LUKA 13

1Laa yogunu bi nitianba den cua ki togidi Jesu yaala n den tieni Galile yaaba, yaaba n den cua ki baa padi U Tienu po, ke Pilata den teni ke bi ku ba, ki wuli bi soama ke mi taani ki kali leni bi pada yaa yaama. 2Jesu den goa ki yedi: “Yi tama ke laa niba den laa laa fala kelima bi tieni ti tuonbiadi ki cie Galile yaaba kuli bi? 3N yedi yi, yeni ka baa. Yi yaa lebidi yi yama, yi moko yikuli baa bodi yene. 4Bi, Silowe diefoagili n den baa ki ku yaa piiga n niniidiba yeni, yi tama ke bi den tudi U Tienu po ki cie Jelusalema yaaba kuli bi? 5N yedi yi, yeni ka baa. Yi moko yaa lebidi yi yama, yikuli baa bodi yene.” 6Lani, Jesu den pua mi naa kpanjama ki yedi: “O ja den ŋu bu kankanbu o duven tiidi kuanu nni. O den cua bu kani ki lingi a kankana kaa laa pu. 7Lanwani o den yedi o koaguudo: ‹Diidi ki le, bina taa nna ke n kpendi ki lingi bu kankanbu na po a kankana, mii laadi pu. Pedi bu. Be yaa po ke bu miabi u kaanu fanma fanma?› 8O koaguudo den goa ki yedi o: ‹Canbaa, cedi bu dunla da goga. N baa ko ki lindi bu ki tieni ti bugidi. 9Daalinba jeli po bu baa luoni, lan yaaka, ŋan pedi bu.› “ 10Mi fuodima daali dayenli Jesu den bangi bi niba li balimaama bangima dieyenli nni. 11O pua den ye lienni ki pia ki cicibiadiga, yaaga n den teni ke o yia hali piiga n bina nii, ke o ciaga poali ke o gunbi ki kan fidi ki yaadi ki sedi. 12Jesu n den laa o, o den maadi leni o ki yedi o: “O pua na, a paagi ki faabi leni a yianu.” 13O den maani opo o nii ke lanyogunu liga o pua yeni den yaadi ki sedi ki kpiagi U Tienu. 14Ama li balimaama bangima dieli yudaano pali den biidi Jesu n paagi o nilo mi fuodima daali yeni po, ke o yedi ku niligu: “Yi pia dana luoba ki baa tuuni yi tuona, yin yaa kpendi mani laa danluobida yaa niinni ban paagi yi, ki da cua mi fuodima daali ke ban paagi yi.” 15O Diedo den goa ki yedi o: “Yinba pala lie danba, naani mi fuodima daali yi siiga yua kuli ki yen loti o nua yaaka o ŋunbo ki ñani o li yandieli nni ki ban ñuni o? 16O pua yua n tie Abalahama puoliŋuanu ke Sutaani luo o hali piiga n bina nii na mo te, laa pundi min loti laa lolima mi fuodima daali?” 17Wan den maadi yeni yaa yogunu, i fe den cuo o koanginkaaba kuli. Ama ku niligu kuli yaa pali den mangi leni wan tiendi yaa banma ke mi pia ti kpiagidi kuli. 18Jesu go den yedi: “ U Tienu diema naani be? N baa nandi ma leni be? 19Mi tie nani yaa kpintiigu yaa bonbibu n wa ki cie ki yi mutaadi ke o nilo buli bu o kpintiidi kuanu nni ke bu pudi ki kpedi ki tua tibu. Ti bonyugiditi den tiendi bi tiana bu beni po.” 20O go den yedi: “N baa nandi U Tienu diema leni be? 21Mi naani leni li dabinli ke o pua taa ki buuni yonyiemu taa, ki sieni hali likuli n pili.” 22Jesu den suagi liiga ki poandi i dociami leni i dowaali nni, ki bangi bi niba o Laabaaliŋamo ki caa Jelusalema. 23O nilo den yedi o: “O Diedo, naani niba waamu bebe n baa tindi?” O den goa ki yedi yaaba n ye likani: 24” Moandi mani ki kua yaa buliñoabu n miabi kani, kelima n tuodi ki waani yi ke bi niba boncianla baa ti moandi ki baa kua lankani ki nan kan fidi. 25O diedaano yaa ti fii ki luoni bu buliñoabu yaa yogunu, ke li sua ke yi sieni niinpo, yi baa cili ki yaa pua bu buliñoabu kani ki tua: ‹Canbaa, luodi tipo.› O baa goa ki yedi yi: ‹Mii bani yin ñani naani.› 26Lanwani yi baa goa ki yedi o: ‹Ti den dini ki go ñuni a kani, a go den bangi ti ti dogi sani nni moko.› 27O go baa goa ki yedi yi: ‹N yedi yi, mii bani yin ñani naani, fuadi mani n kani, yinba yaaba n tiendi mi biadima.› 28Lankane yi yaa ti laa Abalahama leni Isaaka leni Jakobo leni bi sawalipuaba kuli ke bi ye U Tienu diema nni ke yinba wani nan ye niinpo, yi baa buudi ki cegini yi ñina. 29Bi niba baa ti ña nintuali leni puoli po leni niganu leni nijienu po ki taani ki kali u saajekaanu kani U Tienu diema nni. 30Diidi, bi tianba yaaba n tie puoli yaaba moala baa ti tua liiga yaaba, bi tianba yaaba n tie liiga yaaba mo baa ti tua puoli yaaba.” 31Laa yogunu Falisieninba bi tianba den cua o kani ki yedi o: “Ña ne ki gedi potogu kelima Elodo bua ki kpa ŋa.” 32O den goa ki yedi ba: “Gedi mani ki ban yedi o, wani o colo yeni, ke n deli ki ñandi mu cicibiadimu bi niba niinni ki go paagidi bi niba dinla leni saala, li dataali daali n baa soani ki dudi. 33Li tie tiladi min suagi liiga dinla leni saala leni yaa daali n ŋua, kelima laa dagidi sawalipualo n kpe kaanto kaa tie Jelusalema. 34Jelusalema, Jelusalema, fini yua n ku bi sawalipuaba, ki lugidi U Tienu n tuuni a kani yaaba a tana, taalima ŋa yo ke n den bua ki gobidi ki taani a niba n kani nani o kooñua n yen wuugi o koobila o fiabi nni maama, ama yii den bua. 35Lani yaa po, yi diegu baa tua diegbengu. N waani yi, yi kan go le nni hali yin baa ti yedi yaa yogunu: ‹U Tienu n seligi yua n kpendi wani o Diedo yeli nni.› ”

will be added

X\