LUKA 5

1Dayenli Jesu den se Jenesaleti ñincianma jaali po, ke ku niligu lindi o ki ŋabi ki miabi o ki bua ki gbadi U Tienu maama. 2O den laa ñinbiadi lie u ñinkunu ke bi jankpaanba ñani lienni ki ŋuudi bi taali. 3O den kua ñinbiayengu nni, Simono yaa yaagu, ki mia o ke wan piadi leni li wali waamu. Lani Jesu den kali ku ñinbiagu nni ki bangi ku niligu. 4Wan den maadi ki gbeni, o den yedi Simono: “Suagi ki pundi mi ñima n ñua naani, ki lu yi taali ki kpaani i jami.” 5Simono den goa ki yedi o: “Canbaa, ti den dua ki tuuni ñamungu kuli, tii baa pu, ama ŋan yedi yeni, n baa lu i taali.” 6Ban den luni, bi den cuo i jami boncianla hali ke bi taali cenli, 7ke bi kabini bi jankpaanlieba yaaba n ye ku ñinbialiegu nni ke ban cua ki todi ba. Bi den cua ke bi gbieni ti ñinbialiediti yeni kuli hali ke ti bua ki mia. 8Simono Pieli n den laa lani, o den gbaani Jesu nintuali ki yedi: “N Daano, foagidi n kani kelima n tie tuonbiadi daano.” 9O den maadi yeni kelima ti jawaandi den cuo o, wani leni yaaba n ye leni o kuli, kelima ban den cuo i jami boncianla maama. 10Li go den tie yeni Sebede bijaba Jaka leni Jan po, bani Simono jankpaanlieba. Jesu den yedi Simono: “Da jie liba. Nani ŋan lingi i jami maama, dinla liiga a baa lingi bi niba U Tienu po.” 11Ban den gedini bi ñinbiadi li wali kani, bi den ŋa likuli ki ŋoadi o. 12Jesu n den ye doyendu nni, o ja den ye likani ke o gbanandi kuli tie gbaadima. Wan den laa Jesu, o den labini o kani ki mia o ki yedi o: “N Daano, a yaa bua a baa fidi ki ŋanbi nni.” 13Jesu den tandi o nuu ki sii o ki yedi: “N bua, ŋanbi.” Lanyogunu mi gbaadima den gbeni opo. 14Jesu den yedi o ke wan da togidi niloba yaala n tieni, ki go yedi o: “Gedi ki ban waani a yuli o kopadiciamo ki padi a ŋanbima padili nani Musa n den bili maama, lan tua bipo siedi ke a ŋanbi.” 15Jesu yeli den ña ki pugidi. A nigola den kpendi o kani boncianla ki bua ki cengi o maama, ki go bua wan paagi ba bi yiani po. 16Ama Jesu den maani ki ña ki caa a fuana nni ki ban jaandi. 17Dayenli Jesu den bangi bi niba U Tienu maama, Falisieninba leni li balimaama bangikacianba bi tianba den ka likani. Bi den ñani Galile dogi nni leni Jude yaa dogi nni kuli leni Jelusalema moko. O Diedo paalu den ye leni Jesu ke o paagidi a yiama. 18Diidi ki le, bi niba den tugi o ja ke o dua ku kaagu po ke o gbanandi kpe. Bi den moandi ki baa kuani ki duani o Jesu nintuali. 19Ban kaa den baa ban baa tagini naani ki kuani o kelima bi niba yabinu po, bi den doni ku doangu yuli po ki cibi yaa bonli n yaba ki kuani o leni wan dua yaa kaagu po kuli, ki jiini o ki duani li nitaanli siiga Jesu nintuali. 20Jesu n den laa bi dandanli, o den yedi o ja yeni: “A baa a tuonbiadi sugili.” 21Li balimaama bangikaaba leni Falisieninba den bungi bi pala nni ki tua: “One tie ŋme ki maadi ki sugidi U Tienu nanda? Wani U Tienu bebe yaaka, ŋme baa fidi ki pa bi niba bi tuonbiadi sugili?” 22Jesu den bani ban bungi yaala, ki goa ki yedi ba: “Be n teni ke yi bungi yi pala nni yeni? 23Maama lie na siiga, mile n dingi ki cie, ki yedi: ‹A baa a tuonbiadi sugili› bi, ki yedi: ‹Fii ki yaa cuone›? 24N bua yin le ki bandi ke o Ja Bijua pia li bali ŋanduna nni ki pa bi niba bi tuonbiadi sugili.” Lane o den yedi yua yaa gbanandi n kpe: “N yedi a, fii ki taa a kaagu ki yaa kuni.” 25Lanyogunu liga o den fii ki sedi bikuli nunbu nni, ki taa wan bi dua yaa kaagu ki ñani ki ban kuni ki kpiagidi U Tienu. 26Li pakili leni li fangili den cuo bikuli ke bi kpiagidi U Tienu ki tua biyaba: “Dinla ti laa yaala pia ki lidiga.” 27Lani n pendi Jesu den ñani ki laa o lubigaalo ke bi yi o Lefi, ke o ka o tuonli kani ki gaani li lubili. Jesu den yedi o: “Ŋoadi nni.” 28O den fii ki ŋa likuli ki ŋoadi o. 29Lefi den taani bi niba o diegu nni ki ŋanbi mi jecianma Jesu po. Bi lubigaaba leni nitoaba boncianla den ka leni ba u saajekaanu kani. 30Falisieninba leni bi siiga yaaba n tie li balimaama bangikaaba den jaligidi Jesu ŋoadikaaba ki tua: “Be yaa po ke yi di ki go ñu leni bi lubigaaba leni i tagibiadi danba?” 31Jesu den goa ki yedi ba: “Yaa niba n pia laafia ka bua lotoli, ama a yiama. 32Mii cua ki baa yini yaaba n tiegi ka, kali ti tuonbiadi danba ke ban lebidi bi yama.” 33Bi niba den yedi o: “Jan ŋoadikaaba leni tinba Falisieninba yaa yaaba kuli yen luo bu ñoabu ki go jaandi, ama a yaa yaaba wani nan di ki go ñu.” 34Jesu den goa ki yedi ba: “Naani yi baa fidi ki teni o pocaancalo danlinba n loli bu ñoabu o pocaancalo da ye leni ba yaa yogunu bi? 35A dana kpendi ke bi niba baa cuo o pocaancalo ki ñani o bi siiga, laa yogunu bi baa luo bu ñoabu.” 36Jesu go den pua ba mi kpanjama ki yedi: “Niloba kan padi li liadipanli ki ñani ki cabijenga ki baa biini li liadikpeli. O yaa tieni yeni, o padi li liadipanli ki go sua yaa cabijenga n ñani yeni mo kan yaa naani leni li liadikpeli. 37Niloba mo kan didi taa duvenpaano ki piagi ti dayuakpedi nni, O yaa tieni yeni, duvenpaano baa puuni ki teni ti dayuadi n padi duven n wuli, ti dayuadi yeni mo n bodi. 38Tiladi ban piagi duvenpaano ti dayuapandi nni. 39Yua n ñuni yaa duven n kpeligi mo kan go yaa bua ki ño yaa duven n paani kelima o baa yedi: ‹Yaa duven n kpeligi mani ki cie.›

will be added

X\