MATIYU 12

1Laa yogunu Jesu den tagi ki poandi ŋalikama kuani nni mi fuodima daali. Mi koma den pia o ŋoadikaaba ke bi jobidi ŋalikama siandi ki ŋmani. 2Falisieninba n den laa lani, bi den yedi Jesu: «Diidi ki le, a ŋoadikaaba tiendi yaala n kua mi fuodima daali.” 3Jesu den goa ki yedi ba: «Naani yii cogi Dafidi n den tieni yaala mi koma n den cuo o, wani leni yaaba n den ye leni o kuli yoo? 4O den kua U Tienu diegu nni ki ŋmani o dupen bilika, baa ke li den kua wani leni yaaba n ye leni o kuli n ŋmani, kelima bi kopadicianba bebe n den pia u sanu ki ŋmani o. 5Bi, naani yii cogi li balimaama nni ke bi kopadicianba tuuni U Tienu diegu nni mi fuodima daali ki miidi li daali yeni kuali, ki naa pia lipo tagili yoo? 6N yedi yi, yua n cie U Tienu diegu boncianla ye ne. 7Yi yaa bi bani yaa maama n tie na yaa bundima: Mi niñingbadima n mani npo, laa tie a pada ka, yi kan bi jaligi yaa niba n kaa pia tagili na. 8Kelima o Ja Bijua n die mi fuodima daali.” 9Jesu den ñani lankani ki gedi ki ban kua bi balimaama bangima dieli nni. 10O ja den ye likani ke o nuu faani. Bi den buali Jesu: «Naani li pia u sanu ki paagi o nilo mi fuodima daali?” Li den tie ke ban fidi ki kuli o. 11O den goa ki yedi ba: «Yi niinni ŋme baa pia peyendo bebe wan baa ku buogu nni mi fuodima daali, ke o kan mubini o ki ñani o lienni? 12Ama o nisaalo cie o pia boncianla. Lanwani li pia u sanu ki tieni yaala n ŋani mi fuodima daali.” 13Lani o den yedi o ja yeni: «Tandi a nuu.” O den tandi u ke u paagi cain nani u lielu yeni. 14Falisieninba den ñani ki ban juogi ban baa tieni maama ki teni ban kpa Jesu. 15Ama Jesu den bandi la ki ñani likani. Bi niba boncianla den ŋua o. O den paagi a yiama kuli, 16ki teni ba li ñoabonli ke ban da ban waani wan tie yua. 17O den tieni yeni ke o sawalipualo Esayi n den pua yaa sawalo n tieni: 18«Diidi min gandi n naacemo yua, Wani n buado, n pali n mani yua yaa po boncianla. N baa kuani n Fuoma o niinni Wan yaa wangi i nibuoli mi teginma. 19O kan koani leni oba, O kan tiani baa waamu, Bi kan gbadi o nialu i sani nni. 20O kan kua ki dudi yaa ñinkankagili n diegi, O kan gbindi yaa fidisancabigu n ŋubidi, Hali wan baan teni mi teginma n paadi. 21I nibuoli kuli baa bili bi suginma o kani.” 22Lani n pendi bi niba den cuani Jesu kani yaa cicibiadiga daano n tie juamo ki go tie muulo. Jesu den paagi o, ke o muulo yeni maadi ki go nua. 23Li den paki ku niligu kuli ke bi yedi: «One ki tie Dafidi Bijua kaa?” 24Falisieninba n den gbadi la, bi den yedi: «O naa ja deli mu cicibiadimu kelima Belisebu yua n tie mu cicibiadimu bado yaa paalu po.” 25Jesu den bani ban maliti yaala yeni, ki den yedi ba: «Yaa diema n boagidi ki tuogi leni mi yuli kuli baa bodi. Yaa dogu yaaka yaa diegu yaa niba n paadi ki tuogi leni biyaba kuli kan yaa ye. 26Sutaani yaa deli Sutaani, o tuogi leni o yuli. O diema baa tieni lede ki yaa ye? 27Li yaa tie ke Belisebu n puni nni u paalu ke n deli mu cicibiadimu, yi yaa ŋoadikaaba mo deli mu ŋme yaa yeli nne? Lani yaa po bi baa jia yi leni ti buudi. 28Ama li yaa tie U Tienu Fuoma Yua yaa paalu po yo ke n deli mu cicibiadimu, lani U Tienu diema pundi hali yikani. 29O nilo baa fidi ki kua o gbanmandaano dieli nni lede ki fagi o piama, kaa kpa paadi o ki loli o? Li yaa puole o baa fidi ki kua o dieli nni ki fagi o piama. 30Yua n ki taa npo kuli tie n yieka. Yua n ki todi nni ke n taandi nan yadi wani. 31Li tie lani yaa po ke n yedi yi, bi nisaaliba baa baa sugili tuonbiadi leni sugidi kuli po, ama yua n sugi U Tienu Fuoma Yua kan baa sugili. 32Yua n maadi mini o Ja Bijua po yaala n bia baa baa sugili, ama yua n maadi U Tienu Fuoma Yua po yaala n bia kan baa sugili moala leni yaa yogunu n kpendi kuli. 33Tuo mani ke bu tibu ŋani ke bu bonluonkaala mo ŋani, yeni yaaka ke bu tibu ki ŋani ke bu bonluonkaala mo ki ŋani. Bi bandi tibu kuli bu bonluonkaala po yo. 34Yinba, u waalabi-buolu na, yin bia maama na, yi baa ga lede ki fidi ki maadi yaa maama n ŋani? O nilo maadi yaala n gbie o pali nne. 35O niŋamo ñandi yaala n ŋani o pali yaali n ŋani nni. O nibiado mo ñandi yaala n bia o pali yaali n bia nni. 36N waani yi ke ti buudi daali bi niba baa togidi ban den maadi yaa mafanma kuli. 37Kelima a maama po baa teni ban saa apo i moamoani, a maama po go baa teni ban bu ki cuo ŋa.” 38Li balimaama bangikaaba tianba leni Falisieninba tianba den yedi Jesu: «Canbaa, ti bua ŋan tieni tipo yaa bancianma n tie sinankeeni.” 39O den goa ki yedi ba: «Moala na niba yaaba n bia, ki go ŋa U Tienu sanŋoadima yeni miadi sinankeeni. Bi kan tieni bipo sinankeentoa li yaa tie o sawalipualo Jonasa yua yaaka. 40Nani Jonasa n den tieni dana taa leni ñadi taa o janciamo tugu nni maama, o Ja Bijua moko baa tieni dana taa leni ñadi taa ki tinga nni yene. 41Ninife dogu yaaba moko baa taani ki fii ki sedi leni moala na niba ti buudi daali ki bu ki cuo ba, kelima Jonasa n den waani ba U Tienu maama, bi den lebidi bi yama. Ama moamoani, yua n cie Jonasa ye ne. 42Yaa diema n ye niganu po yaa pobado moko baa taani ki sedi leni moala na niba ti buudi daali ki bu ki cuo ba, kelima o den ñani hali hali foagima ki cua ki cengi Salomono yanfuoma maama, ama yua n cie Salomono ye ne. 43Ki cicibiadiga yaa ñani o nilo niinni, ki yen gedi ki ban yaa gaandi yaa fuali n ki pia ñima nni, ki lingi mi fuodima, ki nan kan baa. 44Lanwani ki baa yedi: ‹N baa lebidi ki guani n dieli po min den ñani naani.› Ki yaa pundi, ki baa sua ke li tie dieyaanli ki pidi ki ŋanbi. 45Lanwani ki baa gedi ki ban taa cicibiadimu lele, yaamu n bia ki cie kani kiba, mun yegi ki ban kua li niinni ki yaa ye. Laa nilo yeyuankaama baa bia ki cie mi kpiama. Li baa tua yeni moala na niba yaaba n baa bia po.” 46Jesu n den maadi leni ku niligu, o naa leni o waamu den cua ki se niinpo ki bua ki maadi leni o. 47Niyendo den yedi o: «A naa leni a waamu se niinpo ki bua ki maadi leni a.” 48Jesu den goa ki yedi yua n waani o yeni: «Ŋme tie n naa, ŋmenba mo n tie n waamu?” 49O den tandi ki waani o ŋoadikaaba ki yedi: «Diidi, n naa leni n waamu nna. 50Kelima yua n tuo ki tiendi n Baa yua n ye tanpoli yaa yanbuama, wani n tie n naataanjaga leni n naataanpuoga leni n naa.”

will be added

X\