EBILUNBA 1

1Hali yogu U Tienu den maadi leni ti yaajanba bi sawalipuaba ñoana nni yogini boncianla leni mabuoli boncianla. 2Ama moala, mi juodima dana nni, o maadi leni tinba o Bijua yaa ñoabu nni. O den bili ke wane n diedi li bonla kuli, o yaa niinne ke o go tagi li ŋandunli kuli. 3Wani Bijua yeni n yadi U Tienu kpiagidi yendima. U Tienu n tie maama, o Bijua moko tie yeni cain. O go kubi mi tagima kuli ke mi ye kelima o maama paaciamu po. Wan den soani ti tuonbiadi ŋuudi-ñanma tuonli ki dudi, o den kali hali tanpojoma, U Tienu yua n pia ti kpiagidi jienu po. 4Bijua den tua yua n pia ti kpiagidi ki cie malekinba nani wan baa yaa yeli n pia ti kpiagidi ki cie bi yaa yela maama. 5Kelima u laa yogunu ke U Tienu maadi leni o malekinba siiga baa yendo ki yedi o: “A tie n Bijua, Mini n mali a dinla.” U laa yogunu ke o maadi malekoba maama ki yedi: “N baa tie a Baa, A mo baa tie n bijua.” 6Ama U Tienu n soani o Bijakpiaga ŋanduna nni yaa yogunu o go yedi: “O malekinba kuli n kpiagi o.” 7Wan maadi malekinba po, o yedi: “O teni ke o malekinba Tua nani u faalu yeni, Ki go teni ke o naacenba tua mupienu.” 8Ama wan maadi o Bijua yaa maama o yedi: “Fini U Tienu, a bali kalikaanu Baa ye hali yaa yogunu kuli, A badigbiamu mo tie mi teginma gbiamu. 9A bua mi teginma, Ki nani mi biadima. Li tie lani yaa po, fini U Tienu, ke a Tienu gandi a Ki wuli a yuli po li pamanli kpama, Ki teni ke a pia ti jigidi ki cie a lieba.” 10O go yedi: “Fini o Diedo, hali mi cilima, A den pu ki tinga tanpuuli. Tanpoli mo tie a yaa tagime. 11Lani kuli baa bodi, Ama fini wani, a baa ye, Likuli baa kpeligi Ki cadi nani li liadili yeni. 12A baa kokoli la nani bu kpalibu yeni, Likuli baa lebidi nani o nilo N lebidi o liadili maama. Ama fini, a tie yenma yogunu kuli, A bina mo ki pia gbenma hali abada.” 13U laa yogunu ke U Tienu go maadi leni o malekinba kuli siiga baa yendo ki yedi: “Kali n jienu po, Hali min guli a yibalinba ŋan ŋmaa ba?” 14Malekinba yeni kuli ki tie fuoma yaaba, yaaba n tuuni wani U Tienu po, wan tuuni yaaba ke bi todi mi tindima yaa faajieba kaa?

will be added

X\