FILIPA YAABA 4

1Lanwani n kpiiba n buakaaba, min bua ki go le yaaba hali bonŋanla, yinba yaaba n tie n pamanli leni n kpiagidi, yin yaa se mani ke li pa o Diedo nni yinba n buakaaba. 2N tundi ki mia Efodi, ki go tundi ki mia Sintika ke ban yaa pia yantiayenli o Diedo nni. 3N go mia fini min dugi yua po, yua n tuuni leni nni ti Diedo tuonli, ke ŋan todi bi poliediba yeni, bani yaaba n den taa leni nni ki moa o Laabaaliŋamo muali. Bani leni Kilema leni nitoaba n tuonsoanlieba yaaba taa leni nni laa tuonli nni, ke bi yela mo diani li miali tili nni. 4Yin yaa mangidi mani yi pala o Diedo nni yogunu kuli. N go waani yi yeni, yaa mangidi mani yi pala. 5Yi dingima n yaa doagidi bi niba kuli po. O Diedo nagi. 6Yin da yagi mani yi yama bonlaba kuli po. Ama li bonla kuli yaa po, yin waani U Tienu yin luo yaala, ki yaa jaandi ki miadi ki go tuondi o. 7Lanwani U Tienu yaa yanduanma, yaama n pendi o nisaalo bandima kuli, baa guudi yi pala leni yi yantiana kuli Jesu Kilisiti nni. 8N kpiiba, yaa maama n sieni tie mine: yin yaa tia mani yaala n tie moamoani kuli, leni yaala n pia ti jigidi kuli, leni yaala n tiegi kuli, leni yaala n ŋani kuli, leni bi niba n baa bua yaala ki faadi la kuli, leni yaala n pia siediŋamo, leni yaala n pia ti bulicindi ki pundi bi niba n pagi la kuli. 9Yin go yaa tiendi mani min den bangi ki tundi yi yaala, yin den gbadi ke n yedi yaala ki go laa ke n tiendi yaala. Lanwani mi yanduanma Tienu baa ye leni yi. 10N pali den mangi hali boncianla o Diedo nni, min den laa ke yi goa ki faadi yi buama npo. Moamoani, yi den tiani npo yogunu kuli, ama yi daa den baa u sanu ki fidi ki doagidi npo la. 11Mii maadi yeni kelima n luo bonlaba kuli ka. Kelima n bangi ki bani ki dagini n yema lan tie yaa yema buoli kuli nni. 12N bani ki yaa ye leni mi luoma, ki go bani ki yaa ye ki pia ke li kandi. N yema n tie maama kuli leni min ye naankani kuli, n bani ki je ki guo, ki go bani mi koma. N bani ki yaa pia ke li kandi, bi ki yaa ye leni mi luoma. 13N fidi likuli kelima wani yua n puuni nni li paalu yaa po. 14Baa yeni, yin den taani leni nni ki tugi n fala tugili yeni, yi tieni yaala n ŋani. 15Yinba Filipa yaaba bani bonŋanla ke min den cili ki wangi o Laabaaliŋamo yaa yogunu, ki ñani Maseduana diema nni, Kilisiti n yini yaaba kuli siiga yinba bebe n den tiadi min baa baadi yaala leni min go baa ñandi yaala, ki tuuni npo bu paabu ki todi nni. 16Baa min den ye Tesalonika, yi den soani npo bu paabu ke laa luo taalima lie ki baa todi nni min luo yaala po. 17Laa tie ke n bua ki yaa baadi bu paabu ka, n bua yin baa ti ñuadi boncianla kelima laa paabu po. 18N diani yeni ki waani yi ke yin den soani npo yaala kuli pundi n kani ke n pia ke li kandi. Min den ga yin den soani Epafilodita ke wan teni nni yaala yeni, mii go luo liba kuli. Yi paabu yeni tie nani yaa tulale yaa nuulu n mani leni U Tienu n ga yaa padili ke li mani opo. 19N Tienu baa pa yi yin luo yaala kuli, nani o ŋalimano kpiagidi n tie maama Jesu Kilisiti nni. 20U Tienu ti Baa n yaa pia ti kpiagidi hali yaa yogunu kuli. Amina. 21Fuondi mani bi nigagidiŋanba Jesu Kilisiti nni. 22N kpiiba, yaaba n ye ne leni nni fuondi yi. Bi nigagidiŋanba yaaba n ye ne kuli fuondi yi, bi siiga yaaba n ye o badiciamo Sesa diegu nni fuondi yi hali bonŋanla. 23Ti Diedo Jesu Kilisiti yaa ŋanbili n yaa ye leni yikuli.

will be added

X\