GALATI YAABA 4

1Diidi, n yedi ke hali o faajielo n da tie biwaaga yaa yogunu, waa paadi leni o yonbo, baa ke o die li bonla kuli. 2Wan da tie bonwaaga yeni yaa yogunu, o pia yaaba n die o ki go gobidi o piama hali o baa n den bili yaa yogunu n baa ti pundi. 3Li den tie yeni leni tinba tin den tie nani a bila yeni yaa yogunu ke ŋanduna bogida den die ti. 4Ama U Tienu n den bili yaa yogunu n pundi, o den soani o Bijua ŋanduna nni ke o pua mali o, ke li balimaama n die o, 5ke wan faabi li balimaama n die yaaba kuli, ke tin tua U Tienu bila ki baa mu bimoanmu yaa bali. 6Lani yaa po, kelima yi tua U Tienu bijaba, wani U Tienu n den soani o Bijua Fuoma ti pala nni ke o kpaani ki tua U Tienu: “N Baa, n Baa.” 7Lanwani ŋaa go tie yonbo, a di tie U Tienu bijua. Ŋan tie U Tienu bijua yeni, o baa pa ŋa wan bili o bila po yaa ŋalimani. 8Yaa yogunu n pendi, yin ki den bani U Tienu yaa yogunu, yi den ŋua i buli yi n ki tie U Tienu yeni, ki go tie li yonbi. 9Ama moala ke yi bandi U Tienu, bi ke U Tienu n bani yi, be n teni ke yi lebidi ki go ŋua bi nisaaliba bogida ya n tadi kaa pia mayuli, ki bua ki go tua laa bonla yonbi? 10Yi gagidi danaba leni ŋmaaliba leni yoginiba leni binaba, ke likuli tua yi jaanma yogini. 11N jie ke daalinba min soani yaala yi siiga n da ti tua fanma fanma. 12N kpiiba, n mia yi ke yin tua nani mini n tie maama yeni, kelima n moko tie nani yinba n tie maama yeni. Yii tudi npo baa waamu. 13Yi bani ke li tie n yianu po yo ke n den kpa waani yi o Laabaaliŋamo. 14Baa ke n tadingu yeni den tie yipo mi biigima, yii den fali nni ki sengi nni. Yi den ga n cangu nani n tie U Tienu maleki yeni, nani n tie Jesu Kilisiti yeni. 15Yin pia yaa pamancianli yeni kua le? N tieni yipo siedi ke laa yogunu, li yaa den baa fidi, yi den baa logidi yi nunceli ki pa nni. 16Naani min maadi yi i moamoani yeni n teni ke n di tua yi yibali bi? 17Yaaba n kpali ke bi bua yi yeni, yanjaga ki ŋani. Bi bua ke yin paadi leni nni ki ŋoadi bani. 18To, li ŋani ke yin yaa pia li yankuali yaala n ŋani boncianla po yogunu kuli, laa tie min ye leni yi yaa yogunu bebe ka. 19N bila, n go baa laadi yipo yaa fala n tie nani u maditugukoanu hali yin baa baa Kilisiti tagu buolu yi niinni. 20Min bua yaala tie ke n bi baa ye leni yi moala ki lebidi mataali leni yi, kelima n yama yagi yipo. 21Waani nni mani, yinba yaaba n bua ke li balimaama n yaa die yi, yii gba li balimaama n yedi yaala yoo? 22Li diani lienni ke Abalahama den pia bonjala lie, o potuado Agala den mali opo yendo, yua n ki tie yonbo, Sala yeni mo den mali opo yendo. 23O potuado n mali yua den mali nani bi nisaaliba kuli n maa maama, yua n ki tie yonbo n mali yua den mali kelima U Tienu ñoanianu yaa po. 24Laa poliediba maama tie nani kpanjama ki doagidi U Tienu ŋantaadiliedi. O ŋantaadi-yendo yua n den kua Sinayi Juali kani naani leni Agala. Wani n mali yaaba kuli tie i yonbi. 25Agala yeni tie Sinayi Juali yaali n ye Alabi diema nni ki naani leni yaa Jelusalema dogu n ye moala, yua n ye ti yonbidi nni leni o bila kuli. 26Ama Jelusalema dogu yu n ye tanpoli die u yuli wuni n tie ti yaa naa. 27Kelima li diani: Fini ki ŋoaliga, yua n ki mali Ŋan yaa ye leni li pamancianli, Yeni de, fini yua n daa bani u maditugukoanu, Ŋan kpaani kelima a pamanli po, Kelima ku ponanbangu bila baa yaba Ki cie yaa pua n ye leni o calo yaa bila. 28N kpiiba, yinba n tie u ñoanianu bila nani Isaaka yeni. 29Nani yua n den mali nani bi nisaaliba kuli n maa maama n den wangi yua den n mali kelima mi Fuoma paalu po fala maama, li go tie yeni moala. 30Ama i Diani yedi lede? Li yedi: “Deli o potuado leni o bijua kuli, kelima o bijua kan taani ki je li faali leni yua n ki tie yonbo yaa bijua.” 31Lanwani, n kpiiba, tii tie o potuado yaa bila ka, ti tie yua n ki tie yonbo yaa bila.

will be added

X\