Pebiga wan caa naani kuli. Bi tie wan da yaaba bi niba kuli siiga, ke bi tie nani li bonluonka-kpiala yeni U Tienu po leni ki Pebiga po. 5Faamaba kuli ki den ye bi ñoana nni, baa pia ban baa fidi ki kuli ba leni yaala. 6N go den laa malekitoa ke o yugi tanpoli mi fawaama nni. O den kubi yaa laabaaliŋamo n ye hali yaa yogunu kuli ki baa wangi ki tinga nni yaaba kuli, mi diema, i mabuoli leni i nibuoli yaaba kuli. 7O den kpaani leni u nialu ki tua: «Yin fangi mani U Tienu ki kpiagi o kelima o bujiali yogunu pundi. Yin gbaani ki kpiagi wani yua n den tagi tanpoli, ki tinga, mi ñincianma leni a ñinbuna kuli.” 8Malekitoa, o bonlielo den ŋoadi o ki yedi: «U baa, u dociamu Babilona baa, wuni, yaa dogu n den teni ke i nibuoli kuli ñuni yaa duven n tie u conconbiadima ki gaadi.” 9Malekitoa, o bontaalo den ŋoadi ba ki kpaani: «Yaa nilo n gbaani ki kpiagi ki fuayanga leni o nannanli ki ga o maalima o yutunli yaaka o jienu po, 10o moko baa ño yaa duven n tie U Tienu pabienli cuonu, laa duven ki laa leni liba, ama o kuodi o o pabienli cuonu tadiñokaaga nni. O baa laadi fala mi fantama leni li cidibili nni, bi maleki gagidiŋanba nintuali leni ki Pebiga nintuali. 11Bi funfunma muñii baa do hali yaa yogunu kuli, bi kan baa fuodima u yensiinu leni ku ñiagu kuli, bani yaaba n gbaani ki kpiagi ki fuayanga leni o nannanli ki go ga o yeli maalima.” 12Lani yaa po yo ke li pundi bi nigagidiŋanba n yaa pia li juunli, bani yaaba n tuo ki ŋua U Tienu mabilikaama ki kubi li dandanli Jesu po. 13N den gbadi ke u nialu maadi tanpoli ki yedi: «Diani yaa maama n tie na: ‹Li pamanli ye leni yaaba n kpe leni li dandanli o Diedo nni.› “ U Tienu Fuoma den goa ki yedi: «Yeni de, kelima bi baa fuodi leni bi tuonfala, kelima bi tuonŋama ŋua ba.” 14N den diidi ki laa ku tawapiengu ke yua n naani leni o nisaalo ka lipo. O den yili wula badifogiliga, ki muubi ku moaciemangu o nuu nni. 15Malekitoa den ñani U Tienu diegu nni, ki kpaani ki yedi yua n ka ku tawaligu po yeni: «Taa a moaciegu ki ce, kelima li yogunu pundi, ki tinga kpaandi mo beni.” 16Yua n den ka ku tawaligu po den taa o moaciegu ki ceni ki taani ki tinga kpaandi. 17Malekitoa den ñani U Tienu dieli yaali n ye tanpoli po niinni ki moko muubi ku moaciemangu. 18Malekitoa, yua n die li padibinbinli fantama moko den ñani likani ki kpaani ki yedi yua n muubi ku moaciemangu: «Taa a moaciemangu ki ce ki tinga duven tiidi bonjoana kelima yi beni.” 19Maleki den ceni ki tinga duven tiidi bonjoana, ki kuodi duven ŋanbikaanu nni, lani n tie yaa ŋanbikaanu n pia U Tienu pabienli. 20Bi den ŋmaadi ti bonfiidi duven ŋanbikaanu nni u dogu kunu. Mi soama den ña u kani, ki kpedi ki pundi hali i taami biamu kani. Mi den puubi ki pundi nani dajena kobitaa.

will be added

X\