EBILUNBA 6

1Lanwani tin cedi Kilisiti maama bangicilikaama, ki suagi ki pundi yaa bangima n tie yaaba n kpedi ki dagidi yaa po. Tin da go pu yaa tanpuupanli n tie: Ki lebidi ki ŋa yaa tuona n baa cuani mi kuuma leni li dandanli U Tienu po 2leni mi batisima bangima, leni i nii maanma, leni bi tinkpiba fiima leni yaa buudi n baa yuandi ki cua. 3Lani n tie tin baa suagi ki tieni yaala U Tienu yaa tuo. 4Yaaba n den baa ke U Tienu yendi ba yenma, ke bi leni yaa paabu n ñani tanpoli po, ki taani leni yaaba n baa o U Tienu Fuoma Yua, 5ki leni ki bandi U Tienu maama n mani maama, ki go bandi yaa yogunu n kpendi yaa paalu, 6bani yaa yaadi, li kan tuo yanlebidima n yaa go ye bipo. Kelima bani biba go joani U Tienu Bijua li dapoanpoanli po, ki go fiagi o a sala nni. 7Yaa tinga n baadi ke ki taaga mi boncianla yaa pudi yaala n pia mi fuoma yaaba n ko ga po, laa tinga baadi U Tienu seli. 8Ama ki yaa pudi i konkoni leni muadimalikoni, kaa pia fuoma. Bi kan waaginni ke bi soli ga, ki go juodi ke bi juu ga. 9Ama n buakaaba, baa ke ti maadi yeni, ti bani cain ke yi se u sanŋamu nni yaala n tie mi tindima yaa po. 10U Tienu tiegi. O kan sundi yin den tieni yaala ki doagidi yi buama opo leni yin den todi bi nigagidiŋanba ki go baa todi ba maama. 11Ti bua hali bonŋanla ke yi siiga yua kuli n go yaa pia li yankuali yeni hali mi juodima yogunu, ke yin baa yin sugini yaala kuli cain. 12Tii bua yin yaa tie kpadijedanba, ama yin yaa togidi yaaba n baadi U Tienu n niani yaala kelima li dandanli leni li juunli yaa po. 13U Tienu n den niani Abalahama u ñoanianu yaa yogunu, o den poli ke o baa kuani u. Oba n ki ye ki cie o yeni, o den taa wani oba yaa yeli ki poli 14ki yedi: “Moamoani n baa seligi a ki yaa pugidi a puoliŋuani.” 15Abalahama n den juuni ki gu, o den baa U Tienu n niani o yaala. 16Bi nisaaliba yaa poli li poli, bi yen taa yua n cie ba yaa yeli ki poli. Li poli mo tie yaali n tie nani i kpaaligi yeni ki teni mi niama kuli n gbeni. 17U Tienu moko n den bua lan doagidi cain yaaba n baa baa wan niani ba yaa ñoanianu yaa po ke o yanjagili kan lebidi, o den niani u ñoanianu ki pugini li poli. 18U Tienu den bili laa bonliedila, yaala n kan lebidi, wan kan pua faama yaala yaa po, ki bua ki yaa paagidi ti pala boncianla, tinba yaaba n sani ki baa opo ki cuo wan bili tipo yaa suginma ki muubi. 19Laa suginma tie tipo nani ku ñinbiagu kubikpiagili yaali n siendi gu bonŋanla. Mi se ki go pa bonŋanla ki piani bu kpalidoaginkaabu ki pendi ki kua liiga po u kaangagidiŋanmoanu nni, 20Jesu n den ga ti liiga ki kua naankani tinba yaa po, o tua yaa kopadicianba bado n tie nani Melikisedeki yeni ki baa ye hali yaa yogunu kuli.

will be added

X\