MAKA 11

1Jesu leni o ŋoadikaaba n den nagidi Jelusalema, ki bua ki pundi Betifaje leni Betani dobila nni, ki kuu Olifie Tiidi juali, o den soani o ŋoadikaaba siiga bilie ki yedi ba: 2” Suagi mani ki gedi yaa dobiga n ye yi liiga na. Yi yaa baa kua lienni yaa yogunu, yi baa le yaa ŋunbisaagili ke oba daa jagini li, ke li luo. Yin loti li mani ki cuani na. 3Niloba yaa buali yi: ‹Be n teni ke yi tieni line?› Yin goa ki yedi o: ‹Ti Daano n bua o.› Tontoni o baa cedi yin cuani o n kani.” 4Bi den gedi ki ban sua ke li ŋunbisaagili luo niini bu buliñoajabu kani ki kuu u sanu. Bi den loti li. 5Yaa niba n ye likani bi tianba den buali ba: “Yi tiendi be? Be n teni ke yi loti li ŋunbisaagili na?” 6Bi den guani ba nani Jesu n waani ba maama. Lani bi den cedi ke bi gedini li. 7Bi den cuani li ŋunbisaagili Jesu kani, ki lu ki maandi lipo bi tiadi ke Jesu jagini li. 8Bi niba boncianla den ladi bi tiadi u sanu nni, bi nitianba den pedi i tibensoangi i kuani nni ki moko ladi u sanu nni. 9Yaaba n ye Jesu liiga leni yaaba n ŋua o puoli kuli den kpaani ki tua: “Ti pagi U Tienu! U Tienu n seligi yua n kpendi wani Li Miali Diedo yeli nni! 10U Tienu n seligi yaa bali n baa je na, ti yaaja Dafidi n den kpa dini yaa bali yeni. U Tienu yua n ye hali tanpojoma n baa ti pagidi.” 11Jesu den pundi Jelusalema ki kua U Tienu diegu nni. O den diidi li bonla kuli. U yienu n den bua ki baa, o den yegi leni bi piiga n niliediba ki goa ki gedi Betani yaa dobiga nni. 12Lan den fii ki fa ke bi go ñani Betani, mi koma den cuo Jesu. 13O den laa bu kankanbu hali foagima ke bu faadi bundi, ki jadi ki gedi ki baa le o yaa baa le bu bonluonkaala. Wan den pundi waa laa pu se ti faadi, kelima laa den tie a kankana lonma yogunu. 14O den yedi bu: “Oba kuli n da go ŋmani a bonluonkaala hali abada.” O ŋoadikaaba den gbadi wan yedi yaala. 15Bi den pundi Jelusalema. Jesu den kua U Tienu diegu nni ki deli ki ñani yaaba n kuadi leni yaaba n da lienni kuli, ki tudi ki luni bi ligilebidiba kpagidi leni a kpaajekuada bonkalikaala. 16O den yie bipo ke oba kuli n da go tugi liba ki poandi U Tienu diegu nni. 17O go den tundi ba ki yedi: “Naani i Diani nni laa yedi: ‹Bi baa yi n diegu i jaandi diegu i nibuoli kuli po kaa?› Ama yinba wani teni ke li tua a concona wuonkaanu.” 18Bi kopadicianba yudanba leni li balimaama bangikaaba n den gbadi lani, bi den kpaagi ban baa tieni maama ki bolini o, ama bi den jie o, kelima o bangima den paki ku niligu kuli. 19Ku joboandigu n den pundi, Jesu leni o ŋoadikaaba go den ñani u dogu nni. 20Lan den fii ki fa ke bi ye u sanu nni ki poa ki dagini bu kankanbu yeni kani, bi den laa ke bu kuodi ki taani leni bu jiini kuli. 21Pieli den tiadi yaala n den tieni, ki yedi Jesu: “Canbaa, diidi ki le, ŋan den soli yaa kankanbu yeni, bu kuodi bukuli.” 22Jesu den goa ki yedi ba: “Daani mani U Tienu! 23N waani yi i moamoani, yua n yedi li naa juali: ‹Fii ki ban lu a yuli mi ñincianma nni,› o yaa yedi yeni kaa maliti o pali nni li baa tieni bi li kan tieni, ama ki daani ke wan yedi yaala baa tieni, o baa baa lan tieni opo. 24Li tie lani yaa po ke n yedi yi, yin jaandi ki miadi yaala kuli, yin daani ke yi baa la, lani yi baa baa la. 25Yin se ki jaandi yaa yogunu kuli, ki tiadi ke yi pia maama leni niloba, yin pa mani o sugili, ke yi Baa yua n ye tanpoli n pa yi mo sugili yi tuonbiadi po. [ 26Ama yi yaa puuni yi lieba sugili, yi Baa yua n ye tanpoli moko kan pa yi sugili yi yaa tuonbiadi po.]” 27Bi den pundi Jelusalema. Jesu n den goadi U Tienu diegu nni, bi kopadicianba yudanba leni li balimaama bangikaaba leni bi nikpeliba den cua o kani ki yedi o: 28” Li laa bali yaa po yo ke a tiendi li naa bonla? Ŋme n puni a li bali ke a tiendi la?” 29Jesu den yedi ba: “N baa buali yi bonyenla, yin guani npo ke n moko baa waani yi yaa bali yaa po ke n tiendi laa bonla. 30Jan n den batisi bi niba yeni, o den baa li bali tanpoli po bi, bi bi nisaaliba kane? Waani nni mani.” 31Bi den juogi bi siiga ki yedi: “Ti yaa yedi ke o den baa li tanpoli po, o baa yedi: ‹Be yaa po ke yii den daani o maama?› 32Ti yaa yedi: ‹Bi nisaaliba yaa kane,› hei...” Yeni mo bi den jie bi niba kelima bi niba kuli den nua ke Jan den tie sawalipualo i moamoani. 33Lani yaa po bi den goa ki yedi Jesu: “Tii bani ba.” Jesu den yedi ba: “N moko kan waani yi yaa bali yaa po ke n tiendi laa bonla.”

will be added

X\