MAKA 3

1Jesu go den kua li balimaama bangima dieli nni. O ja den ye likani ke o nuu faani. 2Yaaba n den ye likani den kpaagi ki baa le Jesu yaa baa paagi o ja yeni mi fuodima daali, ke ban baa ki kuli o. 3Jesu den yedi yua yaa nuu n faani: “Fii ki sedi siiga nni ne.” 4Lani o den yedi ba: “Li balimaama tuo tin tieni bi niba po yaala n ŋani mi fuodima daali bi, bi yaala n bia yo? Tin ga o nilo miali bi, bi tin kpa o yo?” Bi den ŋmini suo. 5Jesu pali den biidi boncianla kelima bi pajuaga po, ke o diidi ki lindi ba leni li pabienli, ki yedi o ja yeni: “Tandi a nuu.” O den tandi u ke u paagi. 6Lanyogunu Falisieninba den ñani ki ban taani leni o bado Elodo buakaaba ki juogi ban baa tieni maama ki teni ban kpa Jesu. 7Jesu leni o ŋoadikaaba den piadi ki go gedi mi ñincianma po. Yaa niligu n yaba den ñani Galile nni ki ŋua o. 8Jude diema nni yaaba, leni Jelusalema dogu yaaba, leni Idume diema yaaba, leni yaa diema n ye Judana kpenu kandima yaaba, leni yaa Tili leni Sidoni dogi leni i tinkundogi kuli yaaba, yaa niligu n yaba boncianla den gbadi wan tiendi yaala kuli ki cua o kani. 9O den waani o ŋoadikaaba ke ban baa opo ki ñinbiabiga, wan ti kua lienni ke ku niligu n da mabini o. 10O den paagidi bi niba boncianla bi yiani po, ke yaaba n laadi fala kelima i yiani po kuli den taani o kani, ki tudi biyaba ki bua ki sii o. 11Mu cicibiadimu danba n den laa o yaa yogunu kuli, bi den gbaandi o nintuali ki tangi ki tua: “A tie U Tienu Bijua.” 12Jesu den maadi leni mu leni li bali ki yiedi mupo, mun da ban waani wan tie yua. 13Lani n den pendi Jesu den doni li juali po, ki yini wan bua ki yini yaaba ke bi cua o kani. 14O den gandi piiga n niba lie ke ban yaa ye leni o, 15ke wan go yaa tuuni ba ke bi caa ki wangi U Tienu maama, ki yaa go pia u paalu ki deli ki ñandi mu cicibiadimu mun ña mun ye yaaba yaa niinni. 16Bine n tie wan den dini yaa piiga n niliediba li bali yeni: Simono ke o mo yini o Pieli, 17leni Sebede bijaliediba Jaka leni o waalo Jan ke o yini ba mo Boaneje (lani n tie yaa jaba n maadi nani i tatantani yeni), 18leni Andile, leni Filipi, leni Batelemi, leni Matiyu, leni Toma, leni Alife bijua Jaka, leni Tade, leni Simono ban yi yua o Yankuadaano, 19leni Judasa Isikalioto, yua n den yuandi ki janbi Jesu. 20Lani n pendi Jesu den guani o denpo. Ku niligu go den taani boncianla hali ke wani leni o ŋoadikaaba ki den pia lenli ki baa je. 21Jesu niba n den gbadi ke li tie yeni, bi den cua ki baa cuo o kelima bi den tua: “Waa go pia yama.” 22Li balimaama bangikaaba yaaba n den ñani Jelusalema ki cua o kani moko den tua: “Mu cicibiadimu bado Belisebu ye o niinni ki die o. Wani n puni o u paalu ke o deli ki ñandi mu cicibiadimu mun ye yaaba yaa niinni.” 23Jesu den yini ba, ki pua ba mi kpanjama ki buali ba: “Mu cicibiadimu bado Sutaani baa ga lede ki deli o yuli? 24Yaa diema n boagidi ki tuogi leni mi yuli, laa diema kan fidi ki yaa ye. 25Yaa diegu n boagidi ki tuogi leni ku yuli, laa diegu kan fidi ki yaa ye. 26Lanwani Sutaani moko yaa fiini mi janjanma ki tuogi leni o yuli o baa boagidi, o diema kan go yaa ye, o bali baa gbeni. 27Niloba kan fidi ki kua o gbanmandaano dieli nni ki fagi o piama, kali o kpa paadi o ki loli o. Li yaa puole o baa kua o dieli nni ki fagi o piama. 28N waani yi i moamoani ke bi nisaaliba baa baa sugili tuonbiatoadi kuli po, leni ban sugi U Tienu yaa sugidi kuli po. 29Ama yua n sugi U Tienu Fuoma Yua wani, kan baa sugili hali abada. O tieni yaa tuonbiadi n baa ye hali yaa yogunu kuli.” 30Jesu den maadi yeni kelima bi den tua ke ki cicibiadiga ye o niinni. 31Jesu na leni o waamu den cua ki se niinpo, ki soani ke ban yini o. 32Ku niligu den ka ki lindi o, ke bi cua ki yedi o: “Diidi, a na leni a waamu se niinpo ki lingi a.” 33O den goa ki yedi ba: “Ŋme n tie n na leni n waamu?” 34Lani o den diidi yaaba n lindi o kuli ki yedi: “Diidi n na leni n waamu nna. 35Yua n tuo ki tiendi U Tienu yanbuama kuli, wani n tie n naataanjaga leni n naataanpuoga leni n naa.”

will be added

X\