EBILUNBA 2

1Lani yaa po li pundi tin fangi ti yula ki cie mi kpiama ki kubi tin den gbadi yaa maama bonŋanla, ke tin da ti yaadi ki ŋa ma. 2Ti bani ke malekinba n den wangi yaa maama, den sedi bonŋanla, ki tiendi mo. Yua n den miidi kaa tuo ki ŋua man bili yaala kuli den baadi yaa panpaani n dagidi. 3Lanwani ti yaa fangi laa tindicianma, o Diedo wani oba n den kpa waani ti yaama yaa maama, ti baa tieni lede ki sani ki cia o cuonu? Yaaba n den gbadi laa maama o Diedo ñoabu nni mo den tieni tipo siedi ke mi tie moamoani. 4U Tienu moko den ñii bi siedi leni sinankeeninba leni li bonlidikaala leni yaa bancianma buoli n yaba, leni U Tienu Fuoma Yua paabu nani wan bua maama. 5U Tienu ki teni malekinba ke ban yaa die yaa ŋanduna n kpendi, tin maadi yua yaa maama na. 6Niloba yedi kaanuba i Diani nni: “U Tienu, o nisaalo tie be ke a tiani opo, O nisaalo n mali yua, Tie be ke a kubi o bonŋanla Ki lani ti kpiagidi leni ti jigidi? 7A den jiini o u yogunu waamu Ke malekinba cie o, Ki yilini o ti pagidi Leni ti kpiagidi bonyilikaala. 8A teni ke o diedi likuli Nani u bonŋmaakaanu yeni.” U Tienu n den dini o nisaalo li bali ke o die li bonla kuli yeni, waa ŋa liba kuli ke waa die la. Ama ti daa laa ke o die likuli. 9Ama ti laa Jesu, U Tienu n den jiini yua u yogunu waamu ke malekinba cie o, ki puni o ti pagidi leni ti kpiagidi ki go dini o li bali kelima wan den laa fala ki kpe yaa kuuma yaa po. O den kpe bi niba kuli po kelima U Tienu ŋanbili po. 10U Tienu, yua n den tagi li bonla kuli o yuli po ki go kubi likuli, den bua bila boncianla n taani leni o o kpiagidi nni. Lanwani o den sua ke li den pundi wan teni Jesu n dagidi ki yaa ŋani cain kelima wan laa yaa fala po, ke wan fidi ki tindi ba. 11Jesu yua n gagidi bi niba U Tienu po leni wan gagidi yaaba yeni kuli taa Baayendo. Li tie lani yaa po ke waa jie i fe ki yini ba o waamu 12wan den maadi ki yedi: “N baa waani n waamu a yeli, Ki yiini ki pagi a li nitaanli siiga.” 13O go yedi: “N baa dugu o yaa po.” Ki go yedi: “Mini nna, mini leni U Tienu N puni nni yaa bila.” 14Kelima a bila n tie nisaaliba ki pia ti gbanandi leni mi soama yeni, Jesu moko den tua nisaalo ki pia ti gbanandi leni mi soama. O den tua yeni ki baa kpe, ke o kuuma n bolini Sutaani paalu wani yua n pia mi kuuma paalu, 15ki baa faabi mi kuuma jawaandi n den kubi yaaba ti yonbidi nni hali bi miana dana kuli. 16Li doagidi cain ke waa den cua ki baa todi malekinba ka. Ama o den cua ki baa todi Abalahama buolu yo. 17Lani yaa po, li den tie tiladi ke wan tua nani o waamu yeni li bonla kuli nni. Yeni, ke wan yaa tie yaa kopadicianba bado n gba bipo mi niñima ki go tie o nidugika wan tuuni bipo yaa tuonli U Tienu kani leni wan go den padi i candanbaani padili ki baa sugili bi niba tuonbiadi po maama. 18O baa fidi ki todi ban tulini yaaba, kelima wani oba den laa fala ban tulini o yaa yogunu.

will be added

X\