FILIPA YAABA 2

1Yi yema Kilisiti nni teni ke yi pia u fidu. O buama mo puni yi li papaali. Yi pia mi taanyenma leni o Fuoma. Yi pia li padingili leni mi niñingbadima yiyaba po. 2Lanwani yin mangi n pali hali lan kandi ki yaa pia yantiayenli leni yiyaba. Yin yaa pia mani buayenma leni payenli leni yantiayenli. 3Yin da tieni liba kuli leni mi paadima yantiali, yaaka yaa kpiagidi n tie fanma fanma po, ama ke li yumiinli n teni yin yaa nua yiyaba ke bi cie yi. 4Oba kuli n da lingi o yuli po ŋamu bebe ka, ama yua kuli n yaa lingi o lieba ŋamu. 5Yin yaa pia mani Jesu Kilisiti n den pia yaa yantiali. 6O den tie U Tienu n tie maama. Baa ke o den tie yenma leni U Tienu Waa den sua ke li tie wan baa fie yaala leni u paalu. 7Ama o den landi laa kpiagidi kuli o yama po Ki taa o naacemo n tie maama ki lani, Ki tua nani bi nisaaliba n tie maama yeni. Wan den tua nisaalo ki tie nani bi nisaaliba n tie maama, 8O go den wadi o yuli Ki tuo ki tiendi U Tienu yanbuama Ki pundi hali mi kuuma, Baa hali li dapoanpoanli po yaa kuuma. 9Li tie lani yaa po ke U Tienu mo jigini o hali boncianla Ki puni o yaa yeli n cie a yela kuli, 10Ke dunli kuli baa gbaani Jesu yeli po Tanpoli po leni ki tinga po leni ki tinga tiipo kuli, 11Ke nilo kuli mo n tuo Ke Jesu Kilisiti n tie o Diedo, U Tienu yua n tie Baa yaa kpiagidi yaa po. 12Lanwani n buakaaba, nani yin den tuo ki tiendi min yedi yaala min den ye leni yi yaa yogunu kuli maama, moala min kaa go ye leni yi yeni, yin go yaa tiendi yeni ki pugidi. Yin yaa moandi leni li fangili leni mi digibima ki yaa ye yi tindima yema. 13Kelima U Tienu n baa teni yin bua ki go fidi ki tieni nani o yanjagiŋanli n tie maama. 14Yin tiendi yaala kuli, yaa tiendi mani la ki naa yenbidi ki da nia mo. 15Yeni n tie yin yaa ŋani cain ki pia li papienli, ki tie U Tienu bila ban kan fidi ki kuli yaaba leni liba kuli moala na niba yaaba n joagini ki bia siiga. Yin yaa yieni mani nani i mukaani yeni ŋanduna yaaba siiga, 16ki wangi ba li miali maama. Yi yaa tiendi yeni, li baa tie npo ti jigidi Kilisiti goacuama daali, kelima li baa doagidi ke mii den tiini mi nuama fanma fanma, kaa tuuni fanma fanma mo. 17Baa li yaa tie ke n soama baa wuli ki tua nani li ñincabili yeni, yi dandanli tuonli padili po, n baa mangidi n pali lipo, n go baa mangidi n pali leni yikuli. 18Yi mo n mangi yi pala lipo ki taani leni nni n yaa pamanli nni. 19O Diedo Jesu yaa bua, n sugini ke li yaa yen waamu, n baa soani Timote yikani, ki baa yi laabaalo lan paagi n pali. 20Mii pia nitoa yua n taa leni nni yantiayenli ki yagini o yama yi ŋamu po. 21Yaaba n sieni kuli kuani bi yama bi ŋantaadiceli nni, baa kuani bi yama Jesu Kilisiti yaa ŋantaadi nni. 22Yikuli bani Timote n doagidi ke o tie nidugika maama, ki taa leni nni ki tuuni o Laabaaliŋamo wangima tuonli nani ki biga n baa taa leni o baa ki yaa tuuni maama yeni. 23N yaa bandi n maama n baa juodi maama, n sugini ke laa yogunu n baa soani o yikani. 24N dugi o Diedo po ke mini nba moko baa cua yikani ke li kan waagi. 25N sua ke li tie tiladi min goa ki soani yikani n kpiilo Epafilodita, n tuonsoanlielo leni n moamuadilielo, yin den soani yua n kani ke wan yaa todi nni leni yaala n poadi npo. 26O den bua hali bonŋanla ki le yikuli. Wan den bandi ke yi gbadi ke o yia, o yama den yagi lipo boncianla. 27Moamoani, o den yiagi boncianla hali ke li poadi waamu ke o kpe moko. Ama U Tienu den gbadi opo mi niñima, ki go gbadi mini yaa po moko mi niñima, ki teni ke min da go baa pabiiditoali ki pugini. 28Yaala n tigini nni ke min soani o yikani tie ke n bua ke yin go le o yi pala n mangi, n yaa pabiidili mo n wadi. 29Lanwani yin ga o cangu mani bonŋanla kelima o Diedo po leni li pamancianli, ki go yaa jigindi laa nibuolu. 30O den luni o miali ki tuuni Kilisiti tuonli hali ki nagini mi kuuma. O den bua ki todi nni yin bi baa todi nni yaa todima ki naa ye n kani.

will be added

X\