MAKA 8

1Laa dana nni, ku niligu n go den taani boncianla, ke baa den pia ban baa je yaala, Jesu den yini o ŋoadikaaba ki yedi ba: 2” Mi niñima cuo nni ku naa niligu po kelima dana taa nna ke bi ye n kani, baa go pia ban baa je yaala. 3N yaa cabi ba leni mi koma ke ban kuni, bi baa gbali u sanu nni, kelima bi tianba ñani hali foagima.” 4O ŋoadikaaba den goa ki yedi o: “O nilo baa fidi ki baa yaa jiema n baa dagidi bine kuli po li naa fuali nni?” 5Jesu den buali ba: “Yi pia dupen ŋa yo?” Bi den goa ki yedi o: “Bonba lele.” 6Jesu den teni ke ku niligu kakali tiipo, ki taa bi dupenleleediba ki tuondi U Tienu, ki cabidicabidi ki teni o ŋoadikaaba ban boagidi ku niligu, ke bi den boagidi. 7Bi go den pia janbimuba moko. Jesu go den tuondi U Tienu mupo, ki teni ban boagidi muni mo. 8Bikuli den dini ki guo. Bi den wodi ban dini ki sieni yaa boncaba ki gbieni baabuociandi lele. 9Bi den bua ki pundi niba tudanaa (4,000). Jesu n den cabi ba yaa yogunu, 10o den kua ku ñinbiagu nni wani leni o ŋoadikaaba, ki duodi ki gedi Dalimanuta tinbuoli nni. 11Falisieninba den cua ki nia leni Jesu ki mia o wan tieni yaala n tie sinankeeni ke o paalu ñani U Tienu kani, kelima bi den dia o ku madiagu. 12Jesu den fuo ki jiini ki yedi: “Be n teni ke moala na niba lingi sinankeeni yeni? N yedi yi i moamoani, bi kan tieni moala na niba po sinankeeni.” 13Lani o den fii ki ŋa ba ki go kua ku ñinbiagu nni ki duodi ki gedi nepo yaa boanjaali. 14Bi ŋoadikaaba den sundi kaa taa dupen. Baa den pia jetoama ku ñinbiagu nni, kali dupen yendo bebe. 15Jesu den tundi ba ki yedi: “Yin fangi mani yi yula bonŋanla leni Falisieninba leni Elodo dabinli.” 16O ŋoadikaaba den bungi ki yedi biyaba: “Li tie kelima tin kaa pia dupen yeni yaa po yo.” 17Jesu den bandi la ki yedi ba: “Be yaa po ke yi bungi ki tama ke n maadi yeni kelima yii pia dupen po? Yi daa kpaagi ki faami hali moala? 18Yi yama baa pii yoo? Yi pia i nuni ki naa nua yoo? Yi go pia a tuba ki naa gba yoo? Naani yii tiani? 19Min den taa bi dupenmuudiba ki cabidicabidi ki boagidi a nitudimuuda, yi den taani yaa boncaba n sieni baabuodi ŋa?” Bi den goa ki yedi o: “Piiga n bondi lie.” 20“Min go den taa bi dupenleleediba ki cabidi ki boagidi a nitudinaada, yi den taani yaa boncaba n sieni baabuociandi ŋa?” Bi den goa ki yedi o: “Bondi lele.” 21O den yedi ba: “Yi daa kpaagi ki bandi hali moala yoo?” 22Jesu leni o ŋoadikaaba n den pundi Betisayida, bi niba den cuani o juamo Jesu kani ki mia o ke wan sii o. 23O den cuo o juamo nuu ki dadi ki ñani o u dogu nni. O den sii o ñinsandi o juamo nuni nni ki maani opo o nii, ki buali o o yaa nua bonla. 24O den ŋubidi ki noanli ki yedi: “N nua bi niba, ama n nua ba ke bi tie nani i tiidi yeni ki cuoni.” 25Jesu go den maani o nii o nuni po, ke o juamo den nudi ki noanli ki laa li bonla kuli cain. O den paagi. 26Jesu den cabi o wan kuni o denpo, ki maadi o ki yedi: “Da go kua u dogu na niinni.” 27Jesu leni o ŋoadikaaba den suagi liiga ki caa Filipi yaa Sesale yaa tinkundogi. Ban den ye u sanu nni o den buali ba: “Bi niba tua ke n tie ŋme?” 28Bi den goa ki yedi o: “Bi tianba tua ke a tie Jan Batisi, bine ke a tie Elia, bine mo ke a tie bi sawalipuaba siiga nni yendo.” 29Ama o den buali bani biba: “Yi mo te, yi mo nan yedi ke n tie ŋme yo?” Pieli den goa ki yedi o: “A tie U Tienu n Gandi Yua.” 30Jesu den teni ba li ñoabonli ki yedi ba ke ban da waani oba wan tie yua. 31Laa yogunu Jesu den bangi o ŋoadikaaba ke li tie tiladi o Ja Bijua n le fala boncianla, ke bi nikpeliba leni bi kopadicianba yudanba leni li balimaama bangikaaba baa yie o ki teni ban kpa o. Ama o kuuma dataali daali po, o go baa fii bi tinkpiba siiga. 32O den kadi ki waani ba laa bonla. Pieli den piadi o, ki funi leni o. 33Ama Jesu den jigidi ki diidi yaa ŋoadikaaba n sieni, ki funi leni Pieli ki yedi: “Ña n puoli, Sutaani, kelima a yantiana naa tie U Tienu yaa yaa, ama bi nisaaliba yaa yantiana.” 34Lani Jesu den yini ku niligu ke ku nagini o kani ki taani leni o ŋoadikaaba ke o yedi ba: “Yua n bua ki yaa ŋua nni kuli, wan yie o yuli ki taa o dapoanpoanli ki bugi ki nan yaa ŋua nni. 35Kelima yua n bua ki ga o miali baa biani li. Ama yua n baa pa o miali n yaa po leni o Laabaaliŋamo yaa po kuli, go baa baa li. 36O nilo yaa baa ki diedi ŋanduna kuli ke o naano nan bodi, li baa ŋanbi opo be? 37O nilo baa pa be ki lebidi o naano? 38Kelima yua n jie i fe npo leni n maama po bi naa niba, yaaba n tie tuonbiadi danba ki go conbi yeni yaa siiga, o Ja Bijua mo baa jie laa nilo po i fe o yaa ti cua leni o Baa kpiagidi nni ki yegi leni yaa malekinba yaaba n gagidi yaa yogunu.”

will be added

X\