GALATI YAABA 5

1Kilisiti den faabi ti ke tin yaa die ti yula. Lani yaa po sedi mani bonŋanla ki da go kuani yi yula ti yonbidi yaa lolima nni. 2Cengi mani, mini Polo n yedi yi, ke yi yaa tuo ke bi kuani yi ku koanciagu, Kilisiti naa go pia yipo mayuli. 3N go kadi ki waani yua n tuo ke bi kuani o ku koanciagu kuli, li baa tie opo tiladi wan yaa tiendi li balimaama n bili yaala kuli. 4Yinba yaaba n lingi li moamoansaali li balimaama nni, yi paadi leni Kilisiti, ki luo U Tienu ŋanbili. 5Ama tinba, li tie li dandanli yaa po leni U Tienu Fuoma paaciamu po ke ti gu ki sugini ke ti baa li moamoansaali. 6Kelima Jesu Kilisiti nni ki kua ku koanciagu, bi ki da kua, ka pia mayuli, kali li dandanli yaali n doagidi mi buama nni. 7Yi den cili ki tiini mi nuama bonŋanla. Ŋme n den pigini ki yie yipo ke yii go tuo ki ŋua i moamoani? 8Laa bonla naa ñani U Tienu yua n yini yi yaa kani. 9“Li dabinli waamu bebe baa teni ti yonbudi kuli n pili.” 10Mini yaa po, n pia yipo ti dugidi o Diedo nni ke yi kan tuo ki tia bontoala po. Ama yua n lengidi yi yama, wan tie yua kuli, U Tienu baa bu ki cuo o. 11N kpiiba, li yaa bi tie ke n baa wangi ke ku koanciagu tie tiladi, be yaa po ke bi go wangi nni fala? Li yaa bi tie yeni, li dapoanpoanli n cuani yaa tudima bodi. 12N bi bua ke yaaba n yagini yi yama leni ku koanciagu maama yeni n jia ki fali biba. 13N kpiiba, U Tienu den yini yi ke yin yaa die yi yula. Yin da taa laa yudiedima ki yaa tiendi yi gbanandi bonbuakaala. Ama, mi buama po, yin yaa tuuni ki todi yiyaba. 14Kelima li balimaama kuli taani mayenma nni, yaama n tie na: “Ŋan bua a nisaalilielo nani ŋan bua a yuli maama yeni.” 15Ama yi yaa ñi yiyaba ki go ŋmani yiyaba, yin fangi mani yi yula, ke yi baa bolini yiyaba. 16Min yedi yi yaala tie line: Cedi mani U Tienu Fuoma n yaa gobidi yi, lani yi kan yaa go tiendi yi gbanandi bonbuakaala. 17Kelima o nisaalo gbanandi n bua yaala nia leni U Tienu Fuoma n bua yaala, U Tienu Fuoma n bua yaala mo nia leni ti gbanandi n bua yaala. Li bonliedila yeni koani leni biyaba, ki tendi ke yii fidi ki tiendi yin bua yaala. 18U Tienu Fuoma yaa gobidi yi, li balimaama kaa go die yi. 19To, o nisaalo gbanandi tuona doagidi, lani n tie mi conconma buoli kuli, ti joagindi leni ti cagindi, 20i buli ŋoadima leni u ñoagubiadu lingima, ti yibalindi leni li koanli leni li nunponli, li pabienli leni yaa yantiali n tie ki niagi leni o lielo, leni mi paadima, 21leni li nunponbiadili, leni li dañogaadili, leni ku nuagu leni laa bonbuoli kuli. N go tuodi ki waani yi nani min den kpa waani yi maama, ke yaaba n tiendi laa bonjoagindi buoli kan kua U Tienu diema nni. 22Ama U Tienu Fuoma n baa cuani yaa bonluonkaala tie: mi buama, li pamanli, mi yanduanma, li juunli, mi ŋanma, ti bulicindi, ti dugidi, mi dingima, leni li yukubili. 23Li balimaama naa koani leni laa bonla. 24Yaaba n tie Kilisiti yaaba joani ti gbanandi leni ti yantiali leni ti bonbuakaala li dapoanpoanli po. 25U Tienu Fuoma yaa teni ke ti fo, tin go yaa cuoni kelima o yaa po. 26Tin da gbengidi ti yula, ki da ñundi tiyaba li mutuoli, ki da pia li nunponbiadili tiyaba po.

will be added

X\