MAKA 7

1Falisieninba leni li balimaama bangikaaba bi tianba, yaaba n den ñani Jelusalema, den taani ki cua Jesu kani. 2Bi den laa ke o ŋoadikaaba bi tianba di leni i nijoagimi kaa nidi. 3Li tie ke Falisieninba leni yaa Jufinba n sieni kuli kan je, kali ban kpa nidi bonŋanla, kelima bi ŋua bi nikpiaba bogida. 4Bi yaa go ñani ki daaga po ki kpeni, bi kan je kali ban kpa taa mi ñima ki ŋanbi biba ki ñani li kuali. Bi go kubi danbogiditoana boncianla, nani ya n tie na, mu tadiñokaamu leni a cuana leni ti kumoandi tadimu kuli ŋuudima. 5Falisieninba leni li balimaama bangikaaba yeni den buali Jesu: “Be n teni ke a ŋoadikaaba ki kubi ti nikpiaba bogida, ki di leni i nijoagimi?” 6Jesu den goa ki yedi ba: “Yinba pala lie danba, Esayi den pua yipo yaa sawalo na tie moamoani. O den yedi: ‹Bi naa niba jigindi nni leni bi ñoacuuna, Ama bi pala foagi leni nni. 7Bi jaandi nni fanma fanma Ki bangi yaa bangima N tie bi nisaaliba yaa mabilikaama bebe.› 8Yi ŋa U Tienu balimaama, ki nan ŋua bi nisaaliba jaanma bogida.” 9O go den yedi ba: “Yin luni U Tienu maama ki ŋua yi bogida yeni, 10Musa den yedi: ‹Jigini a baa leni a naa,› ki go yedi: ‹Yua n soli o baa yaaka o naa, ban kpa o.› 11Ama yinba, yi yedi ke o nilo yaa yedi o baa, yaaka o naa, ke wan den baa todi ba leni yaala tie yaa paabu n gagidi U Tienu po, ban yi yaabu "kolibana." 12Lani yi kan go tuo wan todi o baa yaaka o naa liba kuli. 13Yeni yi luni U Tienu Maama kelima yin ga yaa bogida ki bangi nitoaba, ban yaa tiendi yeni. Yi go kubi bontoala ke li yaba ki naani leni la.” 14Jesu go den yini ku niligu ke ku nagini o kani ke o yedi gu: “Yikuli n cengi mani nni ki bandi line. 15Laa tie yaala n ki ye o nisaalo nni kuli ka baa kua o niinni ki joagini o. Ama yaala n ye o niinni ki ña yeni, lani n joagini o. 16Yua n pia a tuba ki baa gbadi, wan gbadi.” 17Jesu n den fii ku niligu kani ki kua li dieli nni, o ŋoadikaaba den buali o mi kpanjama yeni bundima. 18O den yedi ba: “Yi moko, yii pia yanfuoma yoo? Yii bani ke pu kuli ki ye niinpo ki baa kua o nilo niinni, ki fidi ki joagini o? 19Kelima li nan kan kua o pali nni, ama o tugu nni, ki go baa ña.” Jesu n den yedi yeni, o den doagidi ke jiemaba kuli kan joagini o nilo. 20O go den yedi: “Yaala n ye o nisaalo pali nni ki ña, lani n joagini o. 21Kelima o nisaalo pali nne ke ti yanmaalibiadi ña. Lani n tie: Mi conconma buoli kuli, bu subu, mi kukpama, mi ŋalimanbuama, ku tugutongu, i janbi, ki puuni bi yula ti tuonjoagindi tienma po, ki pia li nunponbiadili leni ti sugidi leni ti japaadi leni mi yanpiima kuli. 23Laa bonbiadila kuli ña o nisaalo nni ki tendi ke o joagini.” 24Jesu den fii lankani, ki gedi Tili tinbuoli nni. O den kua o candeni kaa bua oba kuli n bandi ke o ye likani, ama waa den fidi ke baa bandi. 25Kelima yaa pua ke ki cicibiadiga den ye o bisalo niinni, den gbadi ke bi maadi Jesu maama. O den cua ki gbaani o taana kani. 26Laa pua den tie Gileka, Fenisi yua, Sili diema yaa tinbuobiga. O den mia Jesu ke wan deli ki ñani ki cicibiadiga o bisalo niinni. 27Jesu den yedi o: “Cedi a bila n kpa je ki guo, kelima laa ŋani o nilo n taa a bila jiema ki lu a sangbanbila.” 28O pua yeni den goa ki yedi o: “Yeni de, Canbaa, die yaa sangbanbila n laabi u saajekaanu kani yeni di a bila jejoagidi.” 29Jesu den yedi o: “Kelima ŋan maadi yaa maama na yaa po, fii ki kuni, ki cicibiadiga ñani a bisalo niinni.” 30O pua yeni n den ñani ki kuni o denpo, o den ban sua ke ki cicibiadiga ñani o biga niinni, ke o dua u duanu po. 31Jesu den fii Tili tinga nni ki tagi Sidoni, ki go lindi ki tagini Dekapola diema, ki ñani ki ban caa Galile ñincianma po. 32Bi niba den cuani o kani o womo, ke mi maama pa opo. Bi den mia o ke wan maani o nii opo. 33Jesu den taa o ki piadi ki foagidi leni ku niligu, ki tuuni o nubila o womo tuba nni, ki go taa o ñinsandi ki sii o womo lanbu. 34Lani o den yaadi ki noanli tanpoli po, ki fuo ki jiini ki yedi: “Efata,” lani tie: "Pigidi." 35Lanyogunu liga o womo tuba den pigidi, o lanbu mo n tabidi, wan di yaa maadi bonŋanla. 36Jesu den yedi ba ke ban da maadi niloba laa bonla, ama wan den tua ban da maadi ki pugidi yo, ke bi mo den kpaani wan tieni yaala ki pugidi. 37Li den paki ba hali hali boncianla ke bi den tua: “O bontienkaala kuli ŋani. O tendi baa ke a woma gba ke a muula mo maadi.”

will be added

X\