FILIPA YAABA 1

1Mini Polo leni Timote, Jesu Kilisiti yaa naacenba, n diani yipo li tili, yinba yaaba n tie bi nigagidiŋanba Jesu Kilisiti nni ki ye Filipa dogu nni, leni yi nitaanli yudanba leni yi todikaaba kuli. 2Ti Baa U Tienu leni o Diedo Jesu Kilisiti n pa yi li ŋanbili leni mi yanduanma. 3N tuondi n Tienu min tiadi yipo yaa yogunu kuli. 4Min jaandi yikuli po yaa yogunu kuli, n jaandi leni li pamanli, 5kelima yin taa leni nni ki todi nni o Laabaaliŋamo wangima po maama, ki cili yin den kpa gbadi o yaa daali ki pundi hali moala. 6N daani ki go bani cain ke wani yua n cili laa tuonŋanli yi niinni, baa tuuni li hali lin dudi Jesu Kilisiti goacuama daali. 7Li pundi min yaa tiani yikuli po yeni, kelima n kubi yi n pali nni. Min ye leni ti kpaadi, leni min maadi ki ga o Laabaaliŋamo ki teni ke o se ki pa, yikuli taa leni nni ki baadi min baadi yaa ŋanbili U Tienu kani. 8U Tienu tie npo n siedo ke n bua yikuli leni Jesu Kilisiti yaa buamoanma. 9Min miadi U Tienu yipo yaala n jaandi nni tie ke yi buama n yaa yabidi ki pugidi leni mi bandima leni u fanmoanu, 10ke yin bandi ki gagidi ki gandi yaala n ŋani ki cie. Lani n baa teni yin yaa ŋani cain ki naa pia ban baa fidi ki kuli yi leni yaala Kilisiti goacuama daali. 11Yeni, yi baa yaa tuuni mi teginma tuona ya n ñani Jesu Kilisiti kani, lan tua ti kpiagidi leni ti pagidi U Tienu po. 12N kpiiba, n bua ke yin bandi line, yaala n den baa npo teni ke o Laabaaliŋamo wangima suagi liiga. 13Moamoani, li doagidi yaa minteela n gu o bado diegu kuli leni nitoaba kuli po ke n lo li kpaadidieli nni kelima Kilisiti yaa po. 14N kpaadi teni ke ti kpiiba boncianla dugi o Diedo po ki cie ki go paagi bi pala ki wangi U Tienu maama kaa go jie. 15Li tie moamoani ke bi siiga bi tianba wangi Kilisiti Laabaaliŋamo kelima bi pia npo li nunponli ki bua ki cie nni. Ama bi tianba mo li wangi o leni li yantiaŋanle. 16Bine wangi o Laabaaliŋamo kelima bi bua nni, ki bani ke n ye ne kelima U Tienu puogi nni ke min maadi ki ga o Laabaaliŋamo ki doagidi ke o tie moamoani. 17Bine mo wangi o ki bua ki cie nni, bi yantiana naa ŋani. Bi tama ke bi yaa tieni yeni li baa pugini npo fala li kpaadidieli nni. 18Likuli tie npo yenma. Baa lan tie maama kuli, bi yaa wangi o leni mi tuonanma, bi ban wangi o leni li yantiamoanli, bi wangi Kilisiti Laabaaliŋamo. N mangi n pali lipo ki go baa mangidi li ki pugidi. 19Kelima n bani ke likuli baa juodi ki tua n tindima yaa po kelima yin jaandi ki miadi npo maama, leni Jesu Kilisiti Fuoma todima yaa po. 20Nani min bua ki go sugini maama tie ke n kan le i fe liba kuli po. Ama nani lan den kpa tie maama, li go tie yeni moala. N sugini ke Kilisiti baa baa ti kpiagidi n miali yema nni kuli, li yaa tie ke n baa kpe leni n yaa baa ye kuli. 21Kelima mini yaa po Kilisiti n tie n miali, mi kuuma mo tie npo ñuadi. 22Ama, li yaa tie ke li ŋani min tuuni yaa tuonli yaa po ke min yaa ye n gbanandi nni, mii bani min baa gandi yaala. 23Laa bonliedila miabi nni. N bua ki ña ki gedi ki ban yaa ye leni Kilisiti, lani n cie npo hali boncianla. 24Ama yi mo yaa todima po, li baa cie min yaa ye ki fo. 25N daani ki go bani ke n go baa fo, ki ye leni yikuli, ke yin fidi ki yaa suagi liiga ki go pia li pamanli li dandanli nni. 26Yeni, n goacuama yikani go baa teni yin baa li pamankandikaali Jesu Kilisiti nni. 27Lanwani bonyenla tugi li yuli, lani n tie ke yi tagi n yaa de leni Kilisiti yaa Laabaaliŋamo. N yaa fidi ki cua yikani ki laa yi, leni n yaa fidi ki cua, min yaa gba ke yi se bonŋanla ki pia yantiayenli, ki moa o Laabaaliŋamo n cuani yaa dandanli yaa muali. 28Yin da cedi yi koanginkaaba n jieni yi baa waamu. Lani n tie bipo siedi ke bi baa bodi, ama li tie yinba yaa po siedi yi tindima po. Laa bonla ñani U Tienu yaa kani. 29Kelima U Tienu n tieni yipo yaa ŋanbili yeni, laa tie ke yin daani Kilisiti bebe ka, ama yin go yaa laadi opo fala moko. 30Yi moko taa leni nni ki moa yin den laa ke n moa yaa muali, ki go gba moala ke n baa moa.

will be added

X\