MATIYU 8

1Jesu n den jiidi li juali po, bi niba boncianla den ŋua o. 2O gbaado den cua ki gbaani o nintuali ki yedi: «N Daano, a yaa bua, a baa fidi ki ŋanbi nni.” 3Jesu den tandi o nuu ki sii o ki yedi: «N bua, ŋanbi.” Lanyogunu o gbaadima den gbeni opo ke o ŋanbi. 4Jesu den yedi o: «Ŋan fangi a yuli ki da yedi niloba liba. Ama, gedi ki ban waani a yuli kopadiciamo, ki padi Musa n den bili yaa padili, lan tua bipo siedi ke a ŋanbi.” 5Jesu n den kua Kapenayuma nni, minteela kobiga yudaano den tuogi o 6ki mia o ki yedi: «N Daano, n naacemo dua ke ti yianfaandi cuo o, ki go koani o boncianla.” 7Jesu den yedi o: «N baa cua ki paagi o.” 8Minteela kobiga yudaano yeni den goa ki yedi o: «N Daano, mii pundi ŋan kua n dieli nni, maadi mayenma bebe, n naacemo baa paagi. 9Kelima mini yua ke toaba die nni, n moko pia min die yaa minteela. N yen yedi one: ‹Gedi,› wan gedi, ki yedi o yua mo: ‹Cua na,› wan cua. N yen yedi n naacemo: ‹Tieni line,› wan tieni.” 10Jesu n den gbadi laa maama, li den paki o, ke o yedi yaaba n ŋua o: «N waani yi i moamoani, baa yinba Isalele yaaba siiga, n daa laa yaa dandancianli n tie na buolu. 11N waani yi i moamoani ke bi niba boncianla baa ña puoli leni nintuali kuli, ki cua ki taani ki kali leni Abalahama leni Isaaka leni Jakobo, u saajekaanu kani tanpoli diema nni. 12Ama bi baa lu yaaba n bi baa tie tanpoli diema yaaba yeni, niinpo li biigicianli nni, a bubula leni mi ñincegima n baa ye naankani.” 13Li yaa puoli Jesu den yedi a minteela yudaano: «A kuni, lan tua apo nani ŋan daani maama.” Lanyogunu liga o naacemo den paagi. 14Jesu den gedi Pieli denpo. O den sua ke wani Pieli cuadinaa dua kelima o den pia gbananbiendi. 15Jesu den sii o nuu ke u yianu kagidi opo ke o fii ki ga o cangu. 16Ku yenjoboandigu bi den cuani Jesu kani bi niba boncianla, mu cicibiadimu danba. O den maadi bebe ki deli ki ñani mu cicibiadimu mun den ye yaaba yaa niinni, ki go paagi a yiama kuli. 17O den tieni yeni ke o sawalipualo Esayi n den maadi yaa maama n tieni: Wani oba n den taa ti tadingu, Ki tugi ti yiani. 18Jesu n den laa ke ku niligu lindi o, o den waani o ŋoadikaaba ban duodi ki gedi nepo yaa boanjaali. 19Li balimaama bangikaaba siiga yendo den cua o kani ki yedi o: «Canbaa, n baa ŋua ŋa ŋan caa naani kuli.” 20Jesu den goa ki yedi o: «I coli pia i fali, ti bonyugiditi mo pia a tiana, ama o Ja Bijua wani naa pia wan baa dua naani.” 21Nitoa, o ŋoadikaaba siiga yua, den yedi o: «N daano, pa nni u sanu min da kpa gedi ki ban piini n baa no.” 22Jesu den goa ki yedi o: «Yaa ŋua nni, ki cedi bi tinkpiba n piini bi tinkpiba.” 23Jesu den kua ku ñinbiagu nni ke o ŋoadikaaba den ŋoadi o. 24Ban den ye mi ñincianma nni, ku faabiadigu den fii ke a ñinguona fii ki baa milini ku ñinbiagu, ama wani, o den goa. 25O ŋoadikaaba den nagini ki fundi o ki yedi: «Ti Daano, fii ki faabi ti, ke ti baa bodi.” 26O den yedi ba: «Be teni ke yi jie nanda, yinba yaaba yaa dandanli n ki fuu?” Lanwani o den fii ki sedi ki funi leni ku faagu leni mi ñincianma ke likuli duani salam. 27Ti jawaandi den cuo o yegininlieba kuli ke bi yieni biyaba: «O tie ŋme yo, ke baa ku faagu leni mi ñincianma kuli tuo ki tieni wan yedi yaala?” 28Jesu n den pundi nepo yaa boanjaali Gadala yaaba dogu tinbianu nni, mu cicibiadimu danba bonba lie den ñani a kula po ki tuogi o. Bi den bia boncianla hali ke niloba kan tuo ki tagini lipo sanu. 29Bi den tiani opo: «Be n ye tinba leni fini siiga, U Tienu Bijua? Naani a cua ne ki baa duoli ti ke u yogunu daa pundi yoo?” 30Li sua ke u duokuliciamu den nagi likani ki gbi i moajiini. 31Mu cicibiadimu den miadi Jesu ki tua: «A yaa deli ti, ŋan cedi tin gedi ki ban kua u duokulu na niinni.” 32O den yedi mu: «Gedi mani.” Mu den ñani bi jaba yeni niinni ki ban kua i duoli nni. Lani u duokulu kuli den digi mi joayidima po ki baa mi ñincianma nni ki bodi lienni. 33Yaaba n den kpaa ba den sani ki gedi ki ban waani u dogu po yaala n tieni kuli, leni yaala n tieni mu cicibiadimu danba. 34Lane, u dogu nni yaaba kuli den ñani ki baa tuogi Jesu. Ban den laa o bi den mia o ke wan ña bi tinga nni.

will be added

X\