1 N kpiiba, yi siiga nni niba boncianla n da lingi ki baa tua bangikaaba, kelima yi bani ke U Tienu baa jia leni tinba bi bangikaaba yaa buudi n pa ki cie. 2 Tikuli tudi yaa tudima buoli n yaba. O nilo yaa tudi o maama nni baa waamu, o tie yaa nilo n ŋani ki dagidi cain ki fidi ki paani o gbanandi kuli. 3 Ti yaa kpibini i taami mu biamu ke ban tuo ki yaa tiendi tin bua yaala, ti fidi ki gobidi bi gbanandi kuli. 4 Yin go kpaagi mani ti ñinbiaciandi, baa ke ti yaba boncianla ke ti tafaaciandi mo tudi ti, o ñinbiagobido gobidi ti leni yaa bonpegidikaala n wa, ki tendi ke ti caa wan bua naankani. 5 Bu lanbu mo tie yene, bu wa i gbananbuoli kuli siiga, ama bu baa fidi ki fiini buba ki maadi mi japaamaama boncianla. Diidi mani, mi fantama waamu bebe baa fidi ki buoni yaa fuali n yaba. 6 Bu lanbu mo tie nani mi fantama yeni, ki go tie yaa bonbiadila n ye ti gbananbuoli siiga, ki joagindi ti gbanandi kuli. Ku fantanbuogu fantama ye bu niinni ki teni ke bu cuondi mi fantama o nisaalo miali yema kuli nni. 7 O nisaalo baa fidi ki paadi ti fuayandi buoli kuli, ti bonyugiditi buoli kuli, li bonbalinkaala buoli kuli leni yaa bonfuoda buoli n ye mi ñima nni kuli, o paadi ba ki diedi ba mo. 8 Ama bi nisaaliba siiga oba kuli kan fidi ki paadi bu lanbu. Bu tie ban kan fidi ki diedi yaa bonbiadila, yaa loabidi n baa cuani mi kuuma gbie bu niinni. 9 Ti pagi o Diedo ti Baa leni buni, ki go solini bi nisaaliba, U Tienu n den tagi yaaba o yaa nannanli nni leni buni. 10 Ti pagidi leni ti solindi kuli ña ñoayenbu nni. N kpiiba, laa pundi lan yaa tie yeni. 11 Naani yaa ñima n mani leni yaa ñima n to baa fidi ki taani ki yaa ña ñinbunyenli nni bi? 12 N kpiiba, naani bu kankanbu baa fidi ki luoni olifie bonluonkaala bi? Naani duven tibu mo baa fidi ki luoni a kankana bi? Yaa ñinbunli n tie ñinyaama mo kan fidi ki bundi ñinmanma. 13 Yi siiga ŋme tie o yanfodaano ki pia mi bandima ki fani? Wan doagidi o tagiŋamu nni o tuonŋama ya n yegi leni li yumiinli leni mi yanfuoma. 14 Ama yi yaa pia li nunponbiadili ki niagi leni yi yaba, yin da kpiagi yi yula ki da pua faama i moamoani po. 15 Laa yanfuoma buolu naa tie yaama n ñani tanpoli. Ama mi tie ŋanduna yaama, ki go tie ti gbanandi yaama ki ñani mu cicibiadimu kani. 16 Kelima li nunponbiadili leni mi niagima n ye naankani, li bonla kuli baa tie sisindi sindi, li bontienka-biadila buoli kuli mo baa ye likani. 17 Ama yaa yanfuoma n ñani tanpoli n tie maama nne: Mi kpa ŋani cain, yaala n ŋua mo tie ke mi kpendinni mi yanduanma, mi dingi, mi pia li yumiinli ki gbie leni mi niñingbadima, mi tiendi a tuonŋama, maa tiendi gagidima bi niba siiga, maa pia pala lie mo. 18 Yaaba n lingi mi yanduanma tuuni yaa tuona n tiegi mi yanduanma nni.
