GALATI YAABA 2

1Piiga n bina naa n den pendi, n den yegi leni Banabasa ki go gedi Jelusalema, ki taa Tita ke o yegi leni nni. 2N den gedi kelima U Tienu doagidi npo min gedi. N den waani bani Jelusalema yaaba, min den wangi bi nilanba o Laabaaliŋamo maama. N den piadi leni bi liiga yaaba ki waani bani bebe, kelima mii den bua ke min den kpa soani yaa tuonli ki go tuuni yaali moala, n tua fanma. 3Baa den ñi ke Tita yua n den yegi leni nni n kua koanciagu, baa ke o tie Gileka. 4Laa maama den fii mo kelima bi nitianba yaaba n kaa den tie ti kpiiba moamoani den kua ti siiga nni ŋasiili nni, ki bua ki goandi ti ki bandi tin pia yaa faabima Jesu Kilisiti nni, ke ban fidi ki go kuani ti li balimaama yonbidi nni. 5Tii den tuo ki puni ba u sanu baa waamu, kelima ti bua ke o Laabaaliŋamo yaa moamoani n yaa ye yi siiga ki da lebidi. 6Ban den nua yaaba ke bi tie bi yudanba, (to, ban tie yaaba ki tie npo liba, kelima U Tienu naa tiendi gagidima bi niba siiga,) yaaba n den tie bi yudanba yeni naa bili npo bontoala. 7Bi den laa ke U Tienu den puogi nni min yaa wangi o Laabaaliŋamo bi nilanba, nani wan den puogi Pieli maama Jufinba po. 8Moamoani, U Tienu yua n den teni ke Pieli tua o tondo ki gedini o Laabaaliŋamo Jufinba po den teni ke n mo tua o tondo ki gedini o Laabaaliŋamo bi nilanba po. 9Jesu yaaba siiga, yaaba n den tie nani i benjieli yeni, Jaka, Pieli leni Jan, ban den laa U Tienu n ŋanbi npo maama, bi den cuo mini leni Banabasa nijieni ki yoagi, ki doagidi ke bi taa leni ti. Bikuli den tuo ke mini leni Banabasa baa yaa tuuni bi nilanba siiga, ke bani mo baa yaa tuuni Jufinba yaa siiga. 10Bi den mia bonyenla bebe, ke tin yaa tiadi ki todi a luoda, min pia li yankuali ki tiendi yaala. 11Ama, Pieli n den cua Antiosa, n den funi leni o kelima o tagili po. 12Wan den kpa cua, o den taagi ki di leni yaaba n ki tie Jufinba. Ama Jaka n soani yaaba n den cua, o den cili ki sengi ti kpiiba yaaba n ki tie Jufinba, kaa go taani leni ba, kelima o den jie yaaba n yedi ke Jufinba koanciagu tie tiladi. 13Jufinba siiga bi tianba moko den cili ki ŋoadi laa yantiali buolu hali ke Banabasa moko den taani leni ba laa palieda nni. 14Min den laa ke baa ŋua o Laabaaliŋamo yaa moamoani n bili maama, n den yedi Pieli bikuli nintuali: “Fini yua n tie Jufi yaa tiendi nani bi nilanba n tiendi maama, ki naa ŋua Jufinba n tiendi maama, a baa fidi ki tieni bi nilanba u paalu lede ban yaa ŋua Jufinba n tiendi maama?” 15Tinba ti mali ki tie Jufinba, tii tie nilanba yaaba n tie ti tuonbiadi danba ka. 16Ti bandi ke o nilo kan baa li moamoansaali kelima U Tienu balimaama kubima yaa po. Ama o baa baa li kelima li dandanli Jesu Kilisiti nni yaa po. Ti moko ti daani, ke tin baa li moamoansaali kelima ti dandanli Kilisiti nni yaa po ke laa ŋua leni li balimaama kubima. Kelima niloba kuli kan baa li moamoansaali kelima li balimaama yaa po. 17Ama li yaa tie ke ti lingi ki bua ki baa li moamoansaali kelima Kilisiti yaa po ti sua ke tinba Jufinba moko tie ti tuonbiadi danba. Naani li bua ki yedi ke Kilisiti tie ti tuonbiadi naacemo bi? Kalam. 18Li yaa tie ke n goa ki maa min den mudi yaala, n tua mini nba li balimaama miidika. 19Mini yaa po li balimaama den teni ke n kpe yaala n tie li balimaama kubima yaa po, ke min yaa ye ki fo U Tienu po. Bi den taani ki joani nni leni Kilisiti li dapoanpoanli po. 20Lanwani laa go tie mini yua n ye ki fo, li tie Kilisiti yua n ye ki fo n niinni. Min pia yaa miali n gbanandi nni moala, n pia li kelima n dugi wani U Tienu Bijua po, wani yua n den bua nni ki puni o yuli ki kpe npo. 21Mii bua ki fali U Tienu ŋanbili. Kelima li yaa tie ke li moamoansaali baadi kelima li balimaama kubima yaa po, lani Kilisiti den kpe fanma fanma.

will be added

X\