DOAGIDIMA 10

1Lani n den laa malekitoa yua n pia u paalu, ke o ña tanpoli po ki ji. O den bobi ku tawaligu nani ti tiadi yeni, o taniano den yilini o yuli, o nunga den tie nani u yienu yeni, o taana mo den tie nani mi fantama yeni. 2O den muubi ki tibiga o nuu nni ke ki gbabidi. O den ŋmaa o jientaali mi ñincianma po, ki go ŋmaa o gantaali mo ki tinga po, 3ki tiani boncianla nani o yangbanlo n duni maama. Wan den tiani, i tatantan-leleedi niali den tiani. 4I tatantan-leleedi niali n den tiani yeni, n den bua ki diani, ama n den gbadi u nialu ke u maadi tanpoli po ki yedi: «Ŋan yaa kubi i tatantan-leleedi n yedi yaala ŋasiili nni, ki da diani la mo.” 5Min den laa yaa maleki ke o se mi ñincianma leni ki tinga po yeni den yugidi o jienu tanpoli 6ki poli yua n ye hali yaa yogunu kuli yeli nni, wani yua n den tagi tanpoli leni yaala n ye lienni kuli, ki tinga leni yaala n ye lienni kuli, leni mi ñincianma leni yaala n ye mi niinni kuli ki yedi: «Li kan go pa yogunu. 7O maleki-leleelo yaa bogini ki baa piebi o kakaci, U Tienu bondoaginkaala baa tieni ki dudi nani wan den tuodi ki waani o naacenba, bi sawalipuaba maama.” 8Lani, min den kpa gbadi yaa nialu ke u maadi tanpoli po go den maadi leni nni ki yedi: «Gedi ki ga ki tibiga yaaga n gbabidi ki ye maleki yua n se mi ñincianma leni ki tinga po nuu nni.” 9N den gedi maleki yeni kani ki yedi o wan teni nni ki tibiga. O den yedi nni: «Ga ga, ki ŋmani ki nali ga. Ki baa to a tugu nni, ama a ñoabu nni ki baa mani nani ti siadi yene.” 10N den ga ki tibiga maleki yeni nuu nni ki ŋmani ga. Ki den mani n ñoabu nni nani ti siadi yeni, ama min den ŋmani ki nali ga, ki den to n tugu nni. 11Lani bi den yedi nni: «Li tie tiladi ŋan go pua sawali yaa nibuoli n yaba po leni yaa diema leni yaa mabuoli leni yaa badiba n yaba po.”

will be added

X\