MATIYU 18

1Lanyogunu bi ŋoadikaaba den nagini Jesu kani ki buali o: « Tanpoli diema nni ŋme n baa tugi li yuli?” 2Jesu den yini ki biwaaga ki sieni o bi siiga ki yedi: 3«N waani yi i moamoani, yi yaa lebidi ki tua nani a biwaala yeni yi kan kua tanpoli diema nni. 4Yua n miini o yuli ki tua nani yaa biwaaga n tie na kuli, wani n baa tugi li yuli tanpoli diema nni. 5Yua n ga ki biwaaga nani one cangu kuli n yaa yeli nni, ga mini yaa cangoe. 6Ama yua mo n baa teni ke yaa bonwaamu n daani nni na siiga baa yendo n tudi kuli, li bi baa ŋani ki cie landaano po ban lani o li naacianli, ki lu o mi ñincianma nni wan mia ki bodi. 7Fala baa ye leni ŋanduna kelima li tingbali bonla yaa po. Kelima li kan tuo ke li tingbali bonla kan yaa ye. Ama fala baa ye leni yaa nilo n cuani la. 8A nuu, yaaka a taali, yaa tie tingbali bonla, ŋan jia ki lu foagima. Kelima a yaa baa yaa miali n kan gbeni leni taayenli yaaka nuyendu, li baa ŋani apo ki cie ŋan yaa pia taana lie leni nii lie ban nan lu ŋa yaa fantama n ki pia gbindima nni. 9A nunbu mo n yaa tie apo tingbali bonla, ŋan logidi bu ki lu foagima, kelima a yaa baa yaa miali n kan gbeni leni nunyenbu, li baa ŋani apo ki cie ŋan yaa pia nuni lie ban lu ŋa ku fantanbuogu nni. 10Fangi mani yi yula ki da fali a bonwaala na siiga baa yendo, kelima n yedi yi ke tanpoli po bi malekinba ye Baa yua n ye tanpoli nintuali yogunu kuli. [ 11Kelima o Ja Bijua cua ki baa faabi yaaba n yaadi.] 12Yi tama be? O ja yaa pia pe kobiga. Bi siiga yendo n yaadi, o baa tieni lede? Waa baa ŋa yaa piiyia n peyiadi n sieni bi kpaakaanu a juana kani ki gedi ki ban lingi yua n yaadi yeni? 13N waani yi i moamoani, o yaa laa o kuli, o baa mangi o pali boncianla kelima laa pia po ki cie yaa piiyia n peyiadi n ki yaadi yeni. 14Li tie yeni leni yi Baa yua n ye tanpoli, waa bua ke a bonwaala na siiga baa yendo n yaadi. 15A lielo yaa tieni ti tuonbiadi, gedi, fini leni wani yi lie lie, ki waani o o tagili. O yaa tuo a tundi, a ga a lielo yeni. 16Ama o yaa tuo a tundi, ŋan taa niyendo, yaaka niba lie ke mi maama kuli n kadi siedinba lie yaaka siedinba taa yaa ñoana nni. 17O yaa yie kaa cengi ba mo, ŋan waani Kilisiti n yini yaaba taanli. O yaa yie kaa cengi Kilisiti n yini yaaba taanli moko, ŋan yaa nua o nani o nilamo leni o lubigaalo yeni. 18N waani yi i moamoani, yin baa loli yaala ŋanduna nni kuli, li baa loli tanpoli po, yin baa loti yaala mo ŋanduna nni kuli, li baa loti tanpoli po. 19N go waani yi, yi niinni niba lie yaa taani ñoabu ki mia yaala kuli ŋanduna nni, n Baa yua n ye tanpoli baa pa ba la. 20Kelima niba lie bi niba taa yaa taani n yeli nni, n ye bi siiga nni.” 21Lani Pieli den nagini o kani ki yedi: «O Diedo, n lielo yaa tudi npo, n baa tieni opo sugili hali taalima ŋa? Hali taalima lele bi?” 22Jesu den goa ki yedi o: «Mii yedi a hali taalima lele ka, ama n yedi a piilele hali figilima lele. 23Kelima tanpoli diema tie nani yaa bado n den bua o naacenba n waani o ban kubi opo yaa ligi maama fuuli. 24Wan den cili ki coadi yua kuli n kpendinni yaa ligi, bi den cuani o kani yendo ke o pia li panli ke li tie ligiciami. 25Wan ki den pia liba ki baa pa laa panli yeni, o canbaa den yedi ban kuadi o, wani leni o pua leni o bila leni wan pia yaala kuli, ke li panli n gbeni. 26O naacemo den gbaani o nintuali ki yedi: ‹Canbaa, juuni npo, n baa pa ŋa likuli.› 27Mi niñima den cuo o canbaa laa naacemo po ke o puni o sugili o panli kuli po ki cedi wan gedi. 28Laa naacemo n den ñani, o den tuogi o lieba siiga yendo yua den kubi opo kujapiena kobiga. O den bibi o ki cuo o nialu ki yedi o: ‹Pa nni n panli.› 29O lielo yeni den gbaani o taana kani ki mia o sugili ki yedi: ‹Juuni npo, n baa pa ŋa.› 30Ama waa den bua ki tieni sugili. O den taa o ki ban kuani o li kpaadidieli nni hali wan baa pa o panli kuli ki gbeni. 31O lieba n den laa wan tieni yaala kuli, bi pala den biidi boncianla. Bi den gedi ki ban togidi bi canbaa yaala n tieni kuli. 32Lanwani bi canbaa den yini o naacemo yeni ki yedi o: ‹O naacenbiado na, n den cabi a leni a panli kuli kelima a den mia nni. 33Laa pundi ke fini mo n gbadi a lielo po mi niñima nani min gbadi apo maama yeni?› 34O canbaa pali den beni boncianla. O den teni o li kpaadidieli jiidikaaba ban faligi o hali wan pa o panli kuli ki gbeni.” 35Jesu den juodi ki yedi: «N Baa yua n ye tanpoli baa soani yi moko yene, yi siiga yua n kaa puni o lielo sugili leni payenli.”

will be added

X\