DOAGIDIMA 13

1Lani n den laa ki fuayanga ke o ña mi ñincianma nni. O den pia yina piiga leni yula lele. O yinpiiga yeni siiga yinli kuli den ciibi ki badifogiliga. Yaa yela n tie sugidi U Tienu po den taabi o yula po. 2Min den laa yaa fuayanga yeni den tie nani o naamunpieno, ama o taana den tie nani yaa fuayanbiadi-cianga n yi ulisi yeni, o ñoabu mo den tie nani o yangbanlo yaabu. O bonfuodibiado den teni ki fuayanga yeni o paalu, ki kaani o o yaa bali kalikaanu po, ki dini o o bacianli. 3N den laa ke ki fuayanga yeni yula siiga nni yuyenli den baa mi poagilima yaama n baa fidi ki kpa o, ama mi poagilima yeni den paagi. Li den paki ki tinga yaaba kuli ke bi ŋoadi o. 4Bi den gbaani ki kpiagi o bonfuodibiado kelima o puni ki fuayanga li bali. Bi go den gbaani ki kpiagi ki fuayanga ki tua: «Ŋme ye ki tie nani ki fuayanga? Ŋme baa fidi ki tuogi leni o bu toabu?” 5Ki fuayanga den baa yaa ñoabu n maadi mi japamaama leni ti sugidi U Tienu po, ki tiendi o biadima hali piinaa n ŋmaali lie. 6O den yaadi o ñoabu ki sugidi U Tienu, leni o yeli, leni o yekaanu, leni yaaba n ye ku niinni tanpoli po kuli. 7O go den baa li bali ki baa tuogi leni U Tienu nigagidiŋanba bu toabu ki paadi ba. O den baa u paalu ki diedi i nibuoli kuli leni i mabuoli kuli leni mi diema kuli. 8Ki tinga nni yaaba kuli baa gbaani ki kpiagi ki fuayanga, bani yaaba yaa yela n kaa diani ki pebiga miali tili nni, lani n tie ban den kodi yaaga hali ke ŋanduna daa tagi. 9Yua n pia a tuba, wan cengi yaa maama n tie na. 10Lan bili yua yaa po Ke bi baa gedini o ti yonbidi kuli, O baa gedi ti yonbidi. Yua n kpa nitoa leni ki jugisiega, Bi baa kpa o mo leni ki jugisiega. Lani yaa po yo ke li pundi bi nigagidiŋanba n yaa pia li juunli ki se leni dandanli. 11Lani n den laa fuayantoaga ke o ña ki tinga nni. O den pia yina lie ya n naani leni ki pebiga yaa, ki maadi nani o bonfuodibiado n maadi maama. 12O den pia ki fuayankpiaga yaa bali kuli ki tuuni o nintuali ki teni ke ki tinga leni yaaba n ye lienni kuli n gbaani ki kpiagi ki fuayankpiaga, wani yua n den baa yaa poagilima n baa fidi ki kpa o, ke o nan paagi yeni. 13O den tiendi mi bancianma hali ki teni ke mi fantama ña tanpoli po ki baali ki tinga nni ke bi niba nua. 14O den boandi ki tinga nni yaaba leni wan den tiendi yaa bancianma ki fuayankpiaga nintuali. O den teni ke ki tinga nni yaaba n tagi ki fuayankpiaga, yua n den baa ki jugisiega poagilima ki go paagi yeni, nannanli. 15O go den baa u paalu ki teni ke ki fuayankpiaga nannanli fo, ki fidi ki maadi ki teni ban kpa yaaba n kaa tuo ki gbaani ki kpiagi ki fuayankpiaga nannanli kuli. 16O den bili ke bi niba kuli, taliginba leni bi paatieba, a piada leni a luoda, yaaba n die bi yula leni i yonbi kuli n baa mi maalima bi nijienu yaaka bi yutuna po, 17ke oba kuli kan fidi ki da liba, yaaka ki kuadi liba kuli, kali wan yaa pia mi maalima yeni, yaaka ki fuayankpiaga yeli, yaaka ki yeli coali. 18Line bua mi yanfuoma. Yua n pia mi yanfuoma kuli n coadi ki bandi ki fuayanga yeli coali, kelima li tie o nisaalo coali. Laa coali tie kobiluoba n piiluoba n bi luoba.

will be added

X\