EFESA YAABA 6

1Yinba a bila, yin tuo mani ki yaa ŋua yi danba maama nani o Diedo n bua maama, kelima lani n tiegi. 2Ŋan jigini a baa leni a naa, lan tie yaa balimakpiama n yegi leni u ñoanianu. 3Laa ñoanianu mo n tie: “ A baa ye leni li pamanli, a miali dana mo n foagidi ki tinga nni.” 4Yinba bibaanba mo, yin da mabini yi bila hali ki fiini bi pala. Ama yin yaa wubi ba ki tundi ba ki bangi ba nani o Diedo n bua maama. 5Yinba i yonbi, yin tuo ki yaa tiendi yin pia yaa canbaanba ŋanduna nni n yedi yaala leni li fangili leni mi digibima leni li payenli, nani yin tuo ki tiendi Kilisiti n yedi yaala maama. 6Yin da tiendi yeni ban nua yi yaa yogunu bebe ka, nani yi bua ki mangi bi nisaaliba pala yeni. Ama, kelima yi tie Kilisiti yaa yonbi, yin yaa kuandi mani yi yama ki yaa tiendi U Tienu yanbuama. 7Yaa tuuni mani bipo leni li pamanli kelima yi tuuni o Diedo po, laa tie bi nisaaliba yaa po ka. 8Yi bani ke nilo kuli baa baa o Diedo kani wan den soani yaa tuonŋanli panpaani, wan tie yonbo bi wan die o yuli. 9Yinba canbaanba mo, yin yaa tiendi yeni yi yonbi po. Yin da fu leni ba, kelima yi bani ke yinba leni bani kuli pia Canbaa tanpoli po, yua n naa gagidi bi niba leni biyaba. 10N majuodikaama n tie na: Yin yaa baadi mani yi fidu o Diedo kani leni o paaciamu yu n cie li bonla kuli nni. 11Yin bobi mani U Tienu n puni yi yaa toatiadi kuli ke yin fidi ki yaa se bonŋanla, ki yie ku tuotabigu yudaano nunfanbiadibu kuli po. 12Kelima tii koani leni yaa yibalinba n pia ti gbanandi leni mi soama ka. Ama ti koani leni li bali danba len i paaciami danba leni yaaba n die li biigili ŋandunli, ki tie yaa cicibiadimu n ye mi fawaama nni. 13Lani yaa po yin taa mani U Tienu n puni yi yaa toatiadi kuli, ke yin fidi ki sedi ki yie yaala n bia yaa ti cua yaa daali ki koani ki paadi, ki go yaa se ke li pa mo. 14Lanwani yin bogini mani ki yaa se ke li pa. Yin yaa ñaagi i moamoani nani ku gbanñagidigu yeni. Yin yaa laa yaa kuliadili n tie mi teginma. 15Yin pili li yankuali nani ti cacaadi yeni mi yanduanma Laabaaliŋamo wangima po. 16Yin go taa li dandanli nani ku gbankoandigu yeni ki yaa muubi yogunu kuli, ke yin fidi ki gbindi o Biado n toa yi yaa mupiemi kuli. 17Yin yaa ciibi mani mi tindima kusanli leni mi Fuoma jugisiega yaaga n tie U Tienu Maama. 18Mi Fuoma n teni yin yaa jaandi yogunu kuli, ki yaa miadi U Tienu yogunu kuli leni i jaandi leni bu miabu buoli kuli. Yaa miadi mani U Tienu o nigagidiŋanba kuli po ki da yoaligi ki da cedi. 19Yin yaa miadi o mani n moko yaa po, ke min baa yaadi ki maadi yaa yogunu kuli, wan pa nni min baa maadi yaama, ke min doagidi ki waani o Laabaaliŋamo bondoaginkaala leni li papaali. 20N tie laa Laabaaliŋamo yaa tondo ti kpaadi nni. Yin yaa miadi o mani ke min yaa wangi o Laabaaliŋamo yeni leni li papaali nani lan pundi min yaa wangi o maama. 21Tikika, yua n tie ti kpibuado leni o Diedo naacendugika, baa waani yi n laabaalo leni min tiendi yaala, ke yi moko n bandi likuli. 22N soani o yikani lani yaa po bebe, ke yin bandi ti yema n tie maama, ke wani mo n paagi yi pala. 23U Tienu yua n tie Baa leni o Diedo Jesu Kilisiti n pa ti kpiiba mi yanduanma leni mi buama leni li dandanli. 24Li ŋanbili n yaa ye leni yaaba n bua ti Diedo Jesu Kilisiti leni yaa buama n kan lebidi hali abada.

will be added

X\