EBILUNBA 12

1To, kelima yaa siedinba n yaba boncianla lindi ti nani ku tawaligu yeni, tin tugidi mani yaa tugili n yie tipo kuli leni yaa tuonbiadi n yaba ki lindi ti, ki yaa tiini leni li juunli yaa nuama n bili tipo. 2Tin yaa tiini ki nua Jesu yua n tie li dandanli cilika leni li ŋanbika. Kelima yaa pamanli n den bili opo yaa po, o den tuo li dapoanpoanli yaa kuuma, ki fali yaa fe n ye lienni, ki kali U Tienu bali kalikaanu jienu po. 3Yin kpaagikpaagi opo mani, wani yua n den juuni leni ti tuonbiadi danba n den yie opo maama kuli, ke lan todi yi yin da coagi ki luo li papaali ki cedi. 4Yin koani yaa koanli leni ti tuonbiadi yeni, yi daa koani hali ke bi wuli yi soama. 5Yi sundi U Tienu n tundi yi yaa tundi nani bibaa n baa tundi o bila maama ki yedi: “N bijua, ŋan da fali o Diedo N tundi a yaa tundifala, Ki da luo li papaali Wan fu leni a yaa yogunu. 6Kelima o Diedo tundi Wan bua yua leni fala, Ki pua wan nua yua Ke o tie o biga kuli.” 7Yin juuni mani leni laa fala. U Tienu tiendi yi yeni kelima o nua yi ke yi tie o bijaba. Ki laa bonjaga n ye ke o baa kan tundi o tundifala? 8Ama yi yaa baa a bila kuli n baadi yaa tundifala, yi tie kpiaba, yii tie bimoana. 9Ti baanba yaaba n tie nisaaliba den tundi ti tundifala ke ti fangi ba. Lanwani li pundi tin miini ti yula ti Baa yua n ye tanpoli kani, ke tin yaa pia li miali. 10Ti baanba den yen tundi ti tundifala u yogunu waamu bebe nani ban sua ke li dagidi maama, ama U Tienu tundi ti tundifala ti ŋamu po ke tin taani leni o o gagidiŋanma nni. 11Li tie moamoani ke tundifala kuli yen cili ki yaa tie pabiidili bonla kaa tie pamanli. Ama li yen yuandi ki cuani lan bangi yaaba yaa po mi teginma leni mi yanduanma. 12Lanwani yin paagi mani yi nii yi n yoaligi, leni yi duna ya n tadigi. 13Yi taana n yaa ŋua yaa sani n cuubi ke yua n diani taali n da kpigidi, ama lin paagi. 14Yin lingi mani mi yanduanma leni bi niba kuli, ki go lingi mi gagidiŋanma, kelima yua n naa pia mani kan le o Diedo. 15Yin fangi mani yi yula ke oba n da muni o yuli U Tienu ŋanbili. Yin go fangi mani yi yula ke yaa jiinu n bia ki to kuli n da toa a benkpela, ki cuani ti yanyagidi ki yaa joagindi bi niba boncianla. 16Yin go fangi mani yi yula ke oba n da tie conconma daano, leni yua n fali yaala n gagidi nani Esayu yeni, yua n den kuadi o nikpedi kelima jeyenma po. 17Yi bani ke lan pendi, wan den bua o baa n gaali o, waa den baa. Baa ke o den lingi leni ti ninsiidi, waa den fidi ke o baa lebidi jagili. 18Yii nagini ban den baa fidi ki sii yaa juali, yaali n co mi fantama. Yii nagini ku gbangbadibiadigu leni li biigicianli leni ku faaciangu 19leni kakaci piebima leni u nialu fuugu n den ye naankani. Yaaba n den gbadi laa nialu den mia ke wun da go maadi ba baa mayenma ki pugini, 20kelima baa den fidi yaa ñoabonli n tie na: “Baa yanga yaa sii li juali ban lugidi o a tana.” 21Ban den laa yaala yeni kuli den pia i jeje hali ke Musa yedi: “N jie ti jawaandi hali ki digibi.” 22Ama yi cua Siyono juali, lani n tie U Tienu yua n ye ki fo yaa dogu, yaa Jelusalema n ye tanpoli kani, malekinba yaaba n yaba ki pundi a tuda tuda bam yaa kani. 23Yi cua yaaba n tie U Tienu bikpiala, ban diani yaaba yaa yela tanpoli po nitaanli kani, yi cua U Tienu kani, bi niba kuli bujialo kani. Yi cua bi niteginkaaba naani n ye naankani, bani U Tienu n ŋanbi yaaba ke bi dagidi cain kani. 24Yi cua Jesu kani, wani yua n tie o ŋantaadipaano yaa candanbaalo, leni o soama kani yaama n mii ki maadi yaa maama n ŋani ki cie Abela yaa soama n den maadi yaala. 25Fangi mani yi yula ki da yie ke yi kan cengi yua n maadi leni yi moala. Kelima yaaba n den yie kaa cengi yua n soagindi ba U Tienu maama ŋanduna nni naa den fidi ki sani ki cia. Lanwani ti yaa yie kaa cengi yua n ye tanpoli po, laa pia tama ke ti kan fidi ki sani ki cia. 26Laa yogunu o nialu den teni ki tinga digibi, ama moala o niani ti yaa ñoanianu n tie na: “Yenma goga, n baa teni ki tinga n digibi. Li kan yaa tie ki tinga bebe ka. N baa teni tanpoli moko n digibi.” 27Lan yedi: “Yenma goga,” yeni waani ti ke yaala n tagi ki baa fidi ki digibi kuli, baa pendi, ke yaala n kan digibi mo n suagi ki yaa ye. 28Lanwani, kelima ti baa baa yaa diema n kan digibi, tin yaa ye leni i tuondi, ki kpiagidi U Tienu ki ŋua o leni li fangili leni i jeje ke li mani opo, 29kelima ti Tienu tie yaa fantama n bolindi.

will be added

X\