MAKA 2

1Lan den tieni danaba, Jesu den guani Kapenayuma. Bi niba n den gbadi ke o guani deni, 2bi den taani o kani boncianla, hali ke u kaanu ki go den ye baa bu buliñoabu nintuali. O den wangi ba U Tienu maama. 3Bi niba den cua o kani leni yua yaa gbanandi n kpe ke niba na tugi o. 4Nani ban kan den fidi ki pundi Jesu kani kelima bi niba yabinu po yeni, bi den doni wan ye yaa doangu nni yuli po, ki cibi yaa bonli n yaba, ki jiini ki kuani o yiamo leni wan dua yaa kaagu kuli. 5Jesu n den laa bi dandanli, o den yedi yua yaa gbanandi n kpe yeni: “N bijua, a baa a tuonbiadi sugili.” 6Li balimaama bangikaaba bi tianba den ka likani ki bungi bi pala nni ki tua: 7” Be n teni ke one maadi nanda? O sugidi U Tienu. Wani U Tienu bebe yaaka, ŋme n baa fidi ki pa bi niba bi tuonbiadi sugili?” 8Lanyogunu Jesu den bandi o pali nni ban bungi yaala bi pala nni ki buali ba: “Be n teni ke yi bungi yi pala nni yeni? 9Be n dingi ki cie, ki yedi yua yaa gbanandi n kpe: ‹A baa a tuonbiadi sugili,› bi: ‹Fii ki taa a kaagu ki yaa cuone?› 10N bua ki doagidi yipo ke mini o Ja Bijua pia li bali ŋanduna nni ki baa fidi ki pa bi niba bi tuonbiadi sugili.” 11Lani, o den yedi yua yaa gbanandi n kpe yeni: “N yedi a, fii ki taa a kaagu ki yaa kuni.” 12O den fii ki taa o kaagu lanyogunu ki ban yaa ña ke bikuli nua. Li den paki bikuli ke bi kpiagidi U Tienu ki tua: “Ti daa bi laa yaa bonla n tie na buolu.” 13Jesu go den ñani ki baali Galile ñincianma. Ku niligu kuli den kpendi o kani ke o bangi ba U Tienu maama. 14Wan den suagi liiga, o den laa Alife bijua Lefi ke o ka o tuonli kani ki gaani li lubili. O den yedi o: “Ŋoadi nni.” Lefi den fii ki ŋoadi o. 15Lani yaa puoli Jesu n den ka Lefi dieli nni ki di leni o, bi lubigaaba leni i tagibiadi danba kuli den cua boncianla ki ka ki di leni Jesu leni o ŋoadikaaba. Laa niba siiga boncianla den ŋoadi Jesu. 16Li balimaama bangikaaba yaaba n den tie Falisieninba jaancagili siiga yaaba, den laa ke Jesu di leni bi lubigaaba leni i tagibiadi danba, ki den yedi o ŋoadikaaba: “Be yaa po ke o di ki go ñu leni bi lubigaaba leni i tagibiadi danba?” 17Jesu n den gbadi, o den yedi ba: “Yaaba n pia laafia ka bua lotoli, ama a yiama. Mii cua ki baa yini yaaba n tiegi ka, ama ti tuonbiadi danba.” 18Jan ŋoadikaaba leni Falisieninba den luo bu ñoabu. Bi niba den cua Jesu kani ki buali o: “Be yaa po ke Jan ŋoadikaaba leni Falisieninba yaa yaaba yen luo bu ñoabu ke a yaa ŋoadikaaba wani naa luo?” 19Jesu den goa ki yedi ba: “O pocaancalo danlinba baa ga lede ki loli bu ñoabu o pocaancalo n da ye leni ba yaa yogunu? Li kan tuo, kelima o pocaancalo da yaa ye leni ba li pocaali nni, bi kan fidi ki loli bu ñoabu. 20Ama u yogunu kpendi ke bi niba baa cuo o pocaancalo ki ñani o bi siiga, laa yogunu bi baa loli bu ñoabu. 21Niloba mo kan taa cabipanli ki biini li liadikpeli, kelima li cabipanli baa toli ki dadi ki padi li bonkpeli, lan padi ki pugini. 22Niloba mo kan didi taa o duvenpaano ki piagi ti dayuakpedi nni. O yaa tieni yeni o duvenpaano baa pudi ki padi ti dayuakpedi, duven baa bia, ti dayuadi mo n biidi. Ama kali ban piagi duvenpaano ti dayuapandi nni.” 23Mi fuodima daali dayenli Jesu leni o ŋoadikaaba den tagi ki poandi ŋalikama kuani nni. O ŋoadikaaba den cuoni ki jobidi ŋalikama siandi. 24Falisieninba den yedi Jesu: “Diidi ki le, be n teni ke bi tiendi yaala n kua mi fuodima daali?” 25O den goa ki yedi ba: “Naani yii cogi Dafidi n den tieni yaala wan den luo li bonjekaala ke mi koma cuo o, wani leni yaaba n den ye leni o kuli yoo? 26Li yogunu sua ke Abiata den tie bi kopadicianba bado, Dafidi den kua U Tienu diegu nni ki ŋmani ban den gagidi yaa dupen U Tienu po, baa ke li kua nitoa n ŋmani dupen yeni li yaa tie bi kopadicianba yaaka. Dafidi den taa ki ŋmani ki teni yaaba n yegi leni o moko.” 27Lani Jesu den yedi ba: “U Tienu den bili mi fuodima daali bi niba todima po yo, waa den tagi bi niba mi fuodima daali po ka. 28Lanwani o Ja Bijua n die baa mi fuodima daali.”

will be added

X\