MAKA 4

1Jesu go den ye mi ñincianma kunu, ki bangi bi niba. Ku niligu den taani o kani boncianla hali ke o kua ki kali ku ñinbiagu nni mi ñima nni. Ku niligu kuli den ye li wali po. 2O den pua mi kpanjama ki bangi ba bonla boncianla, ki yedi ba o bangima yogunu: 3“Cengi mani. O kpakpaalo den ñani ki baa pagi o bonbuoli. 4Wan den pagini, i tiami den baa u sankunu ke ti bonyugiditi den cua ki dini yi. 5I tiami mo den baa a tancaga nni, mi tama n ki yaba naani. I den pudi tontoni kelima mi tama ki yaba likani. 6Ama u yienu n den paagi, i den mali ki kuodi kelima jiinmoani ki den ye. 7I tiami mo den baa ti konkondi nni. Ti konkondi den fii leni i ki dini i, ke yii loni. 8I tiami mo den baa ki tinŋanga nni. Yi den pudi ki kpedi ki pugidi, ki loni. I tiami den loni bonbiyenbu piitaa taa, i tiami piiluoba luoba, i tiami mo kobiga kobiga.” 9Lani Jesu go den yedi ba: “Yua n pia a tuba ki baa gbadi, wan gbadi.” 10Jesu den foagidi leni ku niligu, yaaba n ŋua o leni bi piiga n niliediba den buali o mi kpanjama yeni bundima. 11O den yedi ba: “U Tienu puni yinba ke yin bandi yaa moamoani n duagi nitoaba po, lani n tie wani U Tienu diema n baa tie maama. Ama yaaba n ki tie yi siiga yaaba, n baa pua ba mi kpanjama lankuli po, 12ke ban yaa nua leni bi nuni ki nan da le bi yama nni, ki go yaa cengi leni bi tuba ki nan da bandi liba, ke ban da lebidi bi yama ki goa U Tienu kani, ki baa bi tuonbiadi sugili.” 13Jesu go den yedi: “Yii bandi mi naa kpanjama bundima yoo? Li yaa tie yeni, yi baa ga lede ki bandi yaa kpanjama n sieni? 14O kpakpaalo n pagini yaala tie U Tienu maama. 15Bi nitianba tie nani yaa bonbi n baa u sankunu yeni. Bi yaa gbadi ma yaa yogunu, Sutaani n cua ki ñani yaa maama n pagi bi pala nni. 16Bi nitianba mo tie nani yaa bonbi n baa ki tancaliga nni yeni. Bi yaa gbadi mi maama yaa yogunu bi yen ga ma tontoni leni li pamanli, 17ama baa pia jiinmoani bi pala nni. Bi kan juuni ki sedi. Mi yebiadima yaa cua, bi bi niba yaa waani ba fala kelima mi maama po, tontoni se ban gbali ki baa. 18Bi nitianba mo tie nani yaa bonbi n baa ti konkondi nni yeni. Bani mo n tie yaaba n gbadi mi maama, 19ama mi yema yanyagidi, leni mi ŋalimani boandi, leni bonbuakatoala kuli yen taani ki je mi maama, ki teni ke mi kan luoni pu. 20Bi nitianba mo tie nani yaa bonbi n baa ki tinŋanga nni yeni. Bani n tie yaaba n gba mi maama, ki ga ma ki luoni. Bi nitianba luoni bonbiyenbu piitaa taa, bi tianba piiluoba luoba, bi tianba mo kobiga kobiga.” 21Jesu go den yedi ba: “Bi baa cuoni ki fidisanga ki taa li sancianli ki ŋoagini ga bi, bi baa sieni ga u duanu tiipo yo? Naani baa baa tuani ga u fidisantuankaanu po ka? 22Liba kuli ki ye ki wuo ki kan wuodi. Liba kuli ki ye ki duagi ki kan doagidi. 23Yua n pia a tuba ki baa gbadi wan gbadi.” 24O go den yedi ba: “Fangi mani yi yula leni yin gba yaa maama na. U Tienu baa taa yin bigidi nitoaba po leni yaa bonbiigikaala, ki biigi yi mo yaa po, ki pugini yipo moko. 25Bi baa pa ki pugini yua n pia, ama yua n ki pia, bi baa ga o kani baa wan pia yaala.” 26Jesu go den yedi: “U Tienu diema tie nani o nilo n pagi o bonbuoli u kuanu nni yeni. 27Wan goa, bi wan nua, li yensiinu leni li ñiagu kuli, i bonbuoli baa pudi ki go kpedi ke waa bani lan ga maama. 28Ki tinga n tuuni la kani kiba. Li yen cili ti kagicandi, ki ŋoadi ti siandi, ki ŋoadi mi bima. 29Li bonluonkaala yaa beni, laa yogunu o baa kua lienni leni o moaciegu, kelima u jetaagu pundi.” 30Jesu go den yedi: “Ti baa nandi U Tienu diema leni be? Ti baa pua lipo mi laa kpanjama? 31Li tie nani yaa kpintiigu bonbibu n wa ki yi mutaadi bonbibu yeni. Ban buli bu u kuanu nni yaa yogunu, bu wa ki cie ŋanduna bonbi kuli. 32Ama bu yaa buli, bu yen pudi ki kpedi ki cie ti kpintiidi kuli, ki toa i benciami, hali maama ke ti bonyugiditi baa fidi ki yaa tiendi bi tiana bu soangu nni.” 33O den pua kpanjatoama boncianla yaama n naani leni yaama n tie na, ki wangi bi niba o Laabaaliŋamo nani ban baa fidi ki ga maama. 34Waa den maadi leni ba kaa pua mi kpanjama. Ama wani leni o ŋoadikaaba yaa den piadi ki ye bi bebe, o yen bundi bipo mikuli. 35Laa daali yenjuogu Jesu den yedi o ŋoadikaaba: “Tin duodi mani nepo yaa boanjaali.” 36Lani bi den cabi ku niligu ki kua Jesu n ka yaa ñinbiagu nni ki baa duoni o. Ñinbiatoadi moko den yegi leni o. 37Ku faabiadigu den fii, ki figi ki fiindi a ñinguona ke a baali ku ñinbiagu nni hali ke ku bua ki gbie. 38Ama Jesu den dua ki goa ku ñinbiagu juodima ki kuli o yuli li yukuli. Bi den fundi o ki yedi o: “Canbaa, laa yia ŋa leni tin baa bodi yeni?” 39O den fundi ki maadi leni ku faagu leni li bali ki yedi: “Cedi ku fuugu,” ki go yedi mi ñincianma: “Suoni.” Ku faagu den cuo ki sedi ke likuli duani salam. 40Lani Jesu den buali ba: “Be n teni ke yi jie nanda? Yii daani yoo?” 41Li fangili leni ti jawaandi den cuo ba boncianla ke bi yedi biyaba: “One wani daa, o tie ŋme ke baa ku faagu leni mi ñincianma kuli tuo ki tiendi wan yedi yaala?”

will be added

X\