EBILUNBA 11

1Li dandanli tie ke o nilo bani cain ke o pia wan sugini ki baa yaala, ki go tie wan kaa nua yaala yaa doagidima. 2Li tie kelima li dandanli yaa po ke U Tienu den tieni bi nikpiaba po o siediŋamo. 3Li tie kelima li dandanli yaa po ke ti bani ke U Tienu den tagi ŋanduna leni o maama. Lanwani tin nua yaala ñani tin ki nua yaala nni. 4Li tie kelima li dandanli yaa po ke Abela den padi U Tienu po yaa padili n ŋani ki cie Kayina yaali. Li tie li dandanli yaa po ke U Tienu den yedi ke o tiegi ki den ga wan padi opo yaa padili. Laa dandanli yaa po ke o baa maadi, baa ke o kpe. 5Li tie kelima li dandanli yaa po ke U Tienu den taa Enoka ŋanduna nni ke waa bandi mi kuuma. Baa go den laa o kelima U Tienu den taa o. Hali ke o daa den taa o, i Diani den tieni opo siedi ke o mangidi U Tienu pali. 6Oba kuli kan fidi ki mangi U Tienu pali kali li dandanli yaa po, kelima li tie tiladi ke yua n pundi U Tienu kani kuli n daani ke o ye ki baa pa yaaba n lingi o kuli i panpaani. 7Li tie kelima li dandanli yaa po ke Nowe den cengi U Tienu n den tuodi ki waani o ke yaala n baa tieni, baa ke bi daa den nua la. Li fangili yaa jeje den cuo o U Tienu po, ke o kpie ku ñinbiaciangu ki baa ga o deni yaaba miana. Wan den tieni yeni, o den buni ki cuo ŋanduna, ki den baa li moamoansaali, yaali n baadi kelima li dandanli yaa po. 8Li tie kelima li dandanli yaa po ke Abalahama den tuo ki tieni U Tienu n yedi o yaala wan den yini o yaa yogunu, ki fii ki gedi wan baa baa ki diedi yaa diema nni. O den fii ki caa kaa bani wan caa naankani. 9Li tie kelima li dandanli yaa po ke o den kua ki kali nani o nilamo yeni U Tienu n den niani o yaa diema nni. O den ye a gbandiena nni leni Isaaka leni Jakobo, bani yaaba n den taani leni o ki baa U Tienu ñoanianu yeni. 10Abalahama den tieni yeni kelima o den gu ke o baa le yaa dogu n pia a tanpuupaala, U Tienu n tie yu yaa dianka leni u maalo. 11Li tie kelima li dandanli yaa po ke U Tienu den puni Sala u fidu ke o baa u buolu, baa ke o podi wani yua n den tie ŋoaliga, kelima o den nua ke yua n niani u ñoanianu yeni tie dugika. 12Li tie lani yaa po ke jayendo kani, wani yua n den podi hali ki nagini mi kuuma, i puoliŋuani den ñani boncianla, yaaba yaa coali n tie nani a ŋmabila kaa pia coadima, nani mi ñincianma jaali tanbiima yeni. 13Laa niba kuli den kpe ki kubi li dandanli. Bi daa den baa U Tienu n den niani ba yaala. Ama bi den tuodi ki laa la hali foagima, ki mangi bi pala lipo, ki tuo ke bi tie canba ki ye u yogunu waamu po ŋanduna nni. 14Yaaba n maadi yeni doagidi cain ke bi lingi bi doceli. 15Bi yama yaa den baali ban den ñani yaa dogu nni, bi den baa fidi ki guani lipo. 16Die moamoani bi den kuani bi yama ki bua ki pundi yaa dogu n ŋani ki cie, wuni tanpoli yu yeni. Lani yaa po laa pia U Tienu po fe ban yini o bi Tienu, kelima o ŋanbi bipo u dogu. 17Li tie kelima li dandanli yaa po ke Abalahama den padi Isaaka, U Tienu n den biigi o yaa yogunu. Wani, yua n den baa u ñoanianu, den tuo ki baa padi o bonjayenyenga, 18baa ke U Tienu den yedi o: “A baa baa i puoliŋuani Isaaka yaa kani.” 19O den kpaagi ki nua ke U Tienu pia u paalu ki baa fiini baa bi tinkpiba. Li tie lani yaa po ke U Tienu go den guani o o bijua. Laa bonla tie nannanli buolu. 20Li tie kelima li dandanli yaa po ke Isaaka den gaali Jakobo leni Esayu yaa yema n ye liiga po. 21Li tie kelima li dandanli yaa po ke Jakobo n den baa kpe yaa yogunu, o den gaali Josefi bila biga kuli, ki ñi o gbiamu yuli po ki kpiagi U Tienu. 22Li tie kelima li dandanli yaa po ke Josefi n den bua ki pundi o miali bianu, o den maadi Isalele buolu yaaba ñama Ejipiti nni maama, ki go bili li ñoabonli ban baa tieni o tinkpikpaba maama. 23Li tie kelima li dandanli yaa po ke Musa n den mali yaa yogunu, o danba den wuoni o hali ŋmaali taa, kelima bi den laa ke o tie yaa biga n ŋani, baa den jie o bado ñoabonli. 24Li tie kelima li dandanli yaa po ke Musa n den fandi, o den yie ke ban da yini o Falono bisalo bijua. 25O den sua ke bi yaa taani ki faligi o leni U Tienu niba cie wan mangi o pali leni ti tuonbiadi yemanma yaala n tie bonpendikaala. 26O den kpaagi ki nua ke U Tienu n Gandi Yua fe tie opo bonmoanla ki cie Ejipiti ŋalimani kuli, kelima o den nua liiga po wan baa baa yaa panpaani. 27Li tie kelima li dandanli yaa po ke o den fii ki ñani Ejipiti nni, kaa jie o bado pabienli. O den juuni ki se ke li pa, kelima o nua oba kuli n ki nua yua. 28Li tie kelima li dandanli yaa po ke o den teni ke Isalele yaaba cili mi Pendima jaanma, ki go mii mi soama a buliñoana po ke mi kuuma maleki n da sii Isalele yaaba bonjakpiala. 29Li tie kelima li dandanli yaa po ke Isalele yaaba den duodi mi Ñincianmoanma nani ki tinkuonga yeni. Ama Ejipiti yaaba n den moandi ki baa tieni yeni, mi den milini ba. 30Li tie kelima li dandanli yaa po ke Isalele yaaba den cuoni ki lindi Jeliko dogu bilinciami hali dana lele, ke i bilinciami yeni baa. 31Li tie kelima li dandanli yaa po ke li poconconli Lahaba ki den taani ki bodi leni U Tienu yiekaaba, kelima o den ga Isalele yaaba dodiidiba cangu ki todi ba. 32N go baa yedi be ki pugini? Mii pia yaa yogunu n baa dagidi min togidi Jedeyono maama, leni Balaka leni Samisona leni Jefite, leni Dafidi leni Samueli, leni bi sawalipuaba yaa maama kuli. 33Bi dandanli po den teni ke bi paadi mi diema boncianla, ki tiendi yaala n tiegi, ki go baadi U Tienu n den niani ba yaala. Bi den luoni i yangbanli ñoana, 34ki go gbindi yaa fantama n co jama, ki sani ki faabi bi yula mu jugisiemu ñoana nni, ki paadi i yiani, ki tua jakoanda bu toabu nni, ki deli bi nilanba toagola. 35Li dandanli po den teni ke bi potianba baa ke bi kpiiba yaaba n kpe goa ki fii bi tinkpiba siiga. Bi den waani bi nitianba mo fala ke baa tuo ki ga mi faabima kelima bi den bua ki baa yaa tinkpifiima n ŋani ki cie. 36Bi den ñuadi bine ki pua ba i baliji, ki go kpaa bi tianba ti kpaadi ki kuani ba li kpaadidieli nni. 37Bi den lugidi bine a tana, ki go waani bi tianba falaciamo, ki go jia bi tianba leni ti sasaadi ki jendi ba, ki go ku bi tianba leni mu jugisiemu. Bi nitianba mo den tie luoda ki goagoadi ki yie ti pegbandi leni ti ŋuagbandi, ke bi niba bia bipo ki wangi ba fala. 38Ŋanduna ki den pundi ki yaa pia laa nimoanba o niinni. Bi den goagoadi mi fanpienma nni leni a juana nni, ki ye ti tanlondi nni leni i fali nni kuli. 39Baa ke bani kuli den baa ke U Tienu tieni bipo o siediŋamo kelima bi dandanli yaa po, baa den baa wan den niani ba yaala, 40kelima U Tienu den jagi tipo yaala n ŋani ki cie, kaa bua ban ŋanbi ki dagidi cain ke tii ye lienni.

will be added

X\