MAKA 13

1Jesu n den ña U Tienu diegu nni yaa yogunu, o ŋoadikaaba siiga yendo den yedi o: “Canbaa, diidi ban maa leni yaa tanciama na yaa diecianŋama na!” 2Jesu den yedi o: “A laa a naa dieciama? Bi kan ti ŋa baa tanyenli kan sieni ki yaa maa li lieli po, ke a kuli naa padi ki baa.” 3Jesu den kali Olifie Tiidi juali po ki tiegi U Tienu diegu. Pieli, Jaka, Jan leni Andile bebe n den ye leni o, ki den buali o yaa buali n tie na: 4” Waani ti laa bonla n baa ti cua yaa yogunu, leni yaa sinankeeni n baa ti waani ti ke laa bonla kuli juodima yogunu pundi.” 5Lane Jesu den yedi ba: “Fangi mani yi yula ke niloba n da boandi yi. 6Bi niba boncianla baa ti cua n yeli nni ki yedi: ‹Mini n tie U Tienu n Gandi Yua,› ki boandi bi niba boncianla. 7Yi yaa ti gbadi ke bi maadi bu toabu maama, ki go maadi bu toabu laabaalo maama, yin da yagi mani yi yama. Laa bonla baa cua tiladi, ama li da kan tua mi juodima ka. 8U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi tindigibima baa tiendi i kaantiami, mi koncianma mo baa tiendi. Laa bonla kuli da tie nani u maditugukoanu cilima bebe yene. 9Yin yaa faami mani yi yula po. Bi baa cuo ki gedini yi bi bujiaba kani, ki pua yi i gbiami li balimaama bangima diena nni, yi baa sedi gufeneelinba nintuali leni bi badicianba nintuali kelima n yaa po, ki tua bipo siedi. 10Ama hali ke mi juodima daa cua, li tie tiladi o Laabaaliŋamo n kpa pundi i nibuoli kuli nni. 11Bi yaa ti cuo ki gedini yi li bujiali kani yaa yogunu, yin da tuodi ki yagi yi yama yin baa yedi yaala po. Lanyogunu yin maadi mani yaama n baa kua yi pala nni lanyogunu, kelima laa tie yinba ka baa maadi, ama U Tienu Fuoma Yua n baa maadi. 12Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po ki cuo ba ki teni ban kpa ba. 13Bi niba kuli baa nandi yi kelima n yeli po, ama yua n baa juuni hali mi juodima baa tindi. 14Yi yaa ti laa ke yaa cagindi n wudi bi niba gbani ye tin ki bi pundi ki yaa ye naani, yua n cogi mi naa maama n kpaagi bonŋanla. Lanwani, laa yogunu yaaba n baa ye Jude nni n sani ki gedi a juana po. 15Yua n ka o doangu yuli po n da jiidi ki kua deenni ki baa taa liba. 16Yua n ye u kuanu po mo n da lebidi ki guani o denpo ki baan taa o tiayekaadi. 17Fala baa ye leni yaa puoba n punbi leni yaaba n da ŋaandi laa dana nni. 18Mia mani U Tienu ke laa nuama n da tua ku fawaagu yogunu. 19Kelima laa dana nni fala baa ye hali maama ke li buolu daa tieni, ki cili U Tienu n den tagi ŋanduna yaa yogunu ki pundi hali moala. O buolu kan go tieni mo. 20O Diedo yaa bi wadi laa dana, nisaaloba kuli kan bi tindi, ama kelima wan gandi yaaba yaa po, o wadi laa dana. 21Laa yogunu niloba yaa yedi yi: ‹Diidi, U Tienu n Gandi Yua ye ne,› yaaka: ‹O ye nepo,› yin da daani o maama. 22Kelima yaa tuonanda n yedi ke bi tie U Tienu n gandi yaaba leni bi sawalipua-faadanba baa fii ki yaa tiendi sinankeeninba leni li bonlidikaala hali ke li yaa baa fidi, bi bi baa boandi U Tienu n gandi yaaba. 23Yin fangi mani yi yula, n tuodi ki waani yi li kukuli. 24Laa dana nni, fala yeni yaa pendi, u yienu baa biigi, o ŋmaalo mo kan go yendi, 25a ŋmabila baa ña tanpoli ki baali, tanpoli paaciami mo baa digibi. 26Lani bi baa le ke o Ja Bijua ye ti tawadi nni, ki kpendi leni u paaciamu leni ti kpiagiciandi. 27Lani o baa soani o malekinba ŋanduna kuli nni, ban taani wan gandi yaaba ki cili ŋanduna bianu poyendu ki yaa caa hali u naa bianu. 28Yin bandi mani bu kankanbu kpanjama n bangi yaala. Bu beni yaa bundi, yi bani ke ku siagu nagidi. 29Li go tie yene, yi yaa ti laa ke laa bonla tiendi, yin bandi ke o Ja Bijua nagini ki ye bu buliñoabu kani. 30N waani yi i moamoani ke mi naa nifiima kuli kan pendi ke laa bonla kuli ki tieni. 31Tanpoli leni ki tinga kuli baa pendi, ama n maama kan pendi hali abada. 32Ama oba kuli ki bani laa bonla n baa ti cua yaa daali leni yaa yogunu, baa tanpoli malekinba ki bani, baa Bijua, se Baa bebe. 33Yaa fangi mani yi yula ki yaa gu, [ki go jaandi ki miadi U Tienu] kelima yii bani li yogunu. 34Li baa tie nani o ja n baa caa u dogu, ki ŋa o diegu, ki guuni o naacenba o piama, ki puogi yua kuli o tuonli, ki go puogi o buliñoaguudo wan yaa gu bonŋanla yeni. 35Lani yaa po yi mo n yaa gu mani kelima yii bani o diedaano n baa kpeni yaa yogunu, ku yenjuogu, bi ku yagisiigu, bi i kootonmoe, bi ku tiŋaagu yo. 36Yeni yaa po yi mo n yaa gu mani ke wan da ti kpeni ki ludi yi, ki sua ke yi goa. 37Min yedi yi yaa maama yeni, n go yedi ma bi niba kuli: Yaa gu mani.”

will be added

X\