LUKA 12

1Laa yogunu ku niligu den taani tudatuda hali ki ŋmaadi biyaba. Jesu den cili ki maadi leni o ŋoadikaaba ki yedi: “Fangi mani yi yula bonŋanla ki da kubi Falisieninba dabinli, lani n tie pala lie yantiali. 2Liba kuli ki ye ki wuo ki kan wuodi. Liba kuli ki ye ki duagi ke bi kan bandi la. 3Lani yaa po yin baa yedi yaala li biigili nni kuli, bi baa gbadi la u yensiinu. Yin baa soabidi yaalaa diena nni, bi baa kpaani la bi niba kuli n gbadi. 4Yinba n danlinba, n yedi yi, yin da jie mani yaaba n baa kpa yi gbanandi ki nan kan go fidi ki tieni bontoala. 5N baa waani yi yin baa yaa jie yua. Yaa jie mani yua n baa fidi ki kpa yi, ki go yuandi ki lu yi ku fantanbuogu nni. Yeni de, n yedi yi ke wani n tie yin baa jie yua. 6Baa kuadi nuani muu muu ka kuumu lie? Ama baa yeni, U Tienu kan sundi bi siiga nni baa yendo po. 7Yinba wani, baa yi yudi, U Tienu bani ti coali n da maama. Da jie mani pu kuli, yi pia mayuli ki cie i nuani boncianla. 8N yedi yi ke yua n tuo bi niba nintuali ke o tie n yua kuli, o Ja Bijua moko n baa tuo U Tienu malekinba nintuali ke o tie n yua. 9Ama yua n nia bi niba nintuali ke waa tie n yua, n moko baa nia U Tienu malekinba nintuali ke waa tie n yua. 10Yua n maadi o Ja Bijua po yaala n bia baa baa sugili, ama yua n sugi U Tienu Fuoma Yua, wani kan baa sugili. 11Bi yaa gedini yi li balimaama bangima diena nni, yaaka bi bujiaba kani, yaaka paatietoaba kani, ki baa jia leni yi ti buudi, yin da yagi mani yi yama leni yin baa maadi maama ki baa ga yi yula, leni yin baa yedi yaala kuli po, 12kelima lanyogunu lige U Tienu Fuoma Yua baa bangi yi yin baa yedi yaala.” 13Ku niligu siiga niyendo den yedi Jesu: “Canbaa, waani n kpelo wan boagidi ti baa n ŋa yaa faali ki teni nni n yaa biinu.” 14Jesu den goa ki yedi o: “N danli, ŋme dini nni li bali ke min jia yipo yi maama, bi ki boagidi yi faali?” 15O go den yedi bi niba kuli: “Fangi mani yi yula bonŋanla leni mi ŋalimanbuama, kelima o nilo miali ki ŋua o ŋalimano n yaba maama.” 16Lani Jesu den pua ba mi naa kpanjama ki yedi: “O piado den ye ke o kuanu loni boncianla. 17O den kpaagi ki yedi o pali nni: ‹N baa tieni lede? Kelima mii pia min baa bili n kpaandi kuli naani.› 18O den goa ki yedi: ‹N bani min baa tieni maama. N baa mumudi n buabuana ki goa ki maa ya n yaba ki cie, ki taani n kpaandi leni n piama kuli ki kuodi lienni. 19Lani n baa yedi n yuli: A pia mi piama ke li kandi yaa bina n yaba po, yaa fuo ki di ki go ñu ki mangidi a pali.› 20Ama U Tienu den yedi o: ‹O yanluodaano na, dinla yaa ñiagu liga, n baa taa a naano. Ŋan bili yaala kuli baa tua ŋme yaa yaala?› “ 21Jesu go den yedi: “Li tie yeni leni yua n taagi mi piama o yuceli po, ke o cima ki tie U Tienu po.” 22Li yaa puoli Jesu den yedi o ŋoadikaaba: “Li tie lani yaa po ke n yedi yi, da yagi mani yi yama yi miali yema po, yin baa di yaala po, leni yi gbanandi po yin baa yie yaala. 23Li miali cie mi jiema, ti gbanandi mo cie ti tiayiekaadi. 24Diidi mani a kankala, baa coagi, baa yendi, baa pia bilikaanu, baa pia buabuana. Leni lankuli yeni U Tienu dindi ba. Ama yinba, yi pia mayuli boncianla ki cie ti bonyugiditi. 25Yi siiga ŋme yanyagidi n baa teni wan fidi ki foagidi o miali dana baa waamu? 26Yi yaa kan fidi ki tieni yaa bonla n wa yeni, be yaa po ke yi bangi yaala n sieni kuli po. 27Diidi mani mi moapuuma n ye maama. Maa tuuni, maa pia gaali, baa yeni, n yedi yi ke baa o bado Salomono leni o kpiagiciandi kuli, waa den pundi mi siiga nni baa yenma n bobi maama. 28U Tienu yaa bobindi yaa muadi n ye ku muagu nni dinla, ke bi baa fa ki taa ti ki cuoni mi fantama u fanu nni, laa pia tama ke o baa yieni yi mo, yinba yaaba yaa dandanli n ki fuu. 29Da yagini mani yi yama leni yin baa yaa di yaala lingima leni yin baa yaa ñu yaala yaa lingima. 30Kelima yaa nibuoli n ki ŋua U Tienu ŋanduna nni kuli n kuandi bi yama laa bonla nni. Yi Baa bani ke laa bonla tie yipo tiladi. 31Ama yin kpa lingi mani U Tienu diema, lani, laa bonla kuli baa pugini yipo. 32Da jie mani liba, fini yaa yankulu n ki yaba, kelima li mani yi Baa wan pa yi mi diema. 33Kuadi mani yin pia yaala, ki pa a luoda yin kuadi ki baa yaa ligi. Ŋanbi mani yi yula po tanpoli po yaa ligiboaga n kan biidi leni yaa ŋalimani n kaa pia gbenma, a concona n kan nagini naankani, ti lulugidi mo n kan lugi ki bolini naankani. 34Kelima yi ŋalimani n ye naankani, yi yantiana mo baa ye lankane. 35Ñagini mani yi ciamu ku gbanñagidigu, ki teni yi fidisanmu n yaa co. 36Yeni de, yaa tie mani nani yaa naacenba n gu ke bi canbaa n ña mi pocaajiema po ki kpeni, ke o yaa pundi ki yedi: ‹Luodi npo mani,› ban luodi opo tontoni. 37Li pamanli ye leni yaa naacenba ke bi canbaa kpeni ki sua ke bi nua ki gu o yeni. N yedi yi i moamoani ke o baa ñagini o ciaga, ki teni ban kali u saajekaanu kani, wan teni ba mi jiema. 38O yaa kpeni o kootonmua-kpialo, yaaka o kootonmua-yuamo, ki sua ke bi nua ki gu o, li pamanli baa ye leni ba. 39Yin bandi bonŋanla ke o diedaano yaa bi bani li conconli n baa cua yaa yogunu, o bi baa gu ki kan cedi li conconli n lugidi o dieli ki kua. 40Yi moko n bogini ki yaa gu kelima o Ja Bijua baa cua yin ki daani yaa yogunu.” 41Pieli den yedi o: “N Daano, a pua mi naa kpanjama tinba bebe yaa po bi? Bi bi niba kuli po?” 42O Diedo den yedi: “Ŋme n tie yaa tuonsoanjiidi-dugika n pia mi yanfuoma, ke o canbaa guuni o o niba ke wan yaa tendi ba yaa jiema n bili bipo yaa yogunu? 43Li pamanli baa ye leni laa naacemo, o canbaa yaa kpeni ki sua ke o tiendi yeni. 44N waani yi i moamoani, o canbaa baa guuni o o piama kuli. 45Ama laa naacemo yaa yedi o pali nni: ‹N canbaa waagi mi kpenma,› ki di pua bi tuonsoanba, bi jaba leni bi puoba kuli, ki di ki go ñu hali ki gaadi, 46laa naacemo canbaa baa kpeni wan ki daani o yaa daali leni wan ki faami yaa yogunu. O baa teni ban waani o fala hali boncianla, ki gedini o ki ban taani leni yaaba n ki ŋua U Tienu. 47Yaa naacemo n bani o canbaa n bua wan yaa tiendi yaala ki naa bogini liba, kaa tieni nani o canbaa n waani o maama, bi baa pua o yaa puadi n yaba. 48Die yua n kaa bani o canbaa n bua wan yaa tiendi yaala, ki tieni yaa bonla n pundi ti puadi, o yaa puadi kan yaa yaba. Ban teni yua boncianla, bi baa bili ke wan guani boncianla. Ban piani yua ke li yaba, bi baa bili ke wan guani yaala n yaba ki cie. 49N cua ki baa lu mi fantama ŋanduna nni, n bua hali bonŋanla ke li bi mali ki cuo no. 50Ama bi baa kpa batisi nni yaa batisima n tie fala. N yama yagini boncianla hali lan baa tieni ki gbeni. 51Naani yi tama ke n cua ki baa tieni mi yanduanma ŋanduna nni bi? A-a, n cuani mi paadime. 52Moala liiga, niba muu dieyengu nni baa paadi leni biyaba, niba taa baa koani leni niba lie, niba lie n koani leni niba taa. 53Bibaa baa koani leni o bijua, ki bonjaga mo n yaa koani leni o baa, binaa baa koani leni o bisalo, ki bonpuoga mo n yaa koani leni o naa. Yaanaa baa koani leni o biyuaga, ki biyuaga mo n yaa koani leni o yaanaa.” 54Jesu go den yedi a nigola: “Yi yaa laa ke ku tawaligu fii nintuali po, yi yen yedi tontoni ke ki taaga baa mi. Li yen tua yeni mo. 55Yi yaa laa ke u faalu ñani niganu po, yi yen yedi ke ku wulugu baa tieni. Li moko yen tua yeni. 56Yinba pala lie danba na, yi bani ki bundi tanpoli leni ki tinga sinankeeninba, be yaa po ke yi naa bani ki bundi yaa yogunu n tie na yaa sinankeeninba wani? 57Be teni ke yii kpaagi ki bandi yin baa tieni yaala lan yaa tiegi? 58Ŋan yegi leni a koanginka ke yi caa li bujiali po yaa yogunu, ŋan moandi ki dagidi leni o u sanu nni wan da gedini a o bujialo kani, o bujialo n da teni a sandalima, sandalima mo n da luoni a li kpaadidieli nni. 59N yedi a, a kan ña lienni kali a ban pani ki gbeni, kaa sieni baa tanga.”

will be added

X\