LUKA 14

1Mi fuodima daali dayenli Jesu den kua Falisieninba yudaano yendo yua n den yini o o deni ki baa je. 2Yaaba n go den cua ki baa je den kpaagi Jesu. O yianpiebiko daano den ka o nintuali. 3Jesu den maadi leni li balimaama bangikacianba leni Falisieninba yaaba n ye likani ki yedi ba: “Naani li pia sanu ki paagi o nilo mi fuodima daali bi, bi laa pia yo?” 4Bi den ŋmini suo. Jesu den tandi o nuu ki mubini o yiamo yeni ki paagi o ki cabi o. 5Lani o den yedi ba: “Yi siiga ŋme yaa bijua, yaaka o nua, yaa baa li caali nni mi fuodima daali, o kan jaligi ki dadi ki ñani o?” 6Baa den fidi ki guani o laa maama po liba. 7Jesu n den laa ke Falisieni yeni n yini yaaba ban cua ki je lingi yaa kalikaani n pia ti kpiagidi ki cie, o den pua ba mi kpanjama ki yedi: 8“O nilo yaa yini a mi pocaajiema po, ŋan da gedi ki kali yaa kaanu n kpiagi ki cie. Lani tie wan yini yaaba siiga n da ti yaa pia yua yaa jigidi n cie a yaadi, 9ke yua n yini fini leni wani kuli yaa cua, wan da ti yedi a: ‹Teni one u kaanu.› Lani i fe baa cuo ŋa leni ŋan baa goa ki ban kali puoli po. 10Ama bi yaa yini a ke a pundi, ŋan ban kali puoli po yaa kalikaanu. A yaa tieni yeni yua n yini a yaa ti cua o baa yedi a: ‹N danli, cua ki kali yaa kaanu n cie.› Lani li baa tua apo ti kpiagidi wan yini yaaba kuli nintuali. 11Yua n fiini o yuli kuli, U Tienu baa jiini o, yua n jiini o yuli mo kuli, U Tienu baa fiini o.” 12Jesu go den maadi leni yua n yini o yeni mo ki yedi: “A yaa yini bi niba ban cua ki je a deni, mi yensiijiema yaaka mi yenjojiema, ŋan da yini a danlinba, yaaka a kpeliba leni a waamu yaaka yaaba n li kpi leni a kuli, yaaka a yieninlieba siiga yaaba n tie a piada, ke ban da ti goa ki mo n yini a ki guani a a ŋanma. 13A yaa baa yini bi niba mi jaanjiema po, ŋan yini a luoda leni a tadima leni a waba leni a juama. 14Lanwani U Tienu baa ŋanbi apo kelima bani wani kan fidi ki guani a a ŋanma. U Tienu yaa ti fiini yaaba n den tiendi wan bili yaala bi tinkpiba siiga, o baa guani a ma.” 15Yaaba n den ye u saajekaanu kani siiga yendo n den gbadi laa maama, o den yedi Jesu: “Li pamanli ye leni yua n baa baa ki je U Tienu diema nni.” 16Jesu den goa ki yedi o: “O nilo den ŋanbi mi jecianma ki yini bi niba boncianla. 17Mi jiema yogunu n pundi, o den soani o naacemo n ban yedi wan yini yaaba: ‹Cua mani na kelima li bonla kuli ŋanbi ki gbeni no.› 18Ama bikuli yendo yendo den mia sugili. O nikpialo den yedi o naacemo: ‹N da u kuanu, kali min gedi ki ban le u, ŋan mia npo sugili.› 19One mo den yedi: ‹N da naakpakpaadi piiga, n caa ki baan biigi ba, ŋan mia npo sugili.› 20Toa moko den yedi: ‹N da taa n pua moala na, lani yaa po n kan fidi ki gedi.› 21O naacemo den lebidi ki guani o canbaa kani ki waani o likuli. Lani o diedaano yeni pali den beni, ke o yedi o naacemo: ‹Kua u dogu daamu nni leni u sani nni tontoni ki cuani a luoda leni a tadima leni a juama leni a waba na.› 22Lan yen waamu o naacemo den goa ki yedi o: ‹Canbaa, n tieni ŋan bi puogi nni yaala, ama u kaanu go sieni.› 23Lani canbaa den goa ki yedi o: ‹Ña u dogu nni ki gedi a sanbibila nni leni a naga balinma, ki tigini bi niba ban cua na ke n diegu n gbie.› 24N yedi yi ke min den kpa yini yaaba yeni, bi siiga baa yendo kan leni n jiema.” 25A nigola boncianla den yegi leni Jesu o sancenli nni. O den jigidi ki yedi ba: 26“Yua n cua n kani, o yaa yie o baa leni o naa, leni o pua leni o bila, leni o kpeliba leni o waamu, baa o yuceli mo, o kan tua n ŋoadika. 27Yua n ki bugi o dapoanpoanli ki ŋua nni kan fidi ki yaa tie n ŋoadika. 28Yi siiga ŋme baa bua ki maa li diefoagili ki kan kpa kali ki bandi wan baa biani yaala, ki le o yaa pia yaa ligi n baa dagidi wan gbeni. 29O yaa tieni yeni, o yaa pu li tanpuuli ki naa fidi ki juodi, yaaba n baa le kuli baa ñuadi o, ki yedi: 30‹O ja na cili li diemaali ki naa fidi ki juodi.› 31Bi o laa bado n baa ye ki bua ki tuogi bu toabu leni baditoa ki nan pia toatieba tudapiiga (10,000), naani waa baa kpa kali ki biigi o yaa baa fidi ki tuogi bu toabu leni yua n kpendi o kani ki pia toatieba tudapiilie (20,000)? 32O yaa sua ke o kan fidi, o baa soani o tondiba hali ke o yibali da ye foagima, ki mia o wan waani o wan bua yaala, ban mangi leni biyaba. 33Li tie yeni, yi siiga yua n ki ŋa wan pia yaala kuli, kan tua n ŋoadika. 34Mi yaama tie yaa bonla n mani, ama mi yaa ti luo mi manu, bi baa taa be ki go mangi ma? 35Maa pia mayuli ki tinga po, maa go pia mayuli ti bugidi po, kali ban lu ma bebe. Yua n pia a tuba ki baa gbadi wan gbadi.”

will be added

X\