LUKA 7

1Jesu n den maadi yaa niba n cengi opo yaa maama n tie na kuli ki gbeni, o den kua Kapenayuma dogu nni. 2Minteela kobiga yudaano yendo den ye ki pia o naacemo ke o tie opo nimoano, ke o yia hali ki bua ki kpe. 3O yudaano yeni n den gbadi ke bi maadi Jesu maama, o den soani Jufinba nikpeliba bi tianba o kani ke ban mia o wan cua ki faabi o naacemo. 4Bi den pundi Jesu kani ki mia o ki moandi ke wan da yie ki yedi: “O ja yeni pundi ŋan ŋanbi opo, 5kelima o bua ti buolu. Wani n maa tipo li balimaama bangima dieli.” 6Jesu den yegi leni ba ki caa. Wan den kuli a minteela yudaano diegu, o den tuogi wan den soani o danlinba yaaba o kani ke ban yedi o: “N Daano, da coagi a yuli, mii pundi ŋan kua n dieli nni. 7Lani yaa po moko n teni ke mii sua ke li pundi min cua a kani mini nba. Maadi a maama bebe, n naacemo baa paagi. 8Mini yua ke toaba die nni, n moko pia min die yaa minteela. N yen yedi one: ‹Gedi,› wan gedi, ki yedi o yua mo: ‹Cua na,› wan cua. N yen yedi n naacemo: ‹Tieni line,› wan tieni.” 9Jesu n den gbadi laa maama, li den tie opo bonlidikaala, die ki mangi o. O den jigidi ki yedi yaa niligu n ŋua o: “N waani yi ke baa Isalele yaaba siiga, n daa laa yaa dandancianli n yene buolu.” 10Wan den soani yaaba n den lebidi ki pundi denpo, bi den sua ke yaa naacemo n bi yia yeni pia laafia. 11Lani n pendi Jesu den gedi Nayina dogu. O ŋoadikaaba leni nigocianli den yegi leni o. 12Jesu n den nagini u dogu bilinciamu buliñoajabu, o den tuogi yaaba n ñani lienni ki tugi o kpiemo ki baan piini. Yua n kpe yeni den tie o naa tugu nni bonjayenyenga, ke o naa mo tie kpepuoli. U dogu yaaba boncianla den yegi leni o. 13O Diedo n den laa o, mi niñima den cuo o opo ke o yedi: “Da buudi.” 14O den nagini ki sii ku tinkpikpagu. Yaaba n tugi den sedi. O den yedi: “O jawaalo na, n yedi a: ‹Fii.› “ 15Lani yua n kpe yeni den fii ki kali ki maadi. Jesu den teni o o naa. 16Li fangicianli den cuo laa niba kuli, bi den kpiagidi U Tienu ki tua: “O sawalipuaciamo fii ti siiga. U Tienu goandi o nibuolu.” 17Jesu n den tieni yaala yeni kuli yaa maama den yadi Jude kuli nni leni yaa tinmu n lindi kuli. 18Jan ŋoadikaaba den togidi o laa bonla kuli. 19O den yini bi siiga ŋoadikaaba lie ki soani ba Jesu kani, ke ban yedi o: “Naani a tie yua n den baa cua bi, bi ti da go baa guu nitoa yo?” 20Bi jaba yeni n den pundi Jesu kani bi den yedi o: “Jan Batisi n soani ti a kani ke tin buali a fini n yaa tie tin gu yua yaa cuama bi, bi ke ti da go yaa baa daani nitoa yo?” 21Lanyogunu Jesu den paagi a yiama leni a tadima leni mu cicibiadimu n die yaaba kuli boncianla, ki go noadi a juama moko boncianla. 22O den goa ki yedi Jan tondiba: “Guani mani ki ban togidi Jan yin gba ki go nua yaala: A juama noadi, a waba cuoni, a gbaada ŋanbidi, a woma gba, bi tinkpiba fiidi, a luoda mo gba o Laabaaliŋamo. 23Li pamanli ye leni min kaa tie yua yaa po tingbali bonla.” 24Jan tondiba n den ñani Jesu kani yaa yogunu, o den maadi ku niligu Jan maama ki yedi: “Yi den gedi mi fanpienma po ki baan le be? Yua n tie nani u faalu n liebi yaa ñinmuagu bi? 25To, yi nan den gedi ki baan le be? Yua n bobi ti tiaŋandi bi? Diidi ki le mani, yaaba n yie ti tiaŋandi ke bi yema kuli ŋani wani ye bi badicianba diedi nni. 26Yi nan den li gedi ki baan le be? O sawalipualo bi? Yeni de, ama n waani yi ke yin ban laa yua cie baa sawalipualo. 27Wani yaa po yo ke li diani ki yedi: ‹Diidi, n soani n tondo a liiga, Ke wan ŋanbi a sanu.› 28N go yedi yi ke pua n mali yua kuli, yua n cie Jan ki ye. Ama yua n wa ki cie bikuli U Tienu n diema nni, wani n yaba ki cie o. 29Yaa niba n den cengi o kuli leni bi lubigaaba kuli den saa U Tienu po moamoani ki cedi ke Jan batisi ba. 30Ama Falisieninba leni li balimaama bangikacianba n den yie ke Jan kan batisi ba yeni, bi den yie U Tienu n den jagi ki bili bipo yaala.” 31Jesu den pugini ki yedi: “N baa nandi moala na niba leni be? Bi naani leni be? 32Bi naani leni yaa bila n ka ki daaga nni ki yi biyaba ki tua: ‹Ti piebi yipo mu yelimu, Ke yii jeli ki ciaga. Ti yini yipo i kuyani, Yi naa mua.› 33Kelima Jan Batisi cua, waa di jiema, waa ñu duven mo, ke yi tua: ‹O pia ki cicibiadiga.› 34O Ja Bijua mo cua ki di ki go ñu ke yi tua: ‹Diidi ki le, o tie jiejiedo leni dañolo, ki tie bi lubigaaba leni i tagibiadi danba kuli yaa danli.› 35Yaaba n tuo U Tienu yanfuoma kuli saa i moamoani ke mi tiegi.” 36Falisieninba siiga yendo den yini Jesu wan je leni o. Jesu den kua o diegu nni ki kali u saajekaanu kani. 37O pua den ye u dogu nni ke o tagu bia. Wan den bandi ke Jesu ye Falisieni yeni deni ki di, o den taa yaa tanli n yi alibati yaa buteliga ke ki gbie leni tulale, 38ki cua ki sedi Jesu puoli po o taana kani ke o kpaagi li bonkalikaala po. O pua yeni den buudi ke o ninsiidi cuudi ki soangi Jesu taana ke o duuni a leni o yudi ki waliti ŋa ki sogi a tulale. 39Yaa Falisieni n den yini Jesu n den laa lani, o den yedi o yama nni: “One yaa bi tie sawalipualo moamoani o bi baa bandi yaa pua n siigi o na n tie yua, leni o tagu n tie maama, ke o tie tagibiadu daano.” 40Lani Jesu den yedi Falisieni yeni: “Simono, n pia mi maama ki baa maadi a.” Simono den goa ki yedi o: “Canbaa, maadi.” 41Jesu den yedi: “O pandinlo den ye ki pia pandanba lie. One den kubi opo kujapiena kobi muu, o lielo mo kujapiena piimuu. 42Ban kaa den pia liba ki baa pa, o den cabi bani niba lie yeni kuli bi pana. Bani niba lie yeni siiga, ŋme baa bua o ki cie o yua?” 43Simono den goa ki yedi o: “N tama wan cabi yua ke o panli yaba ki cie yene.” Jesu den yedi o: “A saa i moamoani.” 44Lani o den gbegi ki diidi o pua yeni ki go yedi Simono: “A laa o pua na? Min kua a dieli nni, ŋaa puni nni ñima ke n nigidi n taana, ama wani, o nigidi n taana leni o ninsiidi ki go duuni a leni o yudi. 45Ŋaa gobini nni leni mi buama, ama wani, hali min kua, o li waliti n taana yo, waa cedi. 46Ŋaa wuli n yuli po kpama, ama wani, o sogi n taana tulale yua yaa dunga n pa. 47Lani yaa po n yedi a ke wan bua nni boncianla yeni doagidi ke o baa sugili o tuonbiadi yaadi n yaba po. Yua n baa sugili yaa tuonbiadi n wa po mo bua waamu bebe.” 48O den yedi o pua mo: “A baa a tuonbiadi sugili.” 49Yaaba n den taani ki di leni o den maliti bi pala nni: “One tie ŋme ki puuni sugili ti tuonbiadi po?” 50Jesu go den yedi o pua yeni: “A dandanli faabi a, fii ki yaa caa leni mi yanduanma.”

will be added

X\