EBILUNBA 7

1Melikisedeki yeni den tie Salema dogu bado ki go tie Tanpojoma Tienu yaa kopadiciamo. Abalahama n den paadi bi badiba ki lebidi ki kuni yaa yogunu, Melikisedeki den ñani ki tuogi o ki gaali o. 2Abalahama n den baa yaa fagidi kuli, o den ñani li dim, ki puni Melikisedeki. A yaa soagini o yeli, Melikisedeki yeni tie mi "teginma bado", ki go tie Salema bado, lani n bundi "mi yanduanma bado." 3Waa pia baa, waa pia naa, waa pia o yaajanba togida, waa pia o miali cilima leni o miali juodima. O tie nani U Tienu Bijua ki baa tie kopadiciamo yaa yogunu kuli. 4Yin kpaagi mani wani Melikisedeki n kpiagi maama. Baa ti yaajakpialo Abalahama den puni o fagidi kuli yaa dim. 5U Tienu balimaama bili ke Lefi buolu yaaba siiga yaaba n tuuni li kopadician-tuonli n yaa gaani dim Isalele yaaba kuli kani, bani bi kpiiba yeni, baa ke bikuli tie Abalahama puoliŋuani. 6Wani Melikisedeki yeli ki diani Lefi buolu yaajanba yela nni. Ama o den ga dim Abalahama kani, ki gaali o, wani, yua n den baa U Tienu ñoaniani. 7Laa pia tama ke yua n gaali nitoa pia ti kpiagidi ki cie wan gaali yua. 8Lefi buolu kopadicianba maama, yaaba n gaani dim yeni tie nisaaliba ki baa kpe. Ama Melikisedeki yaa po, li kadi ki yedi ke o ye ki fo. 9Lanwani, Lefi, yua n den gaani dim yeni, o moko den ñani dim kelima Abalahama den ñani. 10Kelima Lefi da den ye o yaaja Abalahama tugu nni Melikisedeki n den ñani ki tuogi o yaa yogunu. 11Lefi buolu kopadicianba tuonli den tie U Tienu n den teni Isalele buolu yaaba yaa balimaama yaa tanpuuli. Lanwani, li yaa tie ke Lefi buolu kopadician-tuonli yeni den ŋani ki dagidi cain, be yaa po ke li tie tiladi ke kopadiciantoa n cua nani Melikisedeki yeni, kaa tie Alono buolu? 12Yaaba n tuuni bi kopadicianba tuonli buolu n lebidi yeni, li tie tiladi ke li balimaama mo n lebidi. 13Moamoani, mi maama na n maadi yua yaa po tie buoto yua, yaa buolu siiga ke baa niyendo ki den tuuni li padibinbinli tuonli. 14Nilo kuli bani cain ke ti Diedo tie Juda buolu yua, ama Musa n den maadi Juda buolu po, waa den maadi bi kopadicianba maama. 15Kopadiciantoa n den cua ki tie nani Melikisedeki yeni doagidi tin maadi yaa maama na ki cie. 16Waa den tua kopadiciamo kelima wan mali ki tie yaa nibuolu yua po ka. Ama o den tua yeni kelima o pia yaa miali n kan bodi yaa paalu. 17Li tieni opo yaa siedi n tie na: “A tie kopadiciamo hali yaa yogunu kuli, Nani Melikisedeki yeni.” 18Lani yaa po mi mabilikakpiama den bodi, kelima mi tadigi kaa pia todima. 19Li balimaama yeni ki den fidi ki ŋanbi liba kuli ke li dagidi cain. Ama U Tienu den yuandi ki cuani tipo yaa suginma n ŋani ki cie, tin baa nagidi U Tienu kelima yaama yaa po. 20Laa bonla den tieni leni li poli. Yaaba n den tua bi kopadicianba naa tua leni poli. 21Ama Jesu n den tua o kopadiciamo, U Tienu den poli ki yedi o: “O Diedo n poli Ki kan lebidi o yanjagili, ki yedi: ‹A baa tie kopadiciamo Hali yaa yogunu kuli.›” 22Lani yaa po, Jesu tie siedi yaa ŋantaado n ŋani ki cie yaa po. 23Bontoala go ye, bi kopadicianba den yaba kelima mi kuuma den teni ke baa fidi ki ye yaa yogunu kuli. 24Ama Jesu n ye ki fo hali yaa yogunu kuli yeni, teni ke o tuuni yaa kopadician-tuonli n ye yaa yogunu kuli po. 25Li tie lani yaa po, ke o baa fidi ki faabi yaaba n nagidi U Tienu kelima o yaa todima po yaa yogunu kuli, kelima o ye ki fo yogunu kuli ki miadi U Tienu bipo. 26Wani n tie yaa kopadicianba bado buolu n dagidi tipo. Kelima o gagidi ki ŋani cain, waa pia tagiliba kuli, tuonbiadiba kuli mo ki ye o niinni. O paadi leni ti tuonbiadi danba, U Tienu den duoni o ke o pendi tanpoli kuli. 27Waa taa leni yaa kopadicianba badiba n sieni, kelima li den tie bipo tiladi daali kuli ban yen kpa padi a pada bani biba yaa tuonbiaceli po, ki nan yuandi ki padi bi niba kuli yaa tuonbiadi po. O den tieni lani yenma ke li dagidi i yogini kuli po, wan den puni o yuli yeni. 28Li balimaama den dini bi nisaaliba yaaba n tadi ke bi tua bi kopadicianba. Ama li poli yaa maama yaama den yuandi ki cua li balimaama puoli po yeni teni ke Bijua, wani yua n dagidi ki ŋani cain hali yaa yogunu kuli, n yaa tie bi kopadicianba bado.

will be added

X\