MATIYU 10

1Jesu den yini o piiga n ŋoadikaliediba ki dini ba li bali ki puni ba u paalu ban yaa deli ki ñandi mu cicibiadimu mun ye yaaba yaa niinni, ki go yaa paagidi bi niba leni ban pia yaa yianbuoli leni yaa tadinbuoli kuli po. 2Bi piiga n tondiliediba yeni yela n tie na. Yua n kpia, Simono ban go yi yua Pieli leni o waalo Andile, Sebede bijua Jaka leni o waalo Jan, 3Filipi leni Batelemi, Toma leni o lubigaalo Matiyu, Alife bijua Jaka leni Tade, 4Simono ban yi yua o Yankuadaano leni Judasa Isikalioto yua n den yuandi ki janbi Jesu. 5Bani n tie Jesu n den soani o piiga n niliediba yaaba ki teni ba yaa ñoabonli n tie na: 6«Da gedi mani bi nilanba po, ki da kua Samali yaaba dogi nni mo, ama yin gedi Isalele buolu yaaba po, bani yaaba n tie nani yaa pe n yaadi yeni. 7Yin tagi naankani kuli, yin yaa wangi ke U Tienu diema kuli. 8Yin yaa paagidi a yiama, ki fiindi bi tinkpiba, ki ŋanbidi a gbaada, ki deli mu cicibiadimu. Yi den baa fanma, yimo n yaa puuni fanma. 9Da ŋuuni mani wula, yaaka ŋanjilifa, yaaka i ligi kuli yi ŋuuni nni, 10ki da taa sancenboagili, yaaka liaditedimu lie, yaaka cacaadi, yaaka gbiamu, kelima o tuonsoanlo pundi ki baa o bonjekaala. 11Yin kua yaa dociamu nni leni yaa dowaalu nni kuli, yin buali ki bandi yaa nilo n baa tuo ki ga yi cangu yaa ye likani. Yin caani o yaa deni hali yin baan fii yaa yogunu. 12Yi yaa kua yaa diegu nni kuli, yin fuondi ba ki yedi: ‹Mi yanduanma n yaa ye leni yi.› 13Yi yaa sua ke ku diegu yaaba ga yi cangu, yin gaali ba yaa yanduanma n yaa ye leni ba. Ama bi yaa ga yi cangu mo, yi gaali n guani yikani. 14Bi yaa tuo ki ga yi cangu dieguba nni leni doguba nni kuli, kaa cengi yi maama mo, yi yaa ña likani, yin kpia ba yi taatama. 15N waani yi i moamoani, ti buudi daali Sodoma leni Gomola yaaba yaa fala kan pundi laa dogu yaaba yaa fala. 16Cengi mani: N soani yi nani i pe yene i fuasangbanli siiga. Yin yaa fani nani i we yeni, ki go yaa dingi nani mu kpaajiemu yeni. 17Fangi mani yi yula leni bi niba, kelima bi baa co ki caani yi li bujiali kani. Bi baa pua yi i baliji li balimaama bangima diena nni. 18Bi baa caani yi gufeneelinba kani leni bi badiba kani kelima n yaa po, ke yin tua bipo siedi bani leni bi nilanba po kuli. 19Bi yaa ti cuo ki gedini yi li bujiali kani yaa yogunu, yin da yagi mani yi yama yin baa maadi maama leni yin baa yedi yaala kuli po, kelima lanyogunu bi baa pa yi yin baa yedi yaala. 20Kelima laa tie yinba ka baa maadi, yi Baa Fuoma, yaama n ye yi niinni, n baa maadi. 21Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po ki cuo ba ki teni ban kpa ba. 22Bi niba kuli baa nandi yi kelima n yeli po. Ama yua n baa juuni hali mi juodima baa tindi. 23Bi yaa waani yi o falabiado doyendu nni, sani mani ki gedi dotogu. N waani yi i moamoani, yi kan gaani Isalele yaaba dogi nni kuli ki gbeni ke o Ja Bijua daa cua. 24O ŋoadika ki cie o canbaa, o naacemo mo ki cie o daano. 25Li dagidi o ŋoadika n yaa tie nani o canbaa, o naacemo mo n yaa tie nani o daano yeni. Bi yaa yini o diedaano Belisebu, laa pia tama ke bi baa sugidi o diegu nni yaaba ki cie. 26Lanwani yin da jie ba, kelima liba kuli ki ye ki wuo ki kan wuodi. Liba kuli ki ye ki duagi ke bi kan bandi la. 27Min yedi yi yaala li biigili nni, waani li mani u yensiinu, ban soabidi yaama yi tuba nni, kpaani ma mani a diena po. 28Da jie mani yaaba n baa kpa ti gbanandi, ama ki nan kan fidi ki kpa o naano. Ama yin yaa jie mani yua n baa fidi ki bolini o naano leni ti gbanandi kuli ku fantanbuogu nni. 29Baa kuadi nuani lie lie ka falini? Ama baa nuanyenga bi siiga kan baa tiipo ke yi Baa U Tienu ki bua. 30To, yinba, baa yi yudi, yi Baa bani ti coali kuli n da maama. 31Lanwani yin da jie mani pu kuli, yi pia mayuli ki cie i nuani boncianla. 32Lani yaa po yua n tuo nni bi niba nintuali, n moko baa tuo o n Baa yua n ye tanpoli nintuali. 33Ama yua n nia nni bi niba nintuali, n moko baa nia o n Baa yua n ye tanpoli nintuali. 34Yin da tama ke n cua ki baa teni mi yanduanma n yaa ye ŋanduna nni ka. Mii cua ki baa teni mi yanduanma ka n yaa ye, ama n cuani bu toabu. 35Kelima n cua ki baa teni ki bonjaga n paadi leni o baa, ki bonpuoga n paadi leni o naa, ki biyuaga n paadi leni o yaanaa. 36O nilo yibalinba baa tie o diegu nni yaaba. 37Yua n bua o baa yaaka o naa ki cie mini, waa pundi ki yaa tie n ŋoadika. Yua n bua o bijua yaaka o bisalo ki cie nni, waa pundi ki yaa tie n ŋoadika. 38Yua kaa taa o dapoanpoanli ki bugi ki ŋua nni, waa pundi ki yaa tie n ŋoadika. 39Yua n bua ki kubi o miali baa biani li. Ama yua n baa biani o miali kelima mini yaa po baa le li. 40Yua n ga yi cangu ga mini yaa cangoe, yua n ga n cangu mo ga yua n soani nni yaagoe. 41Yua n ga o sawalipualo cangu kelima o tie sawalipualo po, baa baa o sawalipualo n baa baa yaa panpaani. Yua n ga o niteginka cangu mo kelima o tie niteginka po, baa baa o niteginka n baa baa yaa panpaani. 42N waani yi i moamoani, n ŋoadikaaba na siiga, baa yua yaa jigidi n wa ki cie, yua n puni o mi ñinsoangima ke o ñuni kelima o tie n ŋoadika kuli kan luo o panpaani.”

will be added

X\