MATIYU 16

1Falisieninba leni Sadusieninba tianba den cua Jesu kani ki bua ki biigi o. Bi den mia o wan tieni yaa bancianma n baa tie sinankeeni ki doagidi ke o ñani U Tienu kani. 2Jesu den goa ki yedi ba: «Ku jofangu yi yen yedi: ‹Mi yenma baa tieni saala, kelima tanpoli moani.› 3Ku tiŋaagu mo yi yen yedi: ‹Ki taaga baa mii dinla, kelima tanpoli moandi ki biigidi.› Yi bani ki diidi tanpoli sinankeeninba ki bundi lan yedi yaala, ama yii bani ki diidi yaa sinankeeninba n tiendi n bua ki yedi yaala. 4Moala na niba yaaba n bia ki go ŋa U Tienu sanŋoadima miadi sinankeeni. Bi kan tieni bipo sinankeentoa se Jonasa yua.” Lani, o den fii ki ñani bikani ki ban caa. 5Ban den duodi ki gedi nepo yaa boanjaali, bi ŋoadikaaba den sundi kaa taa dupen. 6Jesu den yedi ba: «Fangi mani yi yula bonŋanla leni Falisieninba leni Sadusieninba dabinli.” 7Bi ŋoadikaaba den bungi bi pala nni: «Li tie kelima tin ki taa dupen yeni yaa po yo.” 8Jesu den bandi ban bungi yaala ki yedi: «Yinba yaaba yaa dandanli n ki fuu, be n teni ke yi bungi ke n maadi yeni kelima yii taa dupen yaa po yo? 9Yi daa kpaagi ki bandi yo? Yii tiadi bi dupenmuudiba leni a nitudimuuda po leni yin den gbieni yaa baabuodi banlu? 10Bi yii tiadi bi dupenleleediba leni a nitudinaada po, leni yin go den gbieni yaa baabuodi banlu? 11Li ga lede ke yii bandi ke min yedi yin fangi yi yula leni Falisieninba leni Sadusieninba dabinli yeni, ke mii maadi dupen po ka?” 12Lanwani bi di den bandi ke laa tie ke o yedi ban fangi bi yula leni dupen yaa dabinli ka, ama ke li tie Falisieninba leni Sadusieninba bangime. 13Jesu n den pundi Filipa diema yaa Sesale, o den buali o ŋoadikaaba yaa buali n tie na: «Bi niba tua ke mini o Ja Bijua tie ŋme?” 14Bi den goa ki yedi o: «Bine tua ke a tie Jan Batisi, bine ke a tie Eli, bine mo ke a tie Jelemi, yaaka bi sawalipuaba siiga nni yendo.” 15O den goa ki buali: «Yi mo te, yi mo nan yedi ke n tie ŋme yo?” 16Simono Pieli den goa ki yedi o: «A tie U Tienu n Gandi Yua, U Tienu yua n fo yaa Bijua.” 17Jesu den goa ki yedi o: «Li pamanli ye leni a, Simono, Jonasa bijua, kelima nisaalo ka waani a la, n Baa yua n ye tanpoli n doagidi apo la. 18N mo yedi a ke a tie Pieli. N baa maa min yini yaaba laa tangu po, baa mi kuuma diema paaciamu kuli kan fidi ki paadi gu. 19N baa teni a tanpoli diema sendabila. Ŋan baa loli yaala ŋanduna nni kuli, li baa loli tanpoli po. Ŋan baa loti yaala mo ŋanduna nni kuli, li baa loti tanpoli po.” 20Lane o den maadi leni o ŋoadikaaba leni li bali, ki yedi ke ban da waani oba ke o tie U Tienu n Gandi Yua. 21Laa yogunu Jesu den cili ki doagidi ki wangi o ŋoadikaaba ke li tie tiladi wan gedi Jelusalema, ke Jufinba nikpeliba leni bi kopadicianba yudanba leni li balimaama bangikaaba n waani o fala boncianla, ke bi niba n kpa o, ama ke o baa fii bi tinkpiba siiga li dataali daali. 22Pieli den piadi o ki jaligi o ki yedi o: «U Tienu n da cedi lan tieni a, o Diedo. Li kan pundi a kani.” 23Ama Jesu den jigidi ki yedi Pieli: «Ña n puoli, Sutaani, a tie npo tingbali bonla, kelima a yantiana naa tie U Tienu yaa yaa, ama bi nisaaliba yaa yantiana.” 24Lani Jesu den yedi o ŋoadikaaba: «Yua n bua ki yaa ŋua nni kuli, wan yie o yuli ki taa o dapoanpoanli ki bugi, ki nan yaa ŋua nni. 25Kelima yua n bua ki ga o miali baa biani li, ama yua n baa biani o miali kelima mini yaa po kuli, baa goa ki le li. 26O nilo yaa baa ki diedi ŋanduna kuli ke o naano nan bodi, li baa ŋanbi opo be? Bi o nilo baa pa be ki lebidi o naano? 27Kelima o Ja Bijua baa ti cua leni o Baa kpiagidi ki yegi leni n malekinba. Laa yogunu o baa guani yua kuli nani o tuona n tie maama. 28N waani yi i moamoani, yaaba n ye nekanba tianba kan kpe kaa laa ke o Ja Bijua cua o diema nni.”

will be added

X\