MATIYU 1

1Jesu Kilisiti yaajanba yela togida ye ne. Jesu Kilisiti den tie Dafidi bijua, leni Abalahama bijua. 2Abalahama den mali Isaaka, Isaaka n maa Jakobo, Jakobo n maa Juda leni o kpeliba leni o waamu. 3Juda den taa Tamala ki mali Peletisa leni Sela, Peletisa n maa Etisilomo, Etisilomo n maa Alama, 4Alama n maa Aminadabi, Aminadabi n maa Nasona, Nasona n maa Salimono, 5Salimono den taa Lahaba ki mali Boasa. Boasa den taa Luta ki mali Obedi, 6Obedi n maa Isayi, Isayi n maa o bado Dafidi. Dafidi den taa Uli pua ki mali Salomono, 7Salomono n maa Loboami, Loboami n maa Abia, Abia n maa Asa, 8Asa n maa Josafati, Josafati n maa Yolami, Yolami n maa Osiasi, 9Osiasi n maa Yotami, Yotami n maa Akasi, Akasi n maa Esekiasi, 10Esekiasi n maa Manase, Manase n maa Amoni, Amoni n maa Josiasi, 11Josiasi n maa Jekonia leni o waamu, Babilona yaaba n den paadi Isalele yaaba yaa yogunu, ki cuo ba ki gedini ti yonbidi bi diema nni. 12Isalele yaaba yonbidi Babilona diema nni n pendi, Jekonia den mali Salatieli, Salatieli n maa Solobabeli, 13Solobabeli n maa Abiyudi, Abiyudi n maa Eliakimi, Eliakimi n maa Asolo, 14Asolo n maa Sadoka, Sadoka n maa Akima, Akima n maa Eliyudi, 15Eliyudi n maa Eleyasala, Eleyasala n maa Matana, Matana n maa Jakobo, 16Jakobo n maa Josefi, Maliyama calo, yaa pua n den mali Jesu ke bi yi o Kilisiti. 17A yaa coadi ki cili Abalahama ki yaa caa hali Dafidi, li pia piiga n nifiima naa. Ki cili Dafidi ki yaa caa hali Babilona cuonu mo, piiga n nifiima naa. Ki cili Isalele yaaba yonbidi Babilona diema nni ki yaa caa hali U Tienu n Gandi Yua cuama, mo tie piiga n nifiima naa. 18Diidi Jesu Kilisiti madi n den tua maama. O naa Maliyama n da den tie Josefi toginaa hali ke bi daa den taani leni biyaba, Maliyama den ti sua ke o punbi kelima U Tienu Fuoma Yua paalu po. 19O togibaa Josefi yua n den tie niteginka, naa den bua ki fiagi o a sala nni. Lani yaa po o den jagi ke o baa paadi leni o ŋasiili nni. 20Wan den maliti yeni yaa yogunu, o Diedo maleki den doagidi o kani ti dangidi nni ki yedi o: «Josefi, Dafidi bijua, ŋan da jie ki taa Maliyama wan tua a pua. Kelima wan punbi yaa biga, o punbi ga kelima U Tienu Fuoma Yua yaa paalu po. 21O baa maa bonjaga, ŋan yini o Jesu, kelima wani n baa faabi o niba leni bi tuonbiadi.” 22Lankuli den tieni ke o Diedo n den tuodi ki teni ke o sawalipualo pua yaa sawalo n tieni: 23«Diidi, li powandiali baa punbi ki maa bonjaga. Bi baa yini o Emanuweli.” Laa yeli bundima n tie "U Tienu ye leni ti." 24Josefi n den fundi, o den tieni o Diedo maleki n waani o yaala. O den taa o pua. 25Ama waa den taani leni o hali wan ban mali o biga. Josefi den yini o Jesu.

will be added

X\