MAKA 15

1U yienu pudima yogunu bi kopadicianba yudanba, bi nikpeliba li balimaama bangikaaba leni bi cancannikpeliba den taani ki juogi. Bi den loli Jesu ki gedini o ki ban teni o Pilata. 2Pilata den buali o: “A tie Jufinba bado bi?” Jesu den goa ki yedi o: “Fini n yedi yeni.” 3Bi kopadicianba yudanba den maadi Pilata ki kuli Jesu boncianla. 4Pilata go den buali o: “A kan goa ki yedi maamaba bi? Cengi ban maadi ki kuliti a yaala kuli.” 5Ama Jesu ki go den guani maamaba kuli. Li den paki Pilata. 6Mi Pendima jaanma kuli Pilata den yen faabi kpaadiyenli ku niligu n mia o wan faabi yua. 7Li den sua ke yaaba n yie li bali danba ki tieni mi janjanma ki ku bi niba ye li kpaadidieli nni. Bi siiga nni yendo den yi Balabasa. 8Ku niligu den cua Pilata kani ki mia o ke wan tieni bipo nani wan maani ki tiendi maama. 9O den goa ki yedi ba: “Yi bua min faabi yipo yinba Jufinba bado yeni bi?” 10Kelima o den bani ke bi kopadicianba yudanba den cuo Jesu ki cuani o li bujiali kani kelima bi nunponbiadili po. 11Bi kopadicianba yudanba den tigini ku niligu ke ban mia Pilata wan faabi bipo Balabasa. 12Pilata go den buali ba: “N nan baa tieni yin yi yua Jufinba bado yeni lede?” 13Bi go den tiani ke li pa ki cie ki yedi: “Joani o li dapoanpoanli po.” 14Pilata den yedi ba: “Be yaa po? O tieni be ke li bia?” Bi go den tiani ki pugini: “Joani o li dapoanpoanli po.” 15Pilata den bua ki mangi ku niligu pali, lani yaa po o den faabi bipo Balabasa. O den teni ke bi pua Jesu i baliji, ki taa o ki teni a minteela ban ban joani o li dapoanpoanli po. 16A minteela den gedini Jesu ki ban kuani o gufeneeli diegu nni wan ja ti buudi naankani, ki yini bi cagili kuli. 17Bi den golini o bu kpalimoanbu ki taa i konkoni ki piani nani ki badifogiliga yeni ki cibini o. 18Lani bi den fuondi o ki tua: “Ti fuondi a, fini Jufinba bado.” 19Bi den pua o yuli li kankagili, ki siini opo ti ñinsandi, ki gbaandi o nintuali ki pugi o. 20Ban den ñuadiñuadi o yeni ki gbeni, bi den goliti bu kpalimoanbu yeni ki goa ki lani o o yaa tiadi, ki ñani o ki caani o ki baan kpaa ki joani o li dapoanpoanli po. 21O ja den ye ki yi Simono, ki den tie Silena dogu yua, Alesanda leni Lufusa baa, den ñani u kuanu po ki kpendi ki kadi leni ba, ke bi tieni o u paalu ke o bugi Jesu dapoanpoanli. 22Bi den gedini Jesu ban yi yaa kaanu Goligota, lani bua ki yedi: "Ku Yukuokuogu kaanu." 23Bi den bua ki teni o yaa duven n kali leni mili, ama waa den ga. 24Bi den joani o li dapoanpoanli po, ki boagidi o tiayiekaadi ki den toani tiatia o tiayiekaadi po, ki baa le yua kuli n baa baa yaala. 25Ban den joani o li dapoanpoanli po den tie u yienu n den paagi yaa yogunu. 26Yaa diani n den waani ban jia o buudi ki ku o yaala yaa po den tie yine: "Jufinba yaa bado." 27Bi go den joani sanjiaba lie a dapoanpoana po, yendo o jienu po, o yua o ganu po. [ 28Yeni, li den tieni nani i Diani n yedi maama: “Bi den nua o ke o taa yenma leni ti tuonbiadi danba.]” 29Bi santagiba den sugidi o, ki fegini bi yula ki tua: “Hei, fini yua n baa mudi U Tienu diegu ki go maa gu dana taa, 30ga a yuli, ki jiidi li dapoanpoanli po.” 31Bi kopadicianba yudanba leni li balimaama bangikaaba moko den ñuadi o yeni bi siiga ki tua: “O den ga nitoaba ki nan kan di fidi ki ga o yuli.” 32Bi go den tua: “ U Tienu n Gandi Yua, wani Isalele yaaba bado, n jiidi li dapoanpoanli po moala na, ke tin le ki daani o.” Ban den taani ki joani wani leni yaaba a dapoanpoana po moko den sugidi o. 33Lan den pundi u yensiicocolu, li biigili den tieni ki tinga nni kuli ki yaa caa hali li yenlebidili. 34Lanyogunu Jesu den tiani boncianla: “Elowi, Elowi, lama sabakitani.” lani n tie: “N Tienu, n Tienu, be yaa po ke a ŋa nni?” 35Yaa niba n den ye likani bi tianba n den gbadi, bi den yedi: “Diidi, o yi o sawalipualo Elia.” 36Bi siiga nni yendo den sani ki pagini u cietuogu mi ñinmiligima nni, ki fini li kankagili ki yugidi ki teni o ke wan ño. O nilo yeni den yedi o lieba: “Cedi mani tin le Elia yaa baa cua ki jiini o.” 37Jesu den tiani ke li pa, ki fuo ki jiini. 38U Tienu diegu kpalidoaginkaabu den padi siiga nni ki cili tanpoli ki ban jiidi hali tinga, ki boagidi boaga lie. 39Minteela kobiga yudaano, yua n den se ki tiegi Jesu, n den laa ke o kpe yeni, o den yedi: “Moamoani, o ja na den tie U Tienu Bijua yo.” 40Bi puoba moko den se foagima ki diidi. Li den pia bi siiga Magidala dogu yua Maliyama, leni Maliyama yua n tie Jaka, o jawaalo leni Jose naa, leni Salome. 41Jesu n den ye Galile, bi puoba yeni den ŋua o ki todi o o yema po. Potoaba yaaba n yaba moko den ye likani. Bi den ciani Jesu ki cua Jelusalema. 42Laa daali den tie li boginli daali, lani n tie Jufinba n yen bogini yaala kuli mi fuodima daali po. Lani yaa po ku jofangu yogunu, 43Alimate dogu yua Josefi, yua n tie bi cancannikpeliba siiga yendo ki pia ti kpiagidi, ki moko guu ke U Tienu diema yogunu n pundi, den paagi o pali ki gedi Pilata po ki ban mia wan teni o Jesu o kpiemo. 44Li den paki Pilata leni Jesu n kpe tontoni maama. O den yini minteela kobiga yudaano ki buali o o yaa kpe ke li waagi? 45Minteela kobiga yudaano n den waani o lan tie maama, o den tuo ke Josefi taa o kpiemo. 46Josefi den da bu kpalipienbu ki gedi ki ban jiini o kpiemo li dapoanpoanli po, ki bobini o bu kpalipienbu yeni, ki ban duani o li kuli nni, ban kpiedi yaali ku tangu niinni. O den bindi ku tanpabigu ki biini li kuli ñoabu. 47Magidala yaa Maliyama leni Jose naa Maliyama den diidi ban duani Jesu o kpiemo naankani.

will be added

X\