LUKA 9

1Jesu den yini ki taani bi piiga n niliediba ki puni ba u paalu leni li bali ban yaa paani mu cicibiadimu kuli ki go paagidi bi niba ban yia yaa yianbuoli kuli. 2O den soani ba ke ban yaa wangi U Tienu diema maama, ki go yaa paagidi a yiama moko. 3O den yedi ba: “Yin da taa liba li sancenli po, baa gbiamu, baa sancenboagili, baa jiema, baa ligi, ki da taa liada lie mo. 4Yin kua yaa diegu nni kuli, yin yaa ye lankani hali yin baan fii. 5Bi yaa tuo ki ga yi cangu naankani kuli, yin ña laa dogu nni yaa yogunu, yin kpia ba yi taatama, lan tua siedi bi yiema po.” 6Lani bi ŋoadikaaba den fii ki gedi ki goagoadi i dowaali nni ki wangi o Laabaaliŋamo, ki paagidi a yiama i kaani kuli. 7Elodo yua n den die Galile diema den gbadi yaala n tiendi kuli, o yama den lengidi kelima bi tianba den tua ke Jan Batisi fii bi tinkpiba siiga, 8bine n yaa tua ke o sawalipualo Elia n go doagidi o yuli, bine mo ke bi sawalipuakpeliba siiga yendo n fii bi tinkpiba siiga. 9Wani Elodo mo den tua: “N den teni ke bi jia Jan yuli, lanwani min gba ke bi maadi yua yaa po li naa bonla kuli tie ŋme?” O den moandi ki baa le o. 10Jesu tondiba den guani o kani ki togidi o ban den tieni yaala kuli. Lani o den taa ba bi bebe ke bi gedi Betisayida dogu kunu po. 11A nigola den bandi ki ŋoadi o. Jesu den biali ba, ki waani ba U Tienu diema maama ki go paagi yaaba n ki pa. 12U yienu n bua ki kua, bi piiga n niliediba den nagini Jesu kani ki yedi o: “Cabi ku niligu ban yadi ki gedi yaa dobila leni yaa koajaana n kuu, ki ban baa u duankaanu leni li bonjekaala, kelima tin ye naani na tie fuali.” 13Jesu den yedi ba: “Pa ba mani yiba ban je.” Bi den goa ki yedi o: “Tii pia liba kali dupen bonbi muu leni jami lie, li yaa tie ke ti baa gedi tiba ki ban da li bonjekaala yaa niba n ye ne kuli po yaaka.” 14Kelima bi jaba bebe den bua ki pundi tudamuu (5,000). Jesu den yedi o ŋoadikaaba: “Teni mani ban boagidi nani niba piimuu muu yeni, ki kali caga caga.” 15Bi den tieni yeni ki kaani bi niba kuli. 16Jesu den taa bi dupenmuudiba leni i janliedi yeni, ki yaadi ki noanli tanpoli po ki jaandi ki seligi la. Lani o den cabidicabidi ki teni o ŋoadikaaba ban boagidi ku niligu. 17Yua kuli den dini ki guo. Bi den wodi ban dini ki sieni yaala ki gbieni piiga n baabuodi lie leni a boncaba. 18Dayenli Jesu den piadi ki jaandi ke o ŋoadikaaba bebe den ye leni o. O den buali ba: “A nigola tua ke n tie ŋme?” 19Bi den goa ki yedi o: “Boncianla tua ke a tie Jan Batisi, bine Elia, bine mo ke bi sawalipuaba siiga nni yendo n fii bi tinkpiba siiga.” 20O go den yedi ba: “Yi mo te, yi mo nan yedi ke n tie ŋme yo?” Pieli den goa ki yedi o: “A tie U Tienu n Gandi Yua.” 21Jesu den maadi leni li bali ki yedi ke ban da waani la niloba kuli. 22O go den yedi ke li tie tiladi o Ja Bijua n le fala boncianla, ke Jufinba nikpeliba leni bi kopadicianba yudanba leni li balimaama bangikaaba n yie o, ki kpa o. Ama ke li dataali daali o baa fii bi tinkpiba siiga. 23Lani Jesu den yedi bi niba kuli: “Yua n bua ki yaa ŋua nni kuli, wan yie o yuli, ki yaa bugi o dapoanpoanli daali kuli ki nan yaa ŋua nni. 24Kelima yua n bua ki ga o miali kuli o baa biani li, ama yua n baa biani o miali kelima mini yaa po kuli baa faabi li. 25O nilo yaa baa ki diedi ŋanduna kuli ke o miali nan bodi, bi ki bolini o yuli, li baa ŋanbi opo be? 26Yua n jie i fe mini leni n maama kuli po, o Ja Bijua moko baa ti jie opo i fe o yaa cua leni o kpiagidi leni Baa yaa kpiagidi ki yegi leni yaa malekinba n gagidi. 27N waani yi moamoani, yaaba n ye nekanba, bi tianba kan kpe kaa laa U Tienu diema.” 28Jesu n den maadi laa maama ke dana nii pendi, o den taa Pieli leni Jan leni Jaka ki doni li juali po ki baa jaandi. 29Wan den jaandi yaa yogunu, o nunga n naani maama den lebidi, o tiayiekaadi moko den lebidi ki pendi hali ki ñuliti. 30Jaba lie den maadi leni o. Li den tie, Musa leni Elia, ke bi doagidi bi yula ke, 31tanpoli kpiagidi lindi ba, ke bi maadi leni Jesu wan baa kpe yaa kuuma Jelusalema nni po. 32Mi guama den gbadi Pieli leni o lieba, ama bi den yie mi guama po ki laa Jesu kpiagidi leni yaa jaliediba n se leni o. 33Bi jaba yeni n den baa ña Jesu kani yaa yogunu, Pieli den yedi o: “Canbaa, li ŋani tin yaa ye ne. Tin tii suga taa, fini yenli, Musa yenli, Elia mo yenli.” Waa den bani wan maadi yaala. 34Wan den maadi yeni yaa yogunu, ku tawaligu den jiidi ki libini ba. Bi ŋoadikaaba n den laa ke bi kua ku tawaligu nni, ti jawaandi den cuo ba. 35U nialu den maadi ku tawaligu nni ki yedi: “One n tie n Bijua, min gandi yua, cengi mani o.” 36U nialu yeni n den maadi ki gbeni, bi sua ke Jesu ye obebe. Bi ŋoadikaaba den muubi bi ñoana, baa togidi oba laa yogunu ban laa yaala. 37Lan den fii ki fa, bi den jiidi li juali po, yaa niligu n yaba den tuogi Jesu. 38O ja den kpaani ku niligu siiga ki yedi: “Canbaa, n mia ŋa ŋan diidi npo n bijua na, kelima o tie n bonjayenyenga. 39Ki cicibiadiga n fii opo yaa yogunu kuli, lanyogu liga o yen kuudi, gan yaa digini o leni u paalu ki kpalini o ti ñinsanpunpudi ki faligidi o. Ki ñama o niinni pa opo. 40N bi mia a ŋoadikaaba ke ban deli ki ñani ga o kani, ke baa fidi.” 41Jesu den goa ki yedi: “Yinba, yaa nibuolu n luo li dandanli ki go bia, n baa taa ki ye leni yi ki go juuni yipo ki pundi u laa yogunu? Cuani a bijua na.” 42Ki biga n den nagini Jesu kani yaa yogunu, ki cicibiadiga den guli o ki go digini o leni u paalu. Jesu den funi leni ga, ki paagi ki biga, ki teni o o baa. 43U Tienu kpiagidi leni o paaciamu den paki yaaba n ye likani kuli. Bi niba kuli n den laa Jesu n tieni yaala kuli ke li fangicianli leni li pakili cuo ba, o den yedi o ŋoadikaaba: 44” Yinba, yin diadi mani yi tuba ki cengi mani mi naa maama bonŋanla: Bi niba baa janbi o Ja Bijua ki teni o bi nisaaliba nuu nni.” 45Ama bi ŋoadikaaba ki den ga laa maama n bua ki yedi yaala. Li den duagi bipo ke ban da ga ma. Bi den jie, baa buali Jesu lipo. 46Mi niama den fii bi ŋoadikaaba siiga, ke ban bandi bi siiga yua n tugi li yuli. 47Jesu den bani ban maliti yaala bi pala nni, ki taa ki biwaaga ki sieni o o kani 48ki yedi ba: “Yua n ga ki naa biga n yeli nni o ga mini nba yo, yua n ga mini mo, o ga yua n soani nni. Yi siiga yua n wa ki cie yikuli, wani n tugi li yuli.” 49Jan den yedi: “Canbaa, ti den laa yaa ja n deli mu cicibiadimu a yeli nni ke ti yie opo, kelima waa taani leni ti ki ŋua ŋa.” 50Jesu den goa ki yedi o: “Da go yie mani opo ke wan da tieni la, kelima yua n kaa yie yipo kuli taa yipo.” 51U yogunu n den nagini ke U Tienu baa ñani Jesu ŋanduna nni ki duoni o tanpoli, Jesu den jagi ki bili ke o baa gedi Jelusalema. 52O den soani bi tondiba ke bi kua o liiga. Bi den gedi ki ban kua Samali doyendu nni ki baa lingi o po ku candiegu. 53Ama baa den tuo Jesu cangu, kelima wan caa Jelusalema yeni yaa po. 54O ŋoadikaaba Jaka leni Jan n den laa lani bi den yedi: “Ti Daano, a bua tin yedi mi fantama n ña tanpoli po ki bolini ba bi?” 55Jesu den jigidi ki noanli ba ki funi leni ba. Kelima o Ja Bijua naa cua ki baa bolini bi nisaaliba miana ka, ama ki faabi ba yo. 56Bi den suagi liiga ki gedi dotogu. 57Ban den ye u sanu nni o nilo den yedi Jesu: “N baa ŋua ŋa ŋan caa naani kuli.” 58Jesu den goa ki yedi o: “I coli pia i fali, ti bonyugiditi mo pia a tiana, ama o Ja Bijua wani naa pia wan baa dua naani.” 59Jesu den yedi nitoa mo: “Ŋoadi nni.” O den goa ki yedi o: “N Daano, pa nni min da kpa gedi ki ban piini n baa no.” 60Jesu den yedi o: “Cedi bi tinkpiba n piini bi tinkpiba, ama fini, gedi ki ban yaa wangi U Tienu diema maama.” 61Nitoa go den yedi o: “N Daano, n baa ŋoadi a, ama pa nni min da kpa gedi ki ban cabi n denpo yaaba.” 62Jesu go den yedi o: “Yua n mubini li naakuuli ki baa yaa ko, ki go gbagidi ki nua puoli, waa dagidi U Tienu diema po.”

will be added

X\