MATIYU 4

1Lani n pendi U Tienu Fuoma den gedini Jesu mi fanpienma nni ke Sutaani tulini o. 2Jesu n den loli bu ñoabu dana piinaa leni ñadi piinaa, mi koma den cuo o. 3Mi tulinma daano yeni den cua o kani ki yedi o: «A yaa tie U Tienu Bijua ŋan maadi ki teni a tana na n tua jiema.” 4Jesu den goa ki yedi: «Li diani: O nisaalo kan yaa ye mi jiema bebe po ka, ama yaa maama n ñani U Tienu ñoabu nni kuli yaa po.” 5Sutaani den gedini Jesu u dogagidiko Jelusalema po, ki teni ke o sedi U Tienu diegu yuli po. 6O den yedi o: «A yaa tie U Tienu Bijua ŋan yugi ki cii tiipo kelima li diani: ‹O baa puogi o malekinba apo. Bi baa tebini a bi nii po Ke a taali n da tuudi tanli.› ” 7Jesu den yedi o: «Li go diani kaanto: Da biigi o Diedo a Tienu.” 8Sutaani go den gedini o yaa juali n kpedi hali boncianla yuli po ki waani o ŋunduna diema kuli leni mi kpiagidi, 9ki yedi o: «A yaa gbaani ki kpiagi nni, n baa pa ŋa laa bonla kuli.” 10Jesu den yedi o: «Fuadi likani Sutaani, kelima li diani: ‹A baa kpiagi o Diedo a Tienu, Ki yaa jaandi wani bebe.› ” 11Lane Sutaani den ŋa Jesu. Lanyogunu malekinba den cua Jesu kani ki tuuni opo. 12Jesu n den gbadi ke bi cuo Jan, o den fii ki gedi Galile. 13O den ñani Nasaleti ki cua ki ye Kapenayuma dogu nni yu ku leni mi ñincianma, Sabulono leni Nefitali buoli yaa tinmu nni. 14O den tieni yeni ke o sawalipualo Esayi n den maadi yaa maama n tieni: 15«Sabulono leni Nefitali tinmu yaaba, Yaa tinmu n ku leni Galile ñincianma, Judana kandima tinga yaaba yeni, Bani yaa nilanba n ye Galile diema nni, 16Laa niba, yaaba n den ye li biigili nni, di laa mi yencianma. Laa yenma yendi bani, Yaaba n den ka mi kuuma leni mi jinjingu n den die naankani.” 17Lanyogunu Jesu den cili ki wangi o Laabaaliŋamo ki tua: «Lebidi mani yi yama, kelima tanpoli diema kuli.” 18Jesu n den cuoni ki baali Galile ñincianma, o den laa naataanjaba lie, Simono yua n go yi Pieli, leni o waalo Andile, ke bi lu i taali mi ñincianma nni kelima bi den tie jankpaanba. 19O den yedi ba: «Ŋoadi mani nni, nani yin lingi i jami maama, n baa teni yin yaa lingi bi niba moko yeni.” 20Lanyogunu liga bi den ŋa bi taali ki ŋoadi o. 21Jesu den suagi liiga ki go laa naataantoe lie, Sebede bijaliediba, Jaka leni o waalo Jan. Bi den ye ku ñinbiagu nni leni bi baa Sebede ki ŋanbidi bi taali. 22O den yini ba. Lanyogunu bi den ŋa ku ñinbiagu leni bi baa kuli ki ŋoadi o. 23Jesu den gaandi Galile diema kuli nni ki kua li balimaama bangima diena nni, ki bangi bi niba ki wangi ba U Tienu diema Laabaaliŋamo, ki paagidi bi niba bi yianbuoli leni bi tadinbuoli kuli po. 24O yeli den ñani Sili diema kuli nni. Bi den cuani o kani i yianbuoli leni mi yianfulima kuli danba, leni mu cicibiadimu n die yaaba, leni mi bisinbilima danba leni ti gbanankpiendi danba. O den paagi bikuli. 25Bi niba boncianla, yaaba n den ñani Galile, leni Dekapola, leni Jelusalema leni Jude diema kuli, leni yaa diema n ye Judana kpenu kandima, bikuli den ŋoadi o.

will be added

X\