DOAGIDIMA 12

1Yaa maalicianma n pia li pakili den doagidi tanpoli ki tie mi ne, o pua ke o bobi u yienu nani ti tiadi yeni, ke o taana ŋmaa o ŋmaalo, ki ciibi yaa badifogiliga n pia piiga n ŋmabila lie. 2O den punbi ke o maayogunu nagini, ke u maditugukoanu pia o ke o mua kelima wan laadi yaa fala ti madi yaa po. 3Maalitoama go den doagidi tanpoli. Yaa bonfuodi-biadiciamo n moani den se. O den pia yula lele leni yina piiga, ki go pia badifogilimu lele o yula po. 4O juoli den fuli a ŋmabila boagidima taa siiga boagidiyenma, ki luni a ki tinga po. O bonfuodibiado yeni den sedi o pua yua n baa maa yeni kani, ke o yaa mali yaa yogunu wan nali o biga. 5O pua yeni den mali bonjaga, yua n baa gobidi i nibuoli kuli leni yaa badigbiamu n tie kudi. Bi den duoni o biga U Tienu leni o bali kalikaanu kani. 6O pua den sani ki gedi U Tienu n ŋanbi opo yaa kaanu mi fanpienma nni, ban baa dindi o naankani hali tudili n kobilie n dana piiluoba. 7Bu toabu den tieni tanpoli po. Miseli leni o malekinba den tuogi bu toabu leni o bonfuodibiado yeni. Wani moko leni o yaa malekinba den tuogi leni ba. 8Ama baa den fidi ki paadi Miseli leni o yaa malekinba, baa go den pia yekaanu tanpoli po. 9Bi den luni o bonfuodi-biadiciamo yeni, wani o waakpelo, ban go yi yua ku tuotabigu yudaano leni Sutaani, wani yua n boandi ki tinga nni yaaba kuli. Bi den luni o ki tinga nni, wani leni o malekinba. 10Lani n den gbadi ke u nialiciamu kpaani tanpoli po ki yedi: «Moala ti Tienu tindima, O paaciamu leni o diema cua, Wani Gandi Yua mo Yaa bali yogunu moko pundi, Kelima bi ñani ku tuotabigu yudaano Tanpoli po ki luni, Wani yua n den kuliti ti kpiiba U Tienu kani U yensiinu leni ku ñiagu kuli. 11Bi den paadi o Kelima ki Pebiga soawulima Leni bi siedi maama yaa po, Baa den bua ki ga bi miana, Hali ki baa jie mi kuuma. 12Lani yaa po tanpoli, Leni yinba yaaba n ye lipo, Yin mangi mani yi pala. Ama o falaciamo ye leni yinba Ki tinga leni mi ñincianma, Kelima ku tuotabigu yudaano Jiidi yi kani leni li pabienli Kelima o bani ke o yogunu ki fuu.” 13O bonfuodibiado n den laa ke bi luni o ki tinga nni, o den ŋoadi ki faligidi o pua yua n mali ki bonjaga yeni. 14Lani bi den puni o pua yeni jiebanciamo fiabi boni lie ke wan yugi ki gedi o kaanu yu n ye mi fanpienma nni, ban baan kubi o naanpo ki yaa dindi o hali bina taa leni boagidima, wan foagidi leni o wa yeni. 15O wa yeni den sii yaa ñima n yaba nani u kpenciamu yeni ke man ŋoadi ki tugi o pua. 16Ama ki tinga den todi o pua ki yaadi ki ñoabu ki ñuudi o bonfuodibiado n sii yaa ñincianma. 17O bonfuodibiado pali den beni leni o pua ke o gedi ki baa tuogi bu toabu leni o bila yaaba n sieni, bani yaaba n ŋua U Tienu mabilikaama ki kubi Jesu yaa siedi. 18O den sedi mi ñincianma jaali tanbiima po.

will be added

X\