MATIYU 22

1Jesu go den pua ba mi kpanjama ki yedi: 2« Tanpoli diema baa tie nani yaa bado n den ŋanbi o bijua pocaajiema. 3O den soani o naacenba ban yini wan den yini yaaba laa pocaajiema po, ama bi den yie baa cua. 4O go den soani naacentoaba ki yedi: ‹Yin waani mani min yini yaaba ke n ŋanbi mi jiema ki gbeni, ki kodi n ne leni n yanwubiditi ki ŋanbi ki gbeni. Ban di cua mi pocaajiema po na.› 5Ama wan den yini yaaba yeni den fali o yiinu, ki fii ki gedi bi kaani, one n gedi o kuanu po, one mo o kpendu, 6yaaba n sieni mo den cuo o naacenba ki fiagi ba ki ku ba. 7O bado pali den beni boncianla ke o soani o toatieba ke bi ku laa nikpaba kuli ki sia bi dogu. 8Lanwani o den yedi naacentoaba: ‹Mi pocaajiema ŋanbi ki gbeni, ama min den yini yaaba naa pundi ki je ma. 9Yin gedi mani yaa sani n pia bi niba boncianla nni ki yini yin laa yaaba kuli ban cua mi pocaajiema po.› 10Bi naacenba yeni den kua i sani nni ki taani ban laa yaaba kuli, bi nibiadiba leni bi niŋanba kuli, yeni mi pocaajiema dieli den gbie bi niba. 11O bado n den kua ke o baa le yaaba n cua o yiinu, o den laa niyendo ke waa laa mi pocaajiema yaa tiadi. 12O den yedi o: ‹N danli, a tieni lede ki kua ne kaa laa mi pocaajiema yaa tiadi?› O ja yeni naa den baa ki guani pu. 13O bado den yedi o naacenba: ‹Loli mani o taana leni o buadi ki lu o niinpo li biigili nni, a bubula leni mi ñincegima n baa ye naankani.› ” 14Jesu den juodi ki yedi: «Ban yini yaaba yaba, ama ban gandi yaaba wa.” 15Lanwani Falisieninba den fii ki foagidi ki ban juogi ban baa tieni maama ki dia Jesu ku madiagu ki cuo o. 16Bi den soani o kani bi ŋoadikaaba leni o bado Elodo yaa buakaaba ke bi yedi o: «Canbaa, ti bani ke a tie moamoandaano, ki bangi bi niba U Tienu sanŋoadima leni i moamoani, ŋaa jie oba kuli, ŋaa gagidi oba kelima bi niba n nua ke o tie maama po. 17Lani yaa po waani ti a mo n sua yaala. Naani li pia u sanu tin pa Loma badiciamo Sesa li lubili bi, bi laa pia?” 18Jesu den bani bi nunfanbiadibu ki goa ki buali ba: «Yinba pala lie danba ne, be n teni ke yi dia nni ku madiagu yeni? 19Min le yin baa pa yaa ligi li lubili yeni?” Bi den teni o li kujapienli. 20O den buali ba: «Ŋme yaa nannanli leni ŋme yaa diani nna?” 21Bi den goa ki yedi o: «Sesa yaali yo.” Lane o den yedi ba: «Lanwani, pa mani Sesa, yaala n tie Sesa yaala, ki pa U Tienu mo, yaala n tie U Tienu yaa yaala.” 22Ban den gbadi o maguankaama, li pakili den cuo ba ke bi den fii ki ñani o kani ki ban caa. 23Landaali goga, Sadusieninba, yaaba n tua ke bi tinkpiba fiima ki ye, bi tianba den cua Jesu kani ki buali o i naa buali: 24«Canbaa, Musa den yedi: ‹O nilo yaa kpe kaa pia biga, o waalo n taa o kpepuoli ki baa o kpelo po u buolu.› 25To, ti siiga nni jaba lele den ye ki taa baayendo. O bonkpelo den taa o pua ki kpe. Wan ki den baa buolu yeni, o waalo den taa o kpepuoli. 26Wani o bonlielo yeni moko den kpe kaa baa buolu, ke o bontaalo moko taa laa pua ke li tientieni yeni ki yaa caa hali o bonleleelo. 27Bikuli n den kpekpe, o pua moko den yuandi ki kpe. 28Lanwani, bi tinkpiba fiima yogunu, bani bonba lele yeni siiga, o pua yeni nan baa tie ŋme yaa yua yo? Kelima bi niinni yendo yendo kuli den taa o ke o tua o pua.” 29Jesu den goa ki yedi ba: «Yi tudi kelima yii bani i Diani, yii bani U Tienu paaciamu mo. 30Kelima bi tinkpiba fiima yogunu, bi jaba kan go taa puoba, bi puoba mo kan go kuni jaba, bi baa tie nani malekinba yeni tanpoli po. 31Yaala n tie bi tinkpiba fiima yaa maama fuuli po mo, naani yii cogi U Tienu n yedi yi yaala na: 32‹N tie Abalahama Tienu, Isaaka Tienu leni Jakobo Tienu?› To, U Tienu mo naa tie kpiema Tienu ka, o tie yaaba n fo yaa Tienu yo.” 33Ku niligu den gbadi Jesu bangima ke li paki ba. 34Falisieninba n den gbadi ke Jesu mubini Sadusieninba ñoana, bi den taani o kani. 35Bi siiga nni yendo yua n tie li balimaama bangikaciamo den buali o ki bua ki dia o ku madiagu ki yedi o: 36«Canbaa, li balimaama nni, mile n cie?” 37Jesu den goa ki yedi o: «Ŋan bua o Diedo a Tienu leni a pali kuli, leni a miali kuli leni a yantiali kuli. 38Li balimaama nni mine n cie ki tie li mayuli. 39Yaama n ŋua ma mo ki naani leni ma tie mine: Ŋan yaa bua a nisaalilielo nani ŋan bua a yuli maama yeni. 40Li balimaama leni bi sawalipuaba maama kuli maa laa maliedima po yo.” 41Falisieninba n den taani, Jesu den buali ba: 42«Yi tama be yo U Tienu n Gandi Yua po? O tie ŋme bijua yo?” Bi den goa ki yedi o: «O tie Dafidi bijua.” 43Jesu den yedi ba: «Li yaa tie yeni, li nan ga lede ke mi Fuoma den teni ke Dafidi maadi o maama ki yini o o Diedo, wan den yedi: 44O Diedo den yedi n Diedo: ‹Kali n jienu po Hali min baa guli a yibalinba Ŋan ŋmaa ba.› 45Dafidi oba yini o o Diedo, li nan go ga lede ke o tie wani Dafidi bijua?” 46Oba kuli ki den fidi ki guani Jesu baa mayenma. Hali landaali mo oba kuli ki den pia papaali ki go buali o bualiba kuli.

will be added

X\