MATIYU 27

1Ku tiŋaapanpangu, bi kopadicianba yudanba leni Jufinba nikpeliba kuli den taani ki juogi ke bi baa teni ban kpa Jesu. 2Bi den loli o, ki gedini o ki ban teni o Pilata yua n den tie gufeneeli. 3Judasa, yua n den janbi Jesu n den laa ke bi jia wani Jesu buudi ki kadi ke bi baa kpa o, o den mua ke o yaa bi janbi o, ki den taa a kujapien-piitaada ki gedini bi kopadicianba yudanba leni bi nikpeliba kani 4ki yedi: «N tieni ti tuonbiadi ki janbi yua n naa pia tagili.” Bi den goa ki yedi o: «Lani mo nan ŋua tii? Li ŋua fine.” 5Judasa den luni i ligi yeni U Tienu diegu nni ki ñani ki gedi ki ban soadi o yuli. 6Bi kopadicianba yudanba den gandigandi i ligi yeni ki yedi: «Laa pundi laa ligi n kua U Tienu diegu ligitiagu nni, kelima li tie mi soama yaa ligi.” 7Ban den juogi, bi den taa laa ligi ki da o maado kuanu, ke u tua bi canba kupiikaanu. 8Lani yaa po ke bi yi laa kuanu mi soawulima kuanu hali dinla. 9Lani, o sawalipualo Jelemi n den maadi yaa maama den tieni: «Bi den taa kujapiena piitaa, Isalele yaaba n den biigi Ki sua ke o dunga pundi maama, 10Bi den taa yi ki da o maado kuanu, Nani o Diedo n den yedi nni maama.” 11Jesu den sedi gufeneeli nintuali. Gufeneeli den buali o: «A tie Jufinba bado bi?” Jesu den goa ki yedi: «Fini n yedi yeni.” 12Bi kopadicianba yudanba leni bi nikpeliba den kuli o, ama waa den guani liba. 13Lane Pilata den yedi o: «Ŋaa gba ban kuliti a yaala kuli po?” 14Jesu naa den lebidi o maamaba. Li den paki gufeneeli boncianla. 15Mi Pendima jaanma kuli, gufeneeli den maani ki yen faabi kpaadiyenli, ku niligu n mia o wan faabi yua. 16Laa yogunu bi den pia kpaadiyenli ke bi yi o Balabasa ke bi niba kuli bani o biadima po. 17Ku niligu n den taani, Pilata den yedi ba: «Yi bua min faabi yipo ŋme, Balabasa bi, bi Jesu ban yi yua Kilisiti?” 18Kelima o den bani ke bi cuo Jesu ki cuani o li bujiali kani kelima li nunponbiadili po. 19Wan da den ka o bujiakaanu mo, o pua den soani u tondu o kani ki yedi o: «Ŋan da kua o naa niteginka maama nni, kelima yaa ñiagu n pendi na, n laa fala boncianla ti dangidi nni kelima opo.” 20Bi kopadicianba yudanba leni bi nikpeliba den tundi ku niligu ke bi mia Pilata wan faabi Balabasa ki teni ban kpa Jesu. 21Gufeneeli Pilata go den yedi ba: «Bani bonba lie siiga yi bua min faabi yipo ŋme?” Bi den goa ki yedi o: «Balabasa.” 22Pilata den yedi ba: «N nan baa tieni Jesu, ban yi yua Kilisiti mo lede?” Bikuli den goa ki yedi o: «Ban joani o li dapoanpoanli po.” 23Gufeneeli den yedi: «O tieni be biadime?” Bi go den tangi ke li pa ki cie: «Ban joani o li dapoanpoanli po.” 24Pilata n den laa ke o maama ki baa sedima lipo, ke ku fuugu mo pugidi, o den taa mi ñima ki nidi o nii ku niligu nintuali ki yedi: «Mii pia tagiliba o naa niteginka soawulima nni. Li ŋua yinbe.” 25Ku niligu kuli den goa ki yedi o: «O soama n baa tinba leni ti bila po.” 26Lani, Pilata den faabi bipo Balabasa. O den teni ke bi pua Jesu i baliji, ki teni o bi nuu nni ban ban joani o li dapoanpoanli po. 27Gufeneeli Pilata minteela den kuani Jesu wani gufeneeli diegu nni wan ja ti buudi naani, ki taani bi cagili kuli ki lindi o. 28Bi den landi o tiadi ki golini o bu kpalimoanbu. 29Bi den taa i konkoni ki piani nani ki badifogiliga yeni ki cibini o, ki mubini o jienu li kankagili. Bi den gbaandi o nintuali ki ñuadi o nani o tie bado yeni ki tua: «Ti fuondi a, fini Jufinba bado.” 30Bi den siini opo ti ñinsandi, ki taa li kankagili ki pua o yuli po. 31Ban den ñuadiñuadi o yeni ki gbeni, bi den goliti bu kpalibu ki goa ki lani o o yaa tiadi ki ñani o ki gedini, ki baan joani o li dapoanpoanli po. 32Ban den caa, bi den tuogi Silena dogu yua ke o yi Simono, ki tieni u paalu ke o bugi Jesu dapoanpoanli. 33Bi den pundi ban yi yaa kaanu Goligota, lani n bua ki yedi "Ku Yukuokuogu kaanu." 34Bi den teni Jesu yaa duven n kali leni yaa ñoagu n to ke wan ño. Ama wan den leni o waamu, waa den ñuni. 35Ban den joani o li dapoanpoanli po bi den taa o tiayiekaadi ki toani tiatia ki boagidi ti. [Bi den tieni yeni ke o sawalipualo n den maadi maama n tieni: «Bi den boagidi n tiayiekaadi bi siiga, ki toani tiatia n liadicianli po.]” 36Lani, bi den kali ki ji o. 37Bi den kpaa ki tabini ki yini o yuli po yaa diani n waani yaala yaa po ke bi cuo o: «One n tie Jesu, Jufinba bado.” 38Bi den joani sanjiaba lie a dapoanpoana po ki taani leni o, yendo o jienu po, o yua o ganu po. 39Bi santagiba den sugidi o, ki fegini bi yula ki tua: 40«Fini yua n baa mudi U Tienu diegu ki goa ki maa li dana taa, ga a yuli naa. A yaa tie U Tienu Bijua, ŋan jiidi li dapoanpoanli po.” 41Bi kopadicianba yudanba leni li balimaama bangikaaba leni bi nikpeliba kuli moko den ñuadi o yeni ki tua: 42«O den ga nitoaba ki nan kan di fidi ki ga o yuli. O yaa tie Isalele buolu yaaba bado moamoani wan jiidi li dapoanpoanli po moala na, lanwani ti baa tuo ki daani o. 43O dugi U Tienu po, U Tienu yaa bua o moamoani, wan nan ga o moala. Kelima o den yedi: ‹N tie U Tienu Bijua yo.› ” 44Ban den taani ki joani o leni yaa sanjiaba a dapoanpoana po moko den sugidi o. 45Ki cili u yensiicocolu, li biigili den tieni ki tinga nni kuli ki yaa caa hali li yenlebidili. 46Li yenlebidili po yeni, Jesu den tiani boncianla: «Eli, Eli, lama sabakitani?” Lani n tie: "N Tienu, n Tienu, be yaa po ke a ŋa nni?" 47Yaa niba n den ye likani bi tianba n den gbadi, bi den yedi: «O yi o sawalipualo Elia.” 48Tontoni bi siiga nni yendo den sani ki ban taa u cietuogu ki pagini mi ñinmiligima nni ki fini li kankagili, ki yugidi ki teni o ke wan ño. 49O lieba den yedi: «Cedi mani tin le Elia yaa baa cua ki ga o.” 50Jesu go den tiani ke li pa, ki cabi o naano ki kpe. 51Lanyogunu U Tienu diegu nni kpalidoaginkaabu den padi siiga nni, ki cili tanpoli ki ban jiidi hali tinga, ki boagidi kaani lie. Ki tinga den digibi, a tana den yagidi, 52A kula den yaadi, U Tienu nigagidiŋanba yaaba n den kpe siiga, boncianla den fii bi tinkpiba siiga. 53Bi den ñani a kula nni. Jesu fiima bi tinkpiba siiga puoli, bi den kua u dogagidiko nni ke bi niba boncianla laa ba. 54Minteela kobiga yudaano leni yaaba n den taa leni o ki ji Jesu kuli n den laa mi tindigibima leni yaala n tieni kuli, ti jawaandi den cuo ba boncianla, ke bi yedi: «Moamoani, one den tie U Tienu Bijua yo.” 55Bi puoba boncianla moko den ye likani ki se foagima ki diidi, Jesu n den ñani Galile ke yaaba n ciani o ki todi o o yema po. 56Li den pia bi siiga Magidala yua Maliyama, leni Maliyama yua n den tie Jaka leni Josefi naa, leni Sebede bila yaa naa. 57Ku jofangu yogunu yaa piado n yi Josefi ki tie Alimate dogu yua den cua. O moko den tie Jesu ŋoadika. 58O den gedi Pilata kani ki ban mia o wan teni o Jesu o kpiemo. Pilata den yedi ban teni o. 59Josefi den taa o kpiemo ki bobini len kpalipanbu, 60ki duani o o kupanli nni, wan den teni ke bi kpiedi yaali ku tangu nni. O den bindi ku tanpabigu ki biini li kuli ñoabu ki ban kuni. 61Magidala yua Maliyama leni Maliyama toa den ye likani ki ka ki tiegi li kuli. 62Lan den fii ki fa, lani tie li boginli daali fiifaama, bi kopadicianba yudanba leni Falisieninba den taani ki gedi Pilata kani 63ki yedi o: «Ti daano, ti tiadi ke laa boandi daano n da den fo yaa yogunu, o den yedi ke dana taa yaa pendi ke o baa fii bi tinkpiba siiga. 64Lani yaa po ŋan teni ban yaa ji li kuli hali dana taa daali ke o ŋoadikaaba n da ti cua ki su o, ki yedi bi niba ke o fii bi tinkpiba siiga. Laa boandiyuami di baa bia ki cie li bonkpiala.” 65Pilata den yedi ba: «No mani yaaba n ji nne. Gedi mani ki ban jiidi li kuli yin fidi maama kuli.” 66Bi den gedi li kuli po ki tieni ku tanpabigu yeni po yaa maalima ke o nilo yaa biidi bi baa bandi, ki sieni bi jiidikaaba.

will be added

X\